༢༠༡༣ ཟླ་ ༡༡ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༢༦ དང་ཟླ་ ༡༡ ཚེས་ ༢ ཉིན་དོལ་རྒྱལ་ཚོགས་པའི་དྲྭ་རྒྱའི་གསར་འགོད་པ་མེ་ལི་ས་སནྜི་ (Melisa Sands) དང་། ཀའེ་ (Kay Beswick) བྷེ་སེ་ཝིག་གཉིས་ཀྱིས་དོལ་རྒྱལ་ཚོགས་པའི་དྲྭ་རྒྱ་(http://www.dorjeshugden.com/all-articles/news/update-abbots-urgently-sent-to-the-usa/) ཐོག་
“མཁན་པོ་ཨ་རིར་ཛ་དྲག་བཏང་བ།” ཞེས་འགོ་བརྗོད་དུ་འཁོད་པའི་འཁྱོག་བཤད་ལ་དགའ་ལྡན་ཤར་རྩེ་གྲྭ་ཚང་མཁན་པོ་བྱང་ཆུབ་ཆོས་ལྡན་རིན་པོ་ཆེ་མཆོག་གིས་ཕྱི་ལོ་ ༢༠༡༣ ཟླ་ ༡༡ ཚེས་ ༥ ཉིན་ལན་འདེབས་གསལ་བཤད་གནང་དོན།
༅༅།། བརྩེ་ལྡན་མེ་ལི་ས་སནྜི་ལགས་དང་། ཀའེ་ བྷེ་སེ་ཝིག་རྣམ་གཉིས་ལ།
རྣམ་པ་གཉིས་སྐུ་ཁམས་གསལ་ཐང་དང་བདེ་ཞིང་སྐྱིད་ལ་དར་རྒྱས་ངང་བཞུགས་ཡོད་པའི་རེ་སྨོན་ཡོད། ཕྲན་གྱིས་ཡི་གེ་འདི་རྣམ་པ་ཚོས། ༢༠༡༣ ཟླ་བ་ ༩ ཚེས་ ༢༦ ཉིན་དྲྭ་ལམ་དུ་བཀོད་ཅིང་། ཟླ་བ་ ༡༡ ཚེས་ ༢ ཉིན་བསྐྱར་བཅོས་བྱས་པའི་གཞི་མེད་ཀྱི་གནས་ཚུལ་ “མཁན་པོ་ཨ་རིར་ཛ་དྲག་ངང་བཏང་བ།” ཟེར་བ་དེར། ལན་འདེབས་གསལ་བཤད་ཀྱི་ཚུལ་དུ་འབུལ་གྱི་ཡོད།
ཕྲན་གྱི་བསམ་པར་འདི་ནི། ཁུངས་མེད་ལོག་བཤད་གསལ་པོ་བཟོས་ཏེ་མང་ཚོགས་ཀྱིས་གནས་ཚུལ་དངོས་ཤེས་རྟོགས་ཐུབ་པ་བཟོ་བའི་དུས་ཚོད་རན་ཤོས་རེད་སྙམ། དེར་བརྟེན་རྣམ་པ་ཚོས་གཞི་མེད་ཀྱི་གནས་ཚུལ་སྤེལ་ཏེ་མང་ཚོགས་ལོག་ལམ་ལ་མ་འཁྲིད་རོགས། མང་ཚོགས་ནང་གནས་ཚུལ་མ་སྤེལ་གོང་ཉུང་མཐར་དུས་ཚོད་ཕྲན་བུ་བཏང་སྟེ། གནས་ཚུལ་ཁུངས་བཙན་ཤེས་ཐབས་གནང་རོགས་ཞེས་ཞུ་གི་ཡོད།
ཁྱེད་ཚོས་སྤེལ་བའི་གནས་ཚུལ་ནང་། ༢༠༡༣ ཟླ་ ༡༡ ཚེས་ ༢ ཉིན་དུམ་བུ་ཐ་མ་ཞིག་གསར་སྣོན་བྱས་པར་ཐུགས་རྗེ་ཆེ། དུམ་མཚམས་དེ་ངས་ཁྱེད་ཚོའི་ས་ནས་དངོས་གྲུབ་ཆེན་པོ་ཞིག་ཐོབ་པ་ལྟར་དགའ་སྤྲོ་ཆེན་པོས་ཀློག་པ་ཡིན།
