༢༠༡༣ ཟླ་ ༡༡ ཚེས་ ༡༥ རེས་གཟའ་པ་སངས།
སྐུ་པར་ཉི་ཧོང་དོན་ཁང་ནས་མཐུན་འགྱུར་གནང།
༄༅། །འདི་གར་ཆེད་གཉེར་གསར་འགོད་པ་པདྨ་ཚེ་རིང་ལགས་ཀྱིས་ཉི་ཧོང་ནས་བཏང་གནས་ནང་འཁོད་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་ནང་བདུན་ཕྲག་གཉིས་རིང་གི་མཛད་འཕྲིན་བསྐྱངས་ཆེད་ཕྱི་ལོ་ ༢༠༡༣ ཟླ་ ༡༡ ཚེས་ ༡༥ ཉིན་གྱི་སྔ་དྲོའི་ཆུ་ཚོད་ ༧།༣༠ ཐོག་ཉི་ཧོང་ན་རི་ཏ་རྒྱལ་སྤྱིའི་གནམ་ཐང་དུ་༸ཞབས་སོར་བདེ་བར་འཁོད་སྐབས་སྐུ་ཚབ་དོན་གཅོད་མཚོ་མགོ་ལྷག་པ་ལགས་དང་ལས་བྱེད་རྣམ་པ། དེ་བཞིན་ཆིབས་སྒྱུར་གསོལ་འདེབས་ཞུ་མཁན་ Kyoto Seika University ཀི་ཡོ་ཊོ་སེ་ཀ་གཙུག་ལག་སློབ་ཁང་གི་འཛིན་སྐྱོང་འགན་འཛིན། གཞན་ཡང་དད་ལྡན་ཉི་ཧོང་བ་དང་མགོན་པོ་གང་ཉིད་མཆོག་གི་ཐུགས་ཉེའི་གྲོགས་པོ་ཁག་གཅིག་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
སྐུ་པར་ཉི་ཧོང་དོན་ཁང་ནས་མཐུན་འགྱུར་གནང།
སྐབས་དེར་གསར་འགོད་པ་ཁག་གཅིག་གིས་ཆིབས་སྒྱུར་དང་འབྲེལ་བའི་སྐོར་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། ངོས་རང་ས་ཕྱོགས་གང་དུ་བསྐྱོད་ཀྱང་འགྲོ་བ་མི་དུང་ཕྱུར་བདུན་བཅུའི་ཆ་ཤས་ཤིག་ཡིན་པར་བརྟེན་འགྲོ་བ་མིའི་རྒྱུད་ཀྱི་བཟང་སྤྱོད་ཀྱི་རིན་ཐང་གོང་མཐོར་གཏོང་ཐབས་བྱེད་བཞིན་ཡོད། ཕྱོགས་མཚུངས་ངོས་རང་ཆོས་པ་ཞིག་ཡིན་པའི་ཆ་ནས་འཛམ་གླིང་ནང་ཆོས་ལུགས་འདྲ་མིན་ཡོད་པ་རྣམས་ཕན་ཚུན་འཆམ་མཐུན་གོང་འཕེལ་གཏོང་རྒྱུའི་ལས་འགན་ཐོག་ཤུགས་རྒྱག་བཞིན་ཡོད།
