༢༠༡༣ ཟླ་ ༡༠ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༧ ནས་ ༨ བར་ཉིན་གྲངས་གཉིས་རིང་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་གོ་སྒྲིག་འོག་འཕྲོད་བསྟེན་གྲངས་ཐོ་ཕྱོགས་བསྡུའི་སྦྱོང་བརྡར་ཟབ་སྦྱོང་བོད་ཀྱི་གསོལ་མགྲོན་ཁང་དུ་འགོ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་འཕྲོད་བསྟེན་བཀའ་བློ་ཚེ་རིང་དབང་ཕྱུག་མཆོག་གིས་གཙོས་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་། དྲུང་འཕར་ཚེ་རྒྱལ་ལགས། དྲུང་གཞོན་འཕྲིན་ལས་དཔའ་མོ་ལགས། ཟབ་ཁྲིད་བ་ཨོ་སི་ཊོ་ལི་ཡ་ནས་ཕེབས་པའི་སྐུ་ཞབས་ (Nigel Griffiths) ལགས་དང་སྨན་པ་བློ་བཟང་ཚེ་རིང་ལགས། དེ་བཞིན་ས་གནས་ཁག་ ༡༦ ནས་ཕེབས་པའི་སྨན་པ་དང་འཕྲོད་ལས་པ། འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༢༠ བརྒལ་བའི་དབུས་སུ་བཀའ་བློན་མཆོག་གིས་མར་མེ་ཞལ་ཕྱེ་གནང་སྟེ་ཟབ་སྦྱོང་དབུ་འབྱེད་ཀྱི་གསུང་བཤད་གནང་དོན།
དེ་རིང་འདིར་འཕྲོད་བསྟེན་ལས་ཁུངས་ཀྱི་གྲངས་ཐོ་ལས་གཞིའི་ཟབ་སྦྱོང་ཐེངས་གསུམ་པའི་ཐོག་ཕེབས་པའི་འཕྲོད་བསྟེན་ལས་ཁུངས་ཀྱི་དྲུང་ཆེ་དང། དྲུང་འཕར། དྲུང་གཞོན། ཟབ་ཁྲིད་གནང་མཁན་སྨན་པ་བློ་བཟང་ལགས་དང་ནི་གལ་ལགས། དེ་བཞིན་འཕྲོད་བསྟེན་ལས་ཁུངས་ཀྱི་གྲངས་ཐོ་ལས་གཞི་ཚན་པའི་འགན་འཛིན་གྱིས་གཙོས་ལས་བྱེད་རྣམ་པ། ཁྱབ་ཁོངས་སྨན་ཁང་ཁག་གི་གྲངས་ཐོ་ལས་གཞིའི་ཐོག་ཕྱག་ལས་གནང་མཁན་ཚང་མར་ངས་འཕྲོད་བསྟེན་ལས་ཁུངས་ཀྱི་ཚབ་ཞུས་ཏེ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན། འཕྲོད་བསྟེན་གྲངས་ཐོ་ལས་གཞི་འདི་བཞིན་འཛམ་གླིང་གང་དུ་ཡིན་ནའང་འཕྲོད་བསྟེན་ལས་ཁུངས་ཁག་གིས་ལས་ཀ་བྱེད་སྐབས། ལས་ཀ་གལ་ཆེ་ཤོས་འཕྲོད་བསྟེན་གྲངས་ཐོའི་ལས་གཞི་འདི་ཆགས་ཀྱི་ཡོད། འཕྲོད་བསྟེན་གྲངས་ཐོའི་ལས་གཞི་འདི་ཚགས་ཚུད་ཆགས་ན། དེའི་ཐོག་ནས་ང་རང་ཚོའི་འཕྲོད་བསྟེན་གྱི་གནས་སྟངས་ཡག་པོ་དང། རྟོགས་ཞིབ་གང་འདྲ་བྱེད་དགོས་ཡོད་མེད། འཕྲོད་བསྟེན་གྱི་གནས་སྟངས་ཡར་རྒྱས་གཏོང་ཕྱོགས་ཐོག་འཆར་གཞི་སྒྲིག་རྒྱུ་སོགས་ཀྱི་ཐོག་ཁྱད་པར་ཆེན་པོ་བཟོ་གི་རེད། འཕྲོད་བསྟེན་ལས་ཁུངས་ཀྱི་ངོས་ནས་འཕྲོད་བསྟེན་དང་འབྲེལ་བ་ཡོད་པའི་ལས་གཞི་མང་པོ་ཞིག་སྤེལ་དང་སྤེལ་མུས་ཡིན། དཔེར་ན། མ་དང་བྱིས་པའི་འཕྲོད་བསྟེན། ཀྲི་བི་ནད་གཞི་སྔོན་འགོག