༡) ༸གོང་ས་༸སྐྱབས་མགོན་ཆེན་པོ་མཆོག་དང་། ཁྲི་བྱང་མཆོག་སྤྲུལ་རིན་པོ་ཆེ་གཉིས་ཀྱི་འབྲེལ་བའི་སྟོང་ཆའི་ཐད། ཕྲན་དང་དགའ་ལྡན་དགོན་པའི་ཕྱག་སྦྲེལ་ཚོར་སེམས་འཚབ་ཆེན་པོ་ཡོད་པ་དེས་ཀུན་ནས་བསླངས་ཏེ། སྟོང་ཆ་དེ་སེལ་ཐབས་ཞུས་ཀྱང་དོན་འབྲས་མ་སོན་པར་བློ་ཕམ་ཆེ།
༢) སྐུ་སྒེར་ཡིག་ཚང་ངམ་གང་ཟག་སུ་ཞིག་གིས་ཀྱང་ཕྲན་ལ་ཁྲི་བྱང་རིན་པོ་ཆེ་ས་གནས་སམ་ལས་རིམ་གང་ཞིག་གི་ནང་མཉམ་ཞུགས་ཆེད་ཕྱིར་ཕེབས་ཡོང་བའི་གསོལ་འདེབས་ཞུ་དགོས་ཀྱི། བཀའ་དང་བསྐོ་བཞག་གནང་རིགས་གཏན་ནས་མ་བྱུང་། ཕྲན་སྒེར་ངོས་ནས་དང་། དགའ་ལྡན་དགོན་པའི་མཁན་པོ་ཡིན་པའི་ཆ་ནས་དང་བས་ཀུན་ནས་བསླངས་ཏེ་ཁྲི་བྱང་མཆོག་སྤྲུལ་རིན་པོ་ཆེ་ཞལ་མཇལ་ཏེ་གསུང་མོལ་ཞུས་པ་ཡིན། ཁྲི་བྱང་མཆོག་སྤྲུལ་རིན་པོ་ཆེས་ཀྱང་ཐུགས་བརྩེ་བ་ཆེན་པོས་གཟིགས་ཏེ། ཕྲན་ལ་གང་དང་མཉམ་བཅར་ཐོག་བཀའ་མོལ་ཞུ་རྒྱུའི་དུས་ཚོད་འབེལ་འབེལ་ལྷུག་ལྷུག་གནང་བྱུང་། ངེས་པར་ཐུགས་སྣང་མཛད་དགོས་པ་ཞིག་ལ། སྐུ་སྒེར་ཡིག་ཚང་གིས་ཕྲན་ཁྲི་བྱང་མཆོག་སྤྲུལ་རིན་པོ་ཆེ་མཇལ་ཆེད་སྐུ་ཚབ་ཏུ་མངགས་པའམ་བསྐོ་བཞག་གནང་རིགས་གཏན་ནས་མ་བྱུང་།
༣) ཕྲན་གྱི་ངོས་ནས་ཁྲི་བྱང་རིན་པོ་ཆེ་མཇལ་སྐབས། ཁོང་གི་ངོས་ནས་དོལ་རྒྱལ་གྱི་གནད་དོན་ལ་འཛིན་པའི་ལངས་ཕྱོགས་ཐད། གལ་ཆེའི་གནས་ལུགས་རྒྱུ་མཚན་ཁག་ལ་དགོངས་ཏེ། ཡང་བསྐྱར་དགོངས་བཞེས་གནང་དགོས་པའི་རེ་སྐུལ་ཞུས་པ་ཡིན། ཕྲན་གྱི་རེ་སྐུལ་ལ། ཁོང་གིས་ཡིན་མིན་གང་ཡང་མ་གསུངས་ཀྱང་། དགའ་ལྡན་དགོན་པས་ཁོང་“བརྗེད་པ་”རེད་ཅེས་རྩ་བ་ནས་གསུངས་མ་བྱུང་།
