༢༠༡༣ ཟླ་ ༡༢ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༡ ཚེས་ ༢༩ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བ་སྨན་པ་སྐུ་ཞབས་ཌེབ་ཨིན་ཌར་སུ་ཐུ་
སྨན་པ་སྐུ་ཞབས་ཌེབ་ཨིན་ཌར་སུ་ཐུ་ལགས་ཀྱིས་ཕེབས་བསུ་ཞུ་བཞིན་པ།
Dr Devindra Sood ལགས་ཀྱིས་ཇི་ལྟར་གསོལ་འདེབས་ཞུ་དོན་ལྟར་ Eye-Q Institute of Glaucoma ཞེས་པའི་མིག་གི་སྨན་ཁང་གསར་པ་ཞིག་དབུ་འབྱེད་མཛད་ཡོད།
གཞན་ཡང་གོང་ཚེས་ཉིན་གྱི་ཉིན་གུང་ལྗགས་སྨིན་གྲུབ་རྗེས་༸གོང་ས་མཆོག་གིས་
རྣམ་རྒྱལ་གྲྭ་ཚང་ཆོས་ཚོགས་ནང་སློབ་གཉེར་གནང་བཞིན་པའི་ཕྱི་རྒྱལ་སློབ་ཕྲུག་ཁག་གཅིག་དང་ལྷན།
ཨ་རིའི་ཨི་ཐ་ཁའི་ Ithaca མངའ་སྡེའི་ནང་རྟེན་གཞི་བྱས་པའི་རྣམ་རྒྱལ་གྲྭ་ཚང་ཆོས་ཚོགས་ནང་སློབ་གཉེར་གནང་བཞིན་པའི་ཕྱི་རྒྱལ་སློབ་ཕྲུག་ཁག་གཅིག་ལ་མཇལ་ཁ་དང་བཀའ་སློབ་སྩལ་དོན། རྒྱ་གར་ནང་འདས་པའི་ལོ་ངོ་ ༣༠༠༠ ལྷག་རིང་ཆོས་ལུགས་མཐུན་སྒྲིལ་ལག་བསྟར་བྱེད་སྲོལ་ཡོད་པར་བརྟེན་ཆོས་ལུགས་མཐུན་སྒྲིལ་དང་། ཆོས་ཁས་མི་ལེན་མཁན་ཚོ་ལའང་གུས་བརྩི་ཞུ་རྒྱུའི་སྲོལ་བཟང་ཞིག་ཡོད་པ་འདི་དེང་སྐབས་ཀྱང་འབྲེལ་བ་ཡོད་པ་མ་ཟད།
ཧ་ཅང་ཕན་ཐོགས་ཆེན་པོ་དང་གཞན་གྱིས་བསྔགས་བརྗོད་འཐོབ་བཞིན་ཡོད། འཛམ་གླིང་མི་འབོར་ཐེར་འབུམ་བདུན་ཡོད་ཁོངས་ནས་ཐེར་འབུམ་གཅིག་ཙམ་གྱིས་ཆོས་ལ་ངོ་རྒོལ་བྱས་པའམ་ཆོས་ཁས་ལེན་བྱེད་ཀྱི་མེད། འོན་ཀྱང་ཆོས་ཁས་ལེན་བྱེད་མཁན་མི་འབོར་ཐེར་འབུམ་དྲུག་ཙམ་ཡོད་པ་ཚང་མས་ལྷག་བསམ་རྣམ་དག་ཐོག་ནས་ཆོས་ཉམས་ལེན་བྱེད་མཁན་ཡིན་པའི་ཁུངས་སྐྱེལ་གསལ་པོ་གང་ཡང་མེད། ཅེས་སོགས་ཀྱི་བཀའ་སློབ་སྩལ།
འཇར་མ་ནིའི་གསར་འགོད་པ་ལྕམ་སྐུ་ཌོ་རོ་ཐི་ཡ་རེ་ཀར་ལགས་ཀྱི་ཆེད་དོན་དྲི་བར་བཀའ་ལན་མཛདབཞིན་པ།
