༢༠༡༣ ཟླ་ ༡༡ ཚེས་ ༡༨ རེས་གཟའ་ཟླ་བ།
༄༅། ཕྱི་ལོ་ ༢༠༡༣ ཟླ་ ༡༡ ཚེས་ ༡༨ ཉིན་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། རྒྱ་ནག་དམར་པོའི་གཞུང་གིས་བོད་ས་ཁྱོན་ཡོངས་ལ་བོད་མིའི་ཐོག་གདུག་རྩུབ་ཅན་གྱི་སྲིད་བྱུས་ངན་པ་སྤེལ་བཞིན་ཡོད་པར་བརྟེན། ཕྱི་ལོ་ ༢༠༡༣ ཕྱི་ཟླ་ ༡༡ ཚེས་ ༡༡ ཉིན་བོད་ནང་གི་ཕྱི་དྲོ་ཆུ་ཚོད་ལྔ་པ་ཡས་མས་སུ་མདོ་སྨད་མགོ་ལོག་པདྨ་རྫོང་ཇོ་ནང་ཨ་སྐྱོང་དགོན་པའི་དགེ་འདུན་པ་ཚེ་རིང་རྒྱལ་ལགས་ཀྱིས་རང་གི་གཅེས་པའི་ལུས་སྲོག་མེར་སྲེག་གིས་རྒྱ་གཞུང་གི་གདུག་རྩུབ་ཆེ་བའི་སྲིད་བྱུས་ལ་ཞི་རྒོལ་གནང་ནས་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ས་གནས་བོད་རིགས་ཚོགས་པ་མཐུན་མོང་ནས་ཕྱི་ཟླ་ ༡༡ ཚེས་ ༡༧ ཉིན་གྱི་ཕྱི་དྲོ་ཆུ་ཚོད་ ༦།༣༠ ནས་ ༨།༠༠ བར་རྒྱལ་གཅེས་པ་ཚེ་རིང་རྒྱལ་ལགས་དམ་པ་གང་དེ་ཉིད་ཀྱིས་གཙོས་པའི་རྒྱལ་གཅེས་པ་ཕོ་མོ་འདས་གསོན་ཡོངས་ལ་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཞིག་ཐེ་ཝན་བོད་ཀྱི་སྐུ་ཚབ་དོན་ཁང་གི་ནང་ཆོས་འཛིན་ཁང་དུ་ཚོགས་གནང་ཡོད།
དེ་ཉིན་ཐེ་ཝན་ནང་བོད་ཀྱི་ཆོས་བརྒྱུད་རིས་མེད་ཁག་གི་བླ་སྤྲུལ་དགེ་འདུན་རྣམ་པ་དང་། ཐེ་ཝན་དུ་ཡོད་པའི་བོད་མི་བཅས་མི་གྲངས་བཞི་བཅུ་ཙམ་མཉམ་འཛོམས་ཀྱིས་སྨོན་ལམ་གསུང་འདོན་དང་། མ་ཎི་ཡིག་དྲུག་སོགས་གསོག་སྒྲུབ་གནང་ཡོད། སྨོན་ལམ་མཇུག་སྒྲིལ་རྗེས་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་བོད་མི་རྣམས་འཆམ་མཐུན་ཡོང་བའི་དམ་བཅའ་བཞག་ཐུབ་པ་ཡིན་ན་རང་ལུས་མེར་སྲེག་གནང་མཁན་རྣམ་པའི་སྐུ་ལུས་ཆུད་ཟོས་སུ་འགྲོ་གི་ཡོད་པ་མ་རེད་བསམ་གྱི་འདུག་ན བོད་མི་ཚང་མས་མཐུན་ལམ་དང་འབད་བརྩོན་གནང་དགོས་པའི་འབོད་སྐུལ་གསུང་བཤད་གནང་རྗེས། ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ཐེ་ཝན་ནང་བོད་ཀྱི་ནང་ཆོས་ལ་བདེན་པ་མིན་པའི་མཚན་སྨད་སྐུར་འདེབས་བྱེད་མཁན་གྱི་ཚོགས་པ་ཁག་ནས་ཁྲིམས་གཏུགས་བྱས་པར་དོན་གཅོད་ལས་ཁུངས་ལ་ཁྲིམས་ཀྱི་རྒྱལ་ཁ་ཐོབ་པ་ཁག་ངོ་སྤྲོད་གསལ་བཤད་བཅས་གནང་ནས་སྨོན་ལམ་གསུང་འདོན་གྲོལ།
