༢༠༡༤ ཟླ་ ༢ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༦ ཉིན་གྱི་ཕྱེད་ཡོལ་ ༣ ཐོག་བདེ་ལེགས་ཁང་ནས་མང་ཚོགས་ཀྱི་བདེ་ཐབས་སླད་དུས་བཀག་གཟུགས་གཞི་བརྟག་དཔྱད་ཚན་པ་ཞིག་བདེ་ལེགས་སྨན་ཁང་དུ་གསར་འཛུགས་གནང་བ་དེ་བཞིན་གོང་ཚེས་ཉིན་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་དར་མཚོན་གཅོད་འབྲེག་དང་འབྲེལ་དབུ་འབྱེད་གནང་སོང་། དེ་ནས་བཀའ་བློན་མཆོག་གིས་དབུས་སྐུའི་ཕྱི་ལུགས་བླ་སྨན་པ་ཚེ་བརྟན་རྡོ་རྗེ་ལགས་དང་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས། བདེ་ལེགས་སྨན་ཁང་གི་འགན་འཛིན་དང་བོད་མི་མང་སྤྱི་འཐུས་ཟླ་བ་ཕུན་སྐྱིད་ལགས། དེ་བཞིན་གསར་འགོད་པ་བཅས་ཁྱོན་མི་གྲངས་ ༢༠ བརྒལ་བའི་དབུས་སུ་བདེ་ལེགས་སྨན་ཁང་གི་འགན་འཛིན་གྱིས་ལས་གཞི་འདིའི་སྐོར་ལ་གསུང་དོན། དུས་བཀག་གཟུགས་གཞི་བརྟག་བྱེད་རྒྱུའི་ལས་གཞི་གསར་པའི་དབུ་འབྱེད་མཛད་སྒོ་སྟབས་བདེའི་ཐོག་ནས་ཞུ་རྒྱུའི་ལས་རིམ་ཞིག་བང་བསྒྲིགས་ཡོད། མཛད་སྒོའི་ཐོག་ཕེབས་པའི་བོད་མིའི་སྒྲིག་འཛུགས་ཀྱི་འཕྲོད་བསྟེན་དང་བདེ་ལེགས་སྨན་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་གཅིག་ལྕོགས་ཡིན་པ་སྐུ་ངོ་བཀའ་བློན་ཚེ་རིང་དབང་ཕྱུག་མཆོག བདེ་ལེགས་སྨན་ཁང་གི་འགན་འཛིན་ལྷན་ཚོགས་ཀྱི་ཚོགས་གཞོན་དང་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས།
དེ་བཞིན་སྐུའི་ཕྱི་ལུགས་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་གཙོས་གསར་འགོད་པ་རྣམས་ཚང་མར་ཞུ་རྒྱུར། དེ་རིང་ལས་གཞི་འདི་གསལ་བསྒྲགས་ཞུ་རྒྱུའི་དགོས་དོན་གཙོ་བོ་ནི། བདེ་ལེགས་སྨན་ཁང་ནས་ནམ་རྒྱུན་ལས་རིམ་འདྲ་མིན་ཁྱབ་བསྒྲགས་བྱེད་རྒྱུར་འབད་བརྩོན་གང་ཡང་ཞུ་གི་མེད། དེ་རིང་གི་ལས་གཞི་འདི་ནི་མང་ཚོགས་ལ་འཕྲོད་བསྟེན་ཐོག་དོ་སྣང་དང་གོ་རྟོགས་སྤེལ་