༢༠༡༣ ཟླ་ ༡༢ ཚེས་ ༢༤ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་ལྡན་ཨུ་རུ་སུའི་ཆོས་ཞུ་བ་རྣམས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༡༢ ཚེས་ ༢༣ ཉིན་མགོན་པོ་གང་ཉིད་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ (Kempinski Hotel) གསོལ་མགྲོན་ཁང་དུ་ཨུ་རུ་སུའི་མངའ་འོག་ཏུ་ཡོད་པའི་ནང་པའི་སྤྱི་མཐུན་རྒྱལ་ཁབ་ཀལ་མུཀ་དང་། བྷུར་ཡ། ཐུ་ཝ་གསུམ་སོགས་ནས་ཕེབས་པའི་དད་ལྡན་ཆོས་ཞུ་བ་ ༡༣༠༠ ཙམ་དང་། དེ་བཞིན་རྒྱ་རིགས་དང་དབྱིན་ཇི། རྒྱ་གར་བ་སོགས་ཁྱོན་ཆོས་ཞུ་བ་མི་གྲངས་ ༡༥༠༠ བརྒལ་བར་རྒྱལ་བ་མི་འཁྲུགས་པའི་བཀའ་དབང་སྩལ་ཏེ་ཆོས་འབྲེལ་མཇུག་སྒྲིལ་མཛད་འདུག
དེ་ཡང་གོང་ཚེས་ཉིན་༸གོང་ས་མཆོག་གིས་དེར་འདུས་དད་ལྡན་ཆོས་ཞུ་བ་རྣམས་ལ་བཀའ་དབང་སྐབས་བཀའ་སློབ་སྩལ་དོན། སྤྱི་བཏང་ཁྱེེད་རང་ཚོས་གསང་སྔགས་ཀྱི་ཆོས་ཟབ་ཅིང་རྒྱས་པ་ཞིག་ཏུ་ངོས་འཛིན་བྱེད་བཞིན་ཡོད་སྟབས། ངེས་པར་དུ་ཡིན་ལུགས་ཞིབ་ཚགས་ཐོག་ནས་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། བར་སྐབས་ཤིག་བོད་ནང་གསང་སྔགས་ཆོས་ལ་མོས་པ་ཆེན་པོ་བྱས་ཡོད། གསང་སྔགས་ཉམས་ལེན་བྱེད་སྐབས་འདུལ་བའི་ཉམས་ལེན་དེ་དག་རྩིས་མེད་དང་སྣང་མེད་བཏང་བར་བརྟེན། བཀའ་གདམས་གོང་མ་ཚོའི་གསུང་གྲོས་ནང་གསང་སྔགས་ལ་མཁས་བྱས་ནས་ཐེག་དམན་གྱི་ལམ་རེད་ཅེས་དམན་པར་བརྩིས་ཡོད། དེ་བཞིན་འདུལ་བ་འཛིན་པ་གཅིག་གིས་གསང་སྔགས་ཆོས་ལོག་རེད་མདོག་མདོག་ཤོད་རྒྱུ་དེ་འདྲ་ཡོང་གི་ཡོད།
དེ་རིང་ཁ་སང་ཡང་དེ་ལྟར་ཡོང་གི་འདུག གསང་སྔགས་ཀྱི་ཆོས་ཉམས་ལེན་བྱེད་མཁན་སྔགས་པ་ཡིན་ཟེར་ནས་གང་བྱུང་བྱེད་མཁན་ཡོང་བཞིན་ཡོད། གང་ལྟར་གསང་སྔགས་ཀྱི་ཆོས་ཟུང་འབྲེལ་བྱས་ནས་ཉམས་ལེན་བྱེད་རྒྱུ་གལ་ཆེན་པོ་རེད། ཅེས་གསུངས་ཡོད། ཕལ་ཆེར་ཕྱི་ལོ་ ༡༩༦༠ ནང་དུ་པ་ཊི་ཡ་ལ་གཙུག་ལག་སློབ་གཉེར་ཁང་གི་(Patiala University) སློབ་དཔོན་ཇོ་ཤི་ཞེས་པ་ཁོང་མཁས་པ་ཆེན་པོ་རེད། ཁོང་གིས་བྲིས་པའི་དེབ་ནང་རྒྱ་གར་ནང་སངས་རྒྱས་པའི་ཆོས་ཉམས་རྒུད་ཕྱིན་པའི་རྒྱུ་རྐྱེན་གསུམ་ཡོད། ༡༽ནང་པའི་དགེ་སློང་ཚོས་དགོན་པའི་ནང་རྒྱུར་དང་འདོད་བྱས་པ་དང་། མང་ཚོགས་ཀྱི་དད་གུས་བྱེད་ཤུགས་ཆུང་རུ་ཕྱིན་པ་རེད། ༢༽གསང་སྔགས་ཀྱི་ཆོས་སམ་གསང་སྔགས་ཀྱི་ཉམས་ལེན་ཤ་ལྔ་དང་བདུད་རྩི་ལྔ་སོགས་བསྟེན་རྒྱུ་དེ་གསང་སྔགས་ལ་བསྙད་འདོགས་བྱས་ནས་སྤྱོད་པ་གང་བྱུང་བྱས་རྐྱེན་མང་ཚོགས་ནས་དད་གུས་བརླག་པ་རེད། ༣༽སངས་རྒྱས་པའི་གཙུག་ལག་ཁང་དུ་དགེ་འདུན་པ་ཚོར་མཐུན་འགྱུར་བྱེད་མཁན་གྱིས་རྒྱལ་པོ་དང་བློན་པོ་གྲས་ཀྱི་དོ་སྣང་མ་བྱས་པའི་ཐོག་རྒྱབ་སྐྱོར་ཉུང་དུ་ཕྱིན་པ་བཅས་རྒྱུ་མཚན་གསུམ་བཤད་འདུག་ལ་ཁོང་དང་ངོས་རང་སྐད་ཆ་ཡང་བྱུང་།
ང་ཚོ་བོད་ལ་ཡིན་ནའང་དེའི་ཐོག་གཟབ་ནན་བྱེད་དགོས་ངེས་ཞིག་རེད། གལ་ཆེ་ཤོས་ནི་དེ་རིང་ངོས་ཀྱིས་འགྲེལ་བཤད་བརྒྱབ་པ་དེ་དག་སེམས་ནང་ངེས་པ་བྱོས། དེ་རིང་དབང་ཞུས་པའི་དགོས་དོན་དེ་མི་བཟང་པོ་ཞིག་བྱེད་དགོས་པ་རེད། ངོས་ཀྱིས་འགྲེལ་བཤད་རྒྱག་སྐབས་ཁྱེད་རང་ཚོར་ཕྲན་བུ་མགོ་རྙོག་བྱུང་ཡོད་སྲིད། དེར་བརྟེན་དེ་དག་ལ་སློབ་སྦྱོང་བྱས་ནས་ཤེས་པ་བྱེད་དགོས། ཞེས་བཀའ་སློབ་སྩལ་དང་། ལྷག་པར་མགོན་པོ་གང་ཉིད་མཆོག་གིས་ཡོངས་རྫོགས་དགེ་བསྙེན་གྱི་སྡོམ་པ་སྒྲུབ་འདོད་ཡོད་མཁན་ཚོར་སྡོམ་པ་འབོགས་ཆོག་སྩལ་ཏེ་ཉིན་གསུམ་གྱི་ཆོས་འབྲེལ་མཇུག་སྒྲིལ་མཛད་ཡོད།
