༢༠༡༣ ཟླ་ ༡༢ ཚེས་ ༣ རེས་གཟའ་མིག་དམར།

༄༅། །འདི་གར་བོད་ཀྱི་སྨན་རྩིས་ལ་དྭགས་རིག་གཞུང་བསྟི་གནས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡༢ ཚེས་ ༡ ཉིན་ལ་དྭགས་སུ་སྨན་རྩིས་ཁང་དང་ས་གནས་འཕྲོད་བསྟེན་སྨན་ཁང་མཐུན་མོང་གིས་གོ་སྒྲིག་འོག་ཨེཌ་སི་ནད་གཞི་ཁྱབ་སྤེལ་ཇི་ལྟར་འགྲོ་ཡི་ཡོད་མེད་དང་ན་ཚ་དེར་སྔོན་འགོག་ཐབས་ལམ་དང་ཟས་སྤྱོད་སྤང་བླང་ཇི་ཡིན་སོགས་ཀྱི་སྐོར་རིག་གཞུང་བསྟི་གནས་ཁང་དང་ལྕོག་ལམ་ཡན་ལག་སྨན་ཁང་། ས་གནས་འཕྲོད་བསྟེན་སྨན་ཁང་བཟུང་འབྲེལ་ཐོག་གོང་རྟོགས་ཀྱི་ལས་འགུལ་སྤེལ་འདུག

དེ་ཡང་གོང་ཚེས་ཉིན་གྱི་སྔ་དྲོ་ཚོུད་ ༩།༠༠ ཐོག་སྨན་རྩིས་རིག་གཞུང་བསྟི་གནས་ཁང་གི་ལས་བྱེད་དང་ལྕོག་ལམ་ཡན་ལག་གི་ལས་བྱེད། ས་གནས་འཕྲོད་བསྟེན་སྨན་ཁང་གི་ལས་བྱེད་བཅས་ས་གནས་འགོ་འཛིན་མདུན་ཐང་ས་གནས་འཕྲོད་བསྟེན་སྨན་ཁང་འགྲམ་དུ་ཚང་འཛོམས་ཐོག་ས་གནས་འཕྲོད་བསྟེན་སྨན་ཁང་གི་ཛ་དྲག་མྱུར་སྐྱོབ་རླང་འཁོར་ལ་འཕྲད་དར་སོགས་སྦྱར་གྲུབ་མཚམས། ཆུ་ཚོད་ ༡༠།༠༠ ཐོག་གཞིས་སྤྱི་ལས་ཁང་གི་མདུན་ཐང་ནས་འགོ་འཛུགས་ཀྱིས་ལྕོག་ལམ་གསར་ཡན་ལག་སྨན་ཁང་གི་མདུན་དང་། ལྕོག་ལམ་གསར་ནས་ཀི་ལོ་མི་ཊར་༢ ཀྱི་ཐག་རིང་ལ་ཡོད་པའི་ཟམ་པ། ཨག་གླིང་བོད་མིའི་གཞིས་ཆགས། ལྕོག་ལམ་གྲོང་གསེབ་བཅས་ལ་ཕྱིན་ནས་རྒྱང་བསྒྲགས་བརྒྱུད་ནས་ཨེཌ་སི་ཉི་མོ་ཡིན་པ་ཁྱབ་བསྒྲགས་དང་སྦྲགས་སྒྲ་འཛིན་ནང་བཅུག་ཡོད་པའི་ཨེཌ་སི་ནད་གཞི་སྐོར་ལ་དབྱིན་བོད་ཧིན་གསུམ་དང་ལ་དྭགས་སོགས་ཀྱི་སྐད་ནང་ཁྱབ་བསྒྲགས་གོ་རྟོགས་སྤེལ་བ་དང་།

དེ་བཞིན་ཨེཌ་སི་ནད་གཞིའི་རྟགས་༼Red Ribbon༽ སྦྱར་ཡིག་བཅས་མི་མང་ལ་བགོས་འགྲེམས་གནང་། སྐབས་དེར་ས་གནས་བོད་མི་དང་། གཞན་ལ་དྭགས་ཡུལ་མི་དང་རྒྱ་གར་བ་རྣམས་ཀྱིས་དོ་སྣང་ཆེན་པོ་གནང་ཡོད། དེ་ནས་ཆུ་ཚོད་ ༢།༡༥ ཙམ་ལ་ས་གནས་འཕྲོད་བསྟེན་སྨན་ཁང་གི་མདུན་དུ་འབྱོར་ནས་འཛམ་གླིང་ཨེཌ་སི་ཉིན་མོའི་སྔ་དྲོའི་ལས་རིམ་དེ་ལེགས་སྒྲུབ་ངང་ནས་འཇུག་བསྒྲིལ་གནང་། གོང་ཚེས་ཉིན་གྱི་ཕྱི་དྲོར་ས་གནས་སྨན་རྩིས་ཁང་དང་འཕྲོད་བསྟེན་སྨན་ཁང་གི་ལས་བྱེད་པས་གཉན་ནད་རེག་དུག་ཉིན་མོ་དང་འབྲེལ་བའི་སྐོར་གསུང་བཤད་གནང་ཡོད་པ་མ་ཟད། བོད་མིའི་སྒྲིགས་འཛུགས་ཀྱི་འཕྲོད་བསྟེན་ལྷན་ཁང་གིས་པར་སྐྲུན་གནང་བའི་གཉན་ནད་རེག་དུག་རྩ་མེད་བཟོ་རྒྱུའི་ཕྱོགས་སུ་སྐྱོད་དོ་ ༼Breaking the silence towards Zero HIV Community༽ཞེས་པའི་བརྙན་འཕྲིན་མི་མང་ལ་བསྟན་ཡོད་པ་བཅས།།