༢༠༡༣ ཟླ་ ༡༡ ཚེས་ ༢༢ རེས་གཟའ་པ་སངས།
༄༅།། ཕྱི་ལོ་ ༢༠༡༣ ཟླ་ ༡༡ ཚེས་ ༡༦ ཉིན་བོད་ཀྱི་ཁམས་ལི་ཐང་དགོན་ཆེན་བྱམས་ཆེན་ཆོས་འཁོར་གླིང་གི་འདུ་ཁང་ལ་མེ་སྐྱོན་བྱུང་སྟེ་དགོན་པའི་རྟེན་དང་བརྟེན་པར་གནོད་སྐྱོན་ཚབས་ཆེན་ཕོག་པའི་ཡིད་སྐྱོའི་གནས་ཚུལ་བྱུང་ཡོད་པར། བོད་མིའི་སྒྲིག་འཛུགས་ཀྱི་སྤྱི་ཁྱབ་འགན་འཛིན་བཀའ་ཤག་གི་ངོས་ནས་ལི་ཐང་དགོན་ཆེན་གྱི་མཁན་བླ་འདུས་མང་དང་། གཞན་ཡང་ལི་ཐང་དགོན་ཆེན་དང་འབྲེལ་ཆགས་གཞིས་བྱེས་གཉིས་སུ་འཁོད་པའི་ལྷ་སྡེ་མི་སྡེ་ཡོངས་ལ་སེམས་ཚོར་ཆེན་པོའི་ངང་ནས་ཐུགས་གསོ་ཞུ་རྒྱུ་དང་། དགོན་པའི་རྟེན་དང་བརྟེན་པ་བཅས་པར་གནོད་སྐྱོན་གོད་ཆགས་ཇི་ཕོག་རྣམས་མྱུར་དུ་སླར་གསོ་ཐུབ་པ་དང་། ལྷག་པར་ལི་ཐང་དགོན་ཆེན་གྱིས་མི་ལོ་བཞི་བརྒྱ་ལྷག་རིང་སྒྲུབ་ཅིང་སྤེལ་བའི་བཤད་སྒྲུབ་ལས་གསུམ་གྱི་བསྟན་འགྲོའི་བྱ་བ་རླབས་ཆེན་རྣམས་ཉམས་པ་སླར་གསོ་དང་མི་ཉམས་གོང་འཕེལ་ཡོང་བའི་སྨོན་འདུན་ཤུགས་དྲག་ཞུ་རྒྱུ་བཅས་ཡིན། འཕགས་ཡུལ་དྷ་རམ་ས་ལ་ནས་བཀའ་ཤག་གིས། བོད་རྒྱལ་ལོ་ ༢༡༤༠ ཕྱི་ལོ་ ༢༠༡༣ ཟླ་ ༡༡ ཚེས་ ༢༢ ལ་སྤེལ།། །།