ཆེད་ཡིན། གང་ལ་ཞེ་ན། མང་ཚོགས་ལ་ལས་གཞི་འདི་ངོ་སྤྲོད་དང་ཤེས་རྟོགས་ཡོང་ཆེད་གསར་འགྱུར་བརྒྱུད་ལམ་རྣམས་ཧ་ཅང་གལ་ཆེན་པོ་ཆགས་ཡོད། དུས་བཀག་གཟུགས་གཞི་བརྟག་དཔྱད་ཀྱི་ལས་རིམ་འདི་རྒྱ་གར་གྱི་རྒྱལ་ས་ཁག་ནང་སྒེར་གྱི་སྨན་ཁང་མང་དག་ཅིག་ནང་འགྲོ་བཞིན་པ་རེད། འོན་ཀྱང་ཁོང་ཚོ་དང་ང་ཚོའི་དབར་ཁྱད་པར་གང་ཡོད་དམ་ཞེ་ན། ཁོང་ཚོས་དེ་ལྟར་གནང་རྒྱུ་ནི་གོ་རྟོགས་སྤེལ་རྒྱུ་ལས་ལྷག་པ་ཚོང་གི་རྣམ་པ་ཆགས་ཡོད། བརྟག་དཔྱད་བྱེད་རྒྱུའི་བརྒྱུད་རིམ་ཞིག་ཡོད་པ་དེའི་རྗེས་མུ་མཐུད་ནས་བརྟག་དཔྱད་བྱེད་དགོས། ཞེས་བརྗོད་ན་དངུལ་འགྲོ་སོང་གཏོང་རྒྱུ་དེ་རེད། ང་ཚོ་དང་ཁོང་ཚོའི་ལས་གཞིའི་ངོ་བོ་གཅིག་མཚུངས་ཡིན་པ་གང་ཞིག་ལ་ང་ཚོས་མི་དམངས་ཀྱི་འགྲོ་སོང་དང་ཕུགས་རྒྱང་རིང་པོའི་ཆ་ནས་གཟུགས་གཞི་ཡག་པོ་ཡོང་སླད་ནད་གཞི་སྔོན་འགོག་དང་ལམ་སྟོན་ཞུ་ཆེད་ཡིན། ང་ཚོ་དང་ཁོང་ཚོའི་དབར་གྱི་བསམ་བློ་ཁྱེར་ཕྱོགས་དང་ལས་གཞིའི་ངོ་བོའི་ཁྱད་པར་དེ་ལྟ་བུ་ཞིག་ཡོད། ལྷག་པར་བདེ་ལེགས་སྨན་ཁང་དུ་བརྟག་དཔྱད་བྱེད་རྒྱུའི་དགོས་མཁོ་དང་ཆ་རྐྱེན་དེང་དུས་སྨན་ཁང་ཕལ་ཆེ་བའི་ནང་ཡོད་པ་ལྟར། གང་ཙམ་ཞིག་འདང་ངེས་བཞིན་པ་དང་ཡག་ཐག་ཆོད་ཡོད། དེར་བརྟེན་ལས་རིམ་འདི་ང་ཚོས་འགོ་བྱེད་དགོས་དོན་དེ་ལྟར་ཡིན། དེ་བཞིན་བྷ་ལ་ཇི་སྨན་ཁང་སོགས་ནང་བདེ་ལེགས་སྨན་ཁང་ནས་བཏང་བའི་ནད་པ་ཞིག་ཡིན་ན། སྨན་རིན་ཆག་ཡང་ཐོབ་ཀྱི་ཡོད། ཞེས་སོགས་ཀྱི་གསུང་བཤད་གནང་ཡོད།
དེ་ནས་སྐུའི་ཕྱི་ལུགས་བླ་སྨན་པ་ཚེ་བརྟན་རྡོ་རྗེ་ལགས་ཀྱིས་གསུང་དོན། སྤྱིར་བཏང་ངས་རེ་འདུན་ཞུ་རྒྱུར། གསར་འགྱུར་བརྒྱུད་ལམ་ པ་ཚོ་འདིར་ཕེབས་ཡོད་སྟབས་ང་ཚོའི་ལས་གཞི་གསར་པ་འདི་སྤྱི་ཚོགས་ནང་ན་ཚ་ མ་སླེབས་གོང་ནས་གཟུགས་པོ་བརྟག་དཔྱད་བྱ་རྒྱུའི་གོ་རྟོགས་སྤེལ་རྒྱུ་ཧ་ཅང་གལ་ཆེན་པོ་ཆགས་ཡོད། བོད་མི་རྣམས་ན་བའི་སྐབས་མ་གཏོགས་སྨན་ཁང་ནང་ཡོང་སྲོལ་མེད། ལས་གཞི་ཁག་གི་ནང་མ་འཛུལ་གོང་བརྟག་དཔྱད་དེ་རིགས་བྱེད་དགོས་བརྗོད་ཀྱི་ཡོད། དེར་བརྟེན་ང་ཚོ་གཅིག་པུས་འདང་གི་མེད་སྟབས་གསར་འགྱུར་བརྒྱུད་ལམ་ཁག་ཧ་ཅང་གལ་ཆེན་པོ་ཆགས་ཡོད། གསལ་བཤད་དང་གོ་རྟོགས་སྤེལ་རྒྱུ་དེ་གསར་འགོད་པ་ཚོས་གནང་དགོས་ཀྱི་རེད་བསམ་གྱི་འདུག གཉིས་པ། ང་ཚོ་བོད་པའི་སྤྱི་ཚོགས་ནང་དཔེར་ན། ནད་གཞི་སྔོན་འགོག་བྱ་རྒྱུ་དེ་ན་ཚ་ཚང་མ་སྔོན་འགོག་བྱེད་ཐུབ་ཀྱི་མེད་ཀྱང་ན་ཚ་མང་པོ་ཞིག་སྔོན་འགོག་བྱེད་ཐུབ་ཀྱི་ཡོད། དེར་བརྟེན་ང་ཚོའི་གཞུང་ལ་འགྲོ་གྲོན་ཉུང་བ་དང་། སོ་སོ་སྒེར་ལའང་དཀའ་ངལ་ཆུང་བ་ཡོད། གསུམ་པ། ང་ཚོའི་དུས་བཀག་བརྟག་དཔྱད་ཅེས་བྲིས་ཡོད། ང་ཚོ་བོད་པའི་ནང་བསམ་ཚུལ་གོ་རྟོགས་སྤེལ་མ་ཐུབ་པའི་དབང་གིས་དུས་ཚོད་ལ་མ་བལྟས་པར་གློ་བུར་དུ་ཡོང་མཁན་དེ་འདྲ་ཡོད། ངས་རྣམ་པ་ཚོར་འབོད་སྐུལ་ཞུ་རྒྱུར་མི་མང་ནང་ཁྱབ་སྤེལ་རྒྱ་ཆེ་ཙམ་གནང་རོགས་ཞུ་རྒྱུ་ཡིན། ཞེས་གསུངས།
དེ་རྗེས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་གསུང་བཤད་གནང་དོན། དེ་རིང་དུས་བཀག་བརྟག་དཔྱད་ཁང་གི་དབུ་འབྱེད་མཛད་སྒོར ཕེབས་པའི་འཕྲོད་བསྟེན་ལས་ཁུངས་ཀྱི་དྲུང་ཆེ་དང་། སྐུའི་བླ་སྨན་པ་ཚེ་བརྟན་རྡོ་རྗེ་ལགས། བདེ་ལེགས་སྨན་ཁང་གི་འགན་འཛིན་ཟླ་བ་ལགས་ཀྱིས་གཙོས་ལས་བྱེད་རྣམ་པ། གསར་འགོད་པ་བཅས་ཚང་མ་འདིར་ཕེབས་པར་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། དེ་རིང་བདེ་ལེགས་སྨན་ཁང་གི་དུས་བཀག་བརྟག་དཔྱད་ཁང་འདི་དབུ་འཛུགས་གནང་ཡོད་པར་བརྟེན། ཚང་མས་བརྟག་དཔྱད་ཁང་འདི་བེད་སྤྱོད་གནང་དགོས་རྒྱུ་ཧ་ཅང་གལ་ཆེན་པོ་རེད། གཙོ་བོ་རྡ་ས་དང་དེའི་ཉེ་འགྲམ་དུ་གནས་སྡོད་མི་མང་རྣམ་པ་དང་། ཕྱི་ལོག་ནས་བོད་མི་མང་པོ་ཞིག་རྡ་སར་ཕེབས་བཞིན་ཡོད། ཁོང་ཚོས་ང་ཚོའི་སྨན་ཁང་འདིའི་ནང་བརྟག་དཔྱད་བྱེད་རྒྱུའི་མཐུན་