༤) ཕྱི་ལོ་ ༢༠༠༨ ལོར་སྐྱེ་བོ་ཁ་ཤས་དགའ་ལྡན་དགོན་པ་དང་ཤར་རྩེ་གྲྭ་ཚང་ནས་ཅིའི་ཕྱིར་ཇི་ལྟར་ཁ་བྲལ་བ་ཚང་མས་ཤེས་པའི་གནས་ཚུལ་ཞིག་རེད། དེར་བརྟེན་ལོ་ལྔ་ལས་མ་སོང་བའི་དུས་ཐུང་ནང་གནས་ཚུལ་འཁྱོག་བཤད་བྱས་ཏེ་བདེན་དོན་ལ་འགྱུར་བ་གཏོང་ཐུབ་ཀྱི་མ་རེད། དོན་དངོས་གནས་ཚུལ་ནི་སྐྱེ་བོ་ཁ་ཤས་ཤིག་གིས་རང་སྒེར་གྱི་འདོད་པ་དང་ཁེ་ཕན་དབང་གིས་དགོན་པ་བསྐྱུར་རྒྱུ་བདམས་ཏེ་འགྲོ་སྐབས། དགོན་པས་ཁོང་ཚོ་བཀག་མ་ཐུབ་པའི་གནས་ཚུལ་སྟབས་བདེ་དེ་ཙམ་རེད།
༥) ཕྲན་སྒེར་ངོས་ནས་དང་དགའ་ལྡན་དགོན་པའི་མཁན་པོ་ཡིན་པའི་ཆ་ནས་ཨ་རིའི་ཡུལ་ཝེག་མོན་ཊིར་ཁྲི་བྱང་མཆོག་སྤྲུལ་རིན་པོ་ཆེ་མཇལ་བར་དགའ་ལྡན་ཤར་རྩེ་དང་བླ་སྤྱིའི་ཕྱག་བྲིས་དང་བཅས་ཏེ་བསྐྱོད་པ་ཡིན་སྟབས། སྐུ་སྒེར་ཡིག་ཚང་ལ་ཕུལ་བའི་ཡིག་ལན་དེ་ཚོར་ཕྲན་ལྟོས་དགོས་དོན་ཅི་ཞིག་ཡོད། འདི་ནི་གནས་ཚུལ་སྤེལ་མཁན་གྱི་སྨྱོ་བཤད་རང་རེད། ཁྲི་བྱང་མཆོག་སྤྲུལ་རིན་པོ་ཆེས་༸གོང་ས་༸སྐྱབས་མགོན་ཆེན་པོ་མཆོག་དང་རྡ་རམ་ས་ལའི་དབུས་བོད་མིའི་སྒྲིག་འཛུགས་ལ། གློག་འཕྲིན་གང་འདྲ་ཞིག་འབུལ་གནང་རྩིས་ཡོད་མེད་ཕྲན་ལ་ཤེས་རྟོགས་གང་ཡང་མེད།
༦) དགའ་ལྡན་བླ་སྤྱི་དང་དགའ་ལྡན་བྱང་རྩེའི་ལས་ཤོག་གི་ཐོག་ཏུ་སྙན་ཞུ་བྲིས་པར་ཡ་མཚན་དགོས་དོན་ཅི་ཞིག་ཡོད་དམ། དགའ་ལྡན་དགོན་པའི་མཁན་པོ་བགྲེས་པ་ཡིན་པའི་ཆ་ནས། ཕྲན་གྱིས་དགའ་ལྡན་བླ་སྤྱི་མཚོན་ལ། དགའ་ལྡན་ཤར་རྩེ་གྲྭ་ཚང་གི་མཁན་པོ་ཡིན་པའི་ཆ་ནས་ཕྲན་གྱིས་ཤར་རྩེ་གྲྭ་ཚང་མཚོན་གྱི་ཡོད། སྒྲིག་འཛུགས་འདི་གཉིས་ཀྱི་ཞུ་སྙན་ནི་དེ་གཉིས་ཀྱི་ལས་ཤོག་ཐོག་འབུལ་དགོས་སྟབས། སྐུ་སྒེར་ཡིག་ཚང་གི་ལས་ཤོག་ཐོག་ཏུ་ཅིའི་ཕྱིར་དགོས་སམ། ༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་ཁྲི་བྱང་མཆོག་སྤྲུལ་རིན་པོ་ཆེ་ས་གནས་གང་ཞིག་ཏུ་ལོག་ཕེབས་དགོས་པའི་རེ་སྐུལ་གནང་དགོས་མེད། ༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