དེ་རྗེས་༸གོང་ས་མཆོག་གིས་འཇར་མན་ Germany ཡུལ་གྱི་བདུན་རེའི་གསར་ཤོག་གྲགས་ཆེ་ཤོས་གསུམ་པ་ཕོ་ཁོ་སི་ Focus ཞེས་པའི་གསར་འགོད་པ་ལྕམ་སྐུ་ཌོ་རོ་ཐི་ཡ་རེ་ཀར་ Mrs Dorothea Rieckerལགས་ཀྱི་ཆེད་དོན་དྲི་བར་བཀའ་ལན་མཛད། སྐབས་དེར་༸གོང་ས་མཆོག་གིས་ཡི་ཤུའི་བླ་ཆེན་པོབ་གསར་པ་སྐུ་ཞབས་ཕ་རན་སི་ Pope Francis མཆོག་ནི་ཆོས་ཀྱི་དབུ་ཁྲིད་ཕུལ་བྱུང་ཞིག་ཡིན་པར་ཡིད་ཆེས་མཛད་བཞིན་པ་དང་།
ང་སྐབས་ཆོས་ལུགས་དབུ་ཁྲིད་འགའ་ཤས་ཀྱིས་སོ་སོའི་ཆོས་ལུགས་དང་འབྲེལ་བའི་གནད་དོན་ཁོ་ན་མ་གཏོགས་སྤྱི་ཡོངས་ཀྱི་གནས་སྟངས་ཐོག་གཟིགས་ཕྱོགས་འཛིན་གྱི་མེད་པ་ནི་ཕྲན་བུ་བློ་སྦུག་དོག་པའི་སྐྱོན་ཡིན་པ་དང་། གནང་ཕྱོགས་དེ་དག་ནི་དུས་ཚོད་ཡོལ་ཚར་བའི་ལམ་སྲོལ་རྙིང་པ་ཞིག་ཆགས་ཡོད་པ་དང་། དེང་སྐབས་སྤྱི་ཚོགས་ནང་དངོས་ཡོད་གནས་སྟངས་ལ་གཞིགས་ཏེ་ང་ཚོས་དྲང་པོ་དྲང་ཤག་དང་ཁ་རེ་ཁར་ཐུག་བྱ་རྒྱུ་གལ་ཆེན་པོ་ཡིན་པ་ལས་ཆོས་ཁས་ལེན་མིན་ཟེར་བ་ནི་མི་སྒེར་གྱི་རང་དབང་ཡིན། དེར་བརྟེན་ཆོས་ཁས་ལེན་མིན་ནི་རང་མོས་ཡིན། གལ་ཏེ་ཆོས་ཁས་ལེན་རྗེས་ཉམས་ལེན་ཚུལ་བཞིན་བྱེད་དགོས་སྐོར་བཀའ་ལན་སྩལ།
དེ་རྗེས་ཆོས་ལུགས་ཕན་ཚུན་བཟོད་བསྲན་དང་འཛམ་གླིང་ཞི་བདེའི་སྐོར་གྱི་དྲི་བར་བཀའ་ལན་སྩལ་དོན། ང་ཚོས་འཛམ་གླིང་གི་དཀའ་ངལ་རྣམས་འཚེ་མེད་ཞི་བའི་ཐབས་ལམ་ཐོག་ནས་སེལ་ཐུབ་མིན་གང་ཡིན་རུང་ཚོད་ལྟ་ཞིག་ངེས་པར་དུ་བྱེད་དགོས། སྤྱི་ཚོགས་ནང་གཞན་ལ་མགོ་སྐོར་གཏོང་རྒྱུ་དང་མི་གཞན་བཀོལ་ནས་རང་ཉིད་ཀྱི་ཁེ་ཕན་བསྒྲུབ་རྒྱུའི་ཀུན་སློང་འཁྱེར་བ་ཡིན་ན་རང་ཉིད་ཕུགས་ལ་ཕན་རྒྱུ་གང་ཡང་མེད་པར་བརྟེན་དེ་འདྲ་སུས་ཀྱང་མི་འདོད།
དེར་བརྟེན་ང་ཚོས་སྤྱི་ཚོགས་ནང་བྱམས་བརྩེ་གོང་འཕེལ་བཏང་སྟེ་བྱམས་སྙིང་རྗེ་ལྡན་པའི་སྤྱི་ཚོགས་ཤིག་བསྐྲུན་ཐུབ་ན་རང་གཞན་ཚང་མར་ཕན་ཐོགས་ཡོད། ངོས་རང་ནང་པའི་དགེ་སློང་ཞིག་ཡིན་པར་བརྟེན་ཆོས་ལུགས་ཚང་མས་བྱམས་པ་དང་བཟོད་བསྲན་སོགས་བཟང་པོའི་རིན་ཐང་ཐོག་བསླབ་བྱ་ཡོད་པ་ཤེས་ཀྱི་ཡོད། དེར་བརྟེན་ཆོས་ལུགས་ཕན་ཚུན་འཆམ་མཐུན་གོང་འཕེལ་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་བཀའ་ལན་སྩལ།