རྐྱེན་ཡག་པོ་ཡོད་པ་དེ་དག་བེད་སྤྱོད་གཏོང་རྒྱུ་ཧ་ཅང་གལ་ཆེན་རེད། ཅེས་ཞུ་འདོད་བྱུང་། དེ་དང་ཆབས་ཅིག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། སྲི་ཞུ་བ། ལས་བྱེད་བགྲེས་ཡོལ་རྣམ་པ། ཉམ་ཐག་ཁོངས་སུ་ཡོད་པའི་མི་མང་། ཆབ་སྲིད་བཙོན་ཟུར་བཅས་ལ་འཕྲོད་བསྟེན་ལས་ཁུངས་ནས་སྨན་བཅོས་ཀྱི་མཐུན་རྐྱེན་སྐྲུན་བཞིན་ཡོད། ཁོང་རྣམ་ནས་དང་ཐོག་བདེ་ལེགས་སྨན་ཁང་གི་མཐུན་རྐྱེན་དེ་དག་བེད་སྤྱོད་གནང་རོགས་ཞུ་རྒྱུ་ཡིན།
དེ་བཞིན་བདེ་ལེགས་སྨན་ཁང་བརྒྱུད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལས་གཞི་མང་པོ་ཞིག་སྤེལ་གྱི་ཡོད། དཔེར་ན། ཀྲི་བི་སྔོན་འགོག་དང་སྨན་བཅོས་ཀྱི་ལས་གཞི་འདི་བདེ་ལེགས་སྨན་ཁང་གི་ལས་གཞི་གལ་ཆེན་ཞིག་ཆགས་ཡོད། དེའི་ཐོག་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་མཉམ་རུབ་ཐོག་ནས་ནད་གཞི་སྔོན་འགོག་དང་སྨན་བཅོས་ཀྱི་མཐུན་རྐྱེན་སྦྱར་དང་སྦྱོར་མུས་ཡིན་པ་མ་ཟད། དེའི་ཐོག་གྲུབ་འབྲས་ཆེན་པོ་འཐོན་བཞིན་ཡོད། གཉིས་པ་དེ་འཕྲོད་བསྟེན་ལས་ཁུངས་ཀྱི་ལས་གཞི་གལ་ཆེ་བ་ཞིག་ནི་མ་དང་བྱིས་པའི་ལས་གཞི་ཆགས་ཀྱི་ཡོད། རྡ་ས་དང་དེའི་ཉེ་འགྲམ་དུ་བཞུགས་མཁན་བོད་མི་སྦྲུམ་མ་རྣམ་པ་ཚོ་བརྟག་དཔྱད་བྱེད་རྒྱུ་དང་བཅུད་སྨན་སྤྲོད་རྒྱུ། Ultra Sound རྒྱག་རྒྱུ།
དེ་བཞིན་ཕྲུ་གུ་ལོ་ལྔ་མན་རྣམས་ལ་སྔོན་འགོག་གི་ཁབ་རྒྱག་རྒྱུ་སོགས་བདེ་ལེགས་སྨན་ཁང་བརྒྱུད་མང་ཚོགས་ལ་མཐུན་རྐྱེན་སྦྱོར་བཞིན་ཡོད་པ་དེ་དག་ཚང་མས་མ་གོ་མ་ཐོས་མེད་པར་མཁྱེན་པ་གནང་རོགས། མཐའ་དོན་བདེ་ལེགས་སྨན་ཁང་ནས་དུས་བཀག་བརྟག་དཔྱད་ཀྱི་མཐུན་རྐྱེན་ཞུས་པ་དེར་ཚང་མས་རྒྱབ་སྐྱོར་གནང་བའི་ཐོག་བེད་སྤྱོད་བྱེད་དགོས་རྒྱུ་གལ་ཆེན་པོ་རེད། ཐུགས་རྗེ་ཆེ། ཞེས་གསུང་བཤད་གནང་ཡོད། ཞེས་གསུང་བཤད་གནང་སྟེ་དབུ་འབྱེད་ཀྱི་མཛད་སྒོ་གྲོལ། །
