༢༠༡༤ ཟླ་ ༢ ཚེས་ ༢༨ རེས་གཟའ་པ་སངས།
༄༅། །རྒྱ་ནག་གཞུང་གི་སྲིད་འཛིན་ཞི་ཅིན་ཕིང་ཕྱི་ལོ་ ༢༠༡༤ ཟླ་ ༣ པའི་ནང་ཡུ་རོབ་རྒྱལ་ཁབ་ཕ་རན་སིའི་ནང་གཞུང་འབྲེལ་ཕྱོགས་བསྐྱོད་དུ་བསླེབ་ཀྱི་ཡོད་པ་དང་སྟབས་བསྟུན་ཕྱི་ཚེས་ ༢༦ ཕ་རན་སིའི་བོད་རིགས་ཚོགས་པའི་གོ་སྒྲིག་འོག་བོད་མི་དང་བོད་དོན་རྒྱབ་སྐྱོར་བ་རྣམས་ནས་ཕ་རན་སིའི་གཞུང་ཕྱོགས་ནས་རྒྱ་ནག་གཞུང་ལ་གནོན་ཤུགས་སྤྲད་དེ་བོད་ནང་གི་ཛ་དྲག་གནས་སྟངས་ཞི་འཇམ་ཡོང་ཐབས་བྱེད་དགོས་སྐོར་གྱི་ལས་འགུལ་ཞིག་སྤེལ་འདུག
དེ་ཡང་ལས་འགུལ་དེའི་ཐོག་ཕ་རན་སིའི་ལྗང་ཁུ་ཚོགས་པའི་གྲོས་ཚོགས་ཀྱི་འཐུས་མི་སྐུ་ཞབས་ཨི་ངྷར་གྷ་ཌུ་ལགས་ཆེད་འབོད་ཀྱིས་ཁུལ་དེའི་ཕྱི་སྲིད་ལས་ཁུངས་མདུན་དུ་ལས་འགུལ་སྤེལ་འདུག་པ་མ་ཟད། སྐབས་དེར་ལས་འགུལ་བ་རྣམ་པས་ས་གནས་མང་ཚོགས་ཁྲོད་རྒྱ་ནག་གཞུང་གི་དམ་བསྒྲགས་འོག་བོད་ཀྱི་ཆོས་དང་རིག་གཞུང་སོགས་ལ་དོ་ཕོག་ཤུགས་ཆེན་འགྲོ་བཞིན་ཡོད་པའི་བོད་ནང་གི་ཛ་དྲག་གནས་སྟངས་སྤྱི་དང། ཡང་སྒོས་བོད་ཀྱི་བདེན་དོན་ཆེད་བོད་མི་རང་ལུས་མེར་སྲེག་གཏོང་མཁན་རྣམ་པའི་གནས་ཚུལ་ཡིག་ཐོག་ཏུ་བཀོད་དེ་འགྲེམས་སྤེལ་གནང་སྟེ་ཕ་རན་སིའི་གཞུང་གིས་གཙོས་མི་དམངས་ནས་བོད་རྒྱ་ཞི་མོལ་བསྐྱར་གསོ་ཡོང་ཐབས་སུ་རྒྱ་ནག་གཞུང་ལ་གནོན་ཤུགས་སྤྲོད་དགོས་སྐོར་ཀྱི་རེ་འདུན་ཡང་བཏོན་འདུག
སྐབས་དེར་སྐུ་ཞབས་ཨི་ངྷར་གྷ་ཌུ་ལགས་ཀྱིས་གསུང་དོན། ང་ཚོར་བོད་ནང་གི་ཛ་དྲག་གནས་སྟངས་ཐོག་ཧ་ཅང་སེམས་འཚབ་ཆེན་པོ་ཡོད། སྤྱིར་བཏང་ཕ་རན་སི་གཞུང་ནས་དུས་རྟག་ཏུ་འགྲོ་བ་མིའི་ཐོབ་ཐང་གནད་དོན་གལ་ཆེར་འཛིན་བཞིན་ཡོད། ང་ཚོའི་ངོས་ནས་རྒྱ་ནག་གཞུང་གི་འགོ་ཁྲིད་ཚོར་བོད་རྒྱའི་དཀའ་ངལ་སེལ་ཆེད་གྲོས་མོལ་བསྐྱར་གསོ་བྱེད་དགོས་པའི་འབོད་སྐུལ་ཞུ་བཞིན་ཡོད། ལྷག་པར་བོད་གཙོས་པའི་གྲངས་ཉུང་མི་རིགས་རྣམ་པའི་གཞི་རྩའི་ཐོབ་ཐང་ལ་ཡང་བརྩི་སྲུང་བྱེད་དགོས་པའི་རེ་འདུན་འདོན་བཞིན་ཡོད། ཅེས་གསུངས་འདུག