དེར་བརྟེན་དེ་རིང་ངོས་རང་འདིར་ཡོང་རྒྱུའི་དམིགས་ཡུལ་གཙོ་བོ་ནི་གནད་དོན་དེ་གཉིས་ཐོག་ཡིན་པ་ལས་ཆབ་སྲིད་ཀྱི་དོན་དུ་མིན། ངོས་རང་ལོ་གཉིས་གོང་ནས་བོད་མིའི་ཆབ་སྲིད་ཀྱི་འགན་དབང་ནས་བགྲེས་ཡོལ་ཆ་ཚང་ཞུས་ཟིན་སྟབས་ཆབ་སྲིད་དང་འབྲེལ་བའི་ལས་དོན་གང་ཡང་སྤེལ་གྱི་མེད། ཅེས་བཀའ་ལན་སྩལ་བ་མ་ཟད། ཐེངས་འདིར་ཉི་ཧོང་དུ་སློབ་ཕྲུག་དང་མང་ཚོགས་བཅས་ལ་བཀའ་སློབ་སྩལ་གནང་མཛད་རྒྱུ་དང་། ལོ་ངོ་ ༣༠ གོང་ནས་མགོན་པོ་གང་ཉིད་མཆོག་གིས་ཐུགས་ཁུར་ཆེ་བཞེས་མཛད་པའི་ཚན་རིག་པ་དང་ལྷན་བགྲོ་གླེང་མཛད་རྒྱུའི་མཛད་འཕྲིན་ཁག་གཅིག་ཡོད་སྐོར་བཀའ་ལན་སྩལ་ཡོད།
སྐུ་པར་ཉི་ཧོང་དོན་ཁང་ནས་མཐུན་འགྱུར་གནང།
དེ་རྗེས་ ༸གོང་ས་མཆོག་གནམ་ཐང་ནས་ཐད་ཀར་ན་རི་ཊ་ཧིལ་ཊོན་ Hilton Hotel གསོལ་མགྲོན་ཁང་དུ་ཆིབས་སྒྱུར་གྱིས་གསོལ་མགྲོན་ཁང་དུ་དེ་རིང་ཉིན་རྒྱབ་ཉི་ཧོང་རྒྱལ་ཡོངས་བརྙན་འཕྲིན་བརྒྱུད་ལམ་གྲགས་ཆེ་བ་ཞིག་གིས་ཆེད་དོན་དྲི་བར་དང་ལེན་མཛད་རྒྱུ་ཡིན་འདུག ཕྱི་ཚེས་ ༡༦ ཉིན་༸གོང་ས་མཆོག་གིས་ཚུ་ད་ནུ་མ་ Tsudanuma ཞེས་པའི་ས་གནས་སུ་འཕྲུལ་རིག་བསྟི་གནས་ཁང་ཞིག་ཡོད་པ་དེར་ཆིབས་སྒྱུར་བསྐྱངས་རྒྱུ་ཡིན་འདུག
ཐེངས་འདིའི་ཆིབས་སྒྱུར་དང་འབྲེལ་བའི་སྐོར་ཉི་ཧོང་སྐུ་ཚབ་དོན་གཅོད་མཚོ་མགོ་ལྷག་པ་ལགས་ལ་བཅར་འདྲི་ཞུས་པར་ཁོང་གིས་གསུང་དོན།
སྐུ་པར་ཉི་ཧོང་དོན་ཁང་ནས་མཐུན་འགྱུར་གནང།
ད་རེས་ཆིབས་སྒྱུར་གསོལ་འདེབས་ཞུ་མཁན་ནི་ Kyoto Seika University ཀི་ཡོ་ཊོ་སེ་ཀ་གཙུག་ལག་སློབ་ཁང་དང་། ཉི་ཧོང་སྐུ་ཚབ་དོན་གཅོད་ཁང་འམ་ཉི་ཧོང་བོད་ཁང་ Tibet House-Japan གཉིས་རེད། ཐེངས་འདིར་༸གོང་ས་མཆོག་གིས་ཉི་ཧོང་ནང་ཕྱི་ཟླ་ ༡༡ ཚེས་ ༢༦ བར་མཛད་འཕྲིན་རྒྱ་ཆེ་བསྐྱང་རྒྱུ་རེད། ཅེས་གསུངས། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་ཐོག་མར་ཕྱི་ལོ་ ༡༩༦༧ ལོར་ཆིབས་སྒྱུར་བསྐྱངས་པ་དང་། དེ་ནས་་ད་བར་ཡུལ་དེར་ཆིབས་སྒྱུར་ཐེངས་ ༡༩ བསྐྱངས་ཡོད་པ་བཅས།