་སྐུ་ངལ་བཞེས་པ་ལ་བརྟེན་ནས་བློ་ཡུལ་ལས་འགོང་པའི་གྲུབ་འབྲས་ཆེན་པོ་ཐོབ་ཡོད་སྟབས། སྐྱེ་བོ་གང་ཞིག་ལོག་དང་མ་ལོག་གིས་ཁོང་ལ་ཁྱད་པར་གང་ཡང་བཟོ་གི་མ་རེད། དེར་བརྟེན་གཞི་མེད་ཀྱི་གནས་ཚུལ་སྤེལ་ཏེ་མང་ཚོགས་ལོག་ལམ་དུ་མ་འཁྲིད་རོགས།
༧) ཁྲི་བྱང་མཆོག་སྤྲུལ་རིན་པོ་ཆེ་མཆོག་དང་༸གོང་ས་༸སྐྱབས་མགོན་ཆེན་པོ་མཆོག་དབར་གྱི་འབྲེལ་བ་བསྐྱར་གསོ་ཡོང་ཐབས་བྱ་དགོས་པ་ང་ཚོས་ཧ་ཅང་གལ་ཆེར་མཐོང་གི་ཡོད། ལོ་རྒྱུས་མི་སྣ་འདི་གཉིས་ཀྱི་དད་དམ་ཚེ་རབས་མང་པོར་སྦྲེལ་བ་ཞིག་ཡིན་སྟབས། ད་ལྟ་དེ་ལ་སེལ་ཞུགས་བཅུག་ན་ཡག་པོ་མེད་པར་ང་ཚོས་ཡིད་ཆེས་བྱེད་ཀྱི་ཡོད། དེར་བརྟེན། ཕྲན་དང་ཕྲན་གྱི་ཕྱག་སྦྲེལ་ཚོས། ༸གོང་ས་༸སྐྱབས་མགོན་ཆེན་པོ་མཆོག་གིས་སེ་རྭ་དགོན་པར་རིང་མིན་བཀའ་ཆོས་གནང་སྐབས། ཁྲི་བྱང་མཆོག་སྤྲུལ་རིན་པོ་ཆེ་བཅར་ཐབས་བྱུང་ན་གང་ལེགས་ཡོང་ངེས་སྙམ་སྟེ། ང་ཚོ་རང་འགུལ་རང་གི་ཐོག་ནས་ཁྲི་བྱང་རིན་པོ་ཆེ་མཇལ་མོལ་ཞུ་འཆར་བསྒྲིགས་པ་ཡིན། ཁྲི་བྱང་མཆོག་སྤྲུལ་རིན་པོ་ཆེ་རིང་མིན་སེ་རྭའི་བཀའ་ཆོས་ལ་བཅར་དང་མི་བཅར་གྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཁྱད་པར་གང་ཡང་བཟོ་གི་མ་རེད། ཕྲན་དང་ཕྲན་གྱི་ཕྱག་སྦྲེལ་ཚོར་མཚོན་ན། གལ་ཆེ་ཤོས་ཀྱི་གནད་དོན་ནི་སྐྱེ་བོ་དམ་པ་འདི་གཉིས་ཀྱི་འབྲེལ་ལམ་བསྐྱར་གསོ་བྱ་རྒྱུ་དེ་ཡིན།
འོན་ཀྱང་སྐྱེ་བོ་འགའ་ཞིག་གིས་ང་ཚོའི་ཀུན་སློང་བཟང་པོའི་བྱ་བ་དེ་མཚམས་འཇོག་དང་བར་ཆད་ཡོང་ཐབས་སྒོ་ཀུན་ནས་བྱེད་པ་མཐོང་བས། དེ་ལ་བློ་ཕམ་ཧ་ཅང་ཆེན་པོ་བྱུང་། ཨ་རིའི་ཁེ་ལི་ཧྥོར་ནི་ཡ་མངའ་སྡེའི་ས་གནས་ཏོ་པན་ག་ནས། (Topanga Park CA,US) དགའ་ལྡན་ཤར་རྩེ་མཁན་པོས། ཞེས་འཁོད་ཡོད།།