གཉེན་ནད་རེག་དུག་སོགས་ཀྱི་ཐོག་ལོ་ལྟར་ལས་གཞི་མང་པོ་ཞིག་སྤེལ་གྱི་ཡོད། འོན་ཀྱང་ལས་གཞི་དེ་དག་གི་ནང་ནས་ལས་གཞི་གལ་ཆེ་ཤོས་འཕྲོད་བསྟེན་གྲངས་ཐོ་ལས་གཞི་འདི་རྩི་བཞིན་ཡོད་པ་ལྟར། དེའི་ཐོག་ཕྱག་ལས་གནང་གི་ཡིན་ཞེས་ཞུ་བཞིན་ཡོད། གྲངས་ཐོ་ལས་གཞི་འདི་ཡག་པོ་ཞིག་མེད་ན་ང་ཚོས་འཆར་གཞི་གང་འདྲ་ཞིག་བཀོད་ན་འཆར་གཞི་གཏིང་མ་ཐུབ་རྒྱུ་དང། ས་གནས་ཁག་ལ་འཕྲོད་བསྟེན་གྱི་ལས་གཞི་དེ་དག་གང་འདྲ་འགྲོ་གི་ཡོད་མེད་སོགས་ལས་གཞི་མང་པོ་ཞིག་འགྲོ་བཞིན་པ་དེ་དག་གིས་གྲུབ་འབྲས་གང་འདྲ་ཞིག་སོན་གྱི་ཡོད་མེད། དཔེར་ན། ཀྲི་བི་ནད་གཞི་དེའི་ཐོག་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་གཉིས་མཉམ་རུབ་ཐོག་ནས་ལོ་མང་ཞིག་ནས་དཀའ་ལས་རྒྱག་བཞིན་ཡོད།
དེར་བརྟེན་ཀྲི་བི་ནད་གཞིའི་གྲངས་ཐོ་ཡག་པོ་ཞིག་དགོས་རྒྱུ་ཧ་ཅང་གལ་ཆེན་པོ་རེད། དེ་བཞིན་མ་དང་བྱིས་པའི་འཕྲོད་བསྟེན་ཐོག་ང་ཚོས་ལོ་ལྟར་ལས་གཞི་མང་དག་ཅིག་སྤེལ་བཞིན་ཡོད། བུད་མེད་སྦྲུམ་མ་རྣམས་ལ་རིན་མེད་བརྟག་དཔྱད་དང་བཅུད་སྨན་སོགས་གནང་རྒྱུ་དང་། བྱིས་པ་རྣམས་ལ་རིན་མེད་ཐོག་སྔོན་འགོག་གི་ཁབ་རྒྱག་རྒྱུ་སོགས་བྱེད་བཞིན་ཡོད། དེར་བརྟེན་མ་དང་བྱིས་པའི་གྲངས་ཐོ་དེ་དག་འཕྲོད་བསྟེན་གྲངས་ཐོ་ལས་གཞིའི་མཛོད་ནང་སླེབས་མ་ཐུབ་ན། ལས་གཞི་དེ་གང་འདྲ་འགྲོ་གི་ཡོད་མེད་དང། མ་འོངས་པར་དེའི་ཐོག་འཆར་གཞི་གང་འདྲ་ཞིག་གཏིང་དགོས་ཡོད་མེད་ང་ཚོས་ཤེས་ཐུབ་རྒྱུ་ཧ་ཅང་ཁག་པོ་ཆགས་ཀྱི་ཡོད།
དེར་བརྟེན་དེ་རིང་ངས་དཔེ་མཚོན་དང་སྦྲགས་ནས་ཞུ་གི་ཡོད།
ཀྲི་བི་དང་མ་དང་བྱིས་པའི་ལས་གཞི་འདི་འཕྲོད་བསྟེན་ལས་ཁུངས་ཀྱི་ལས་གཞི་ཁག་གི་ནང་ནས་ལས་གཞི་གལ་ཆེན་པོ་ཞིག་ཆགས་ཡོད། དེ་ནས་གཉེན་ནད་རེག་དུག་གི་ཐོག་ལོ་ལྟར་ཟབ་སྦྱོང་དང་གོ་རྟོགས་ཀྱི་ལས་འགུལ་ཤུགས་ཆེ་སྤེལ་ཡོད། ནད་གཞི་འདིའི་ཐོག་འཕྲོད་བསྟེན་ལས་ཁུངས་ཀྱིས་ཕྱག་ལས་གནང་བའི་ཐོག་ནས་གྲུབ་འབྲས་ག་ཚོད་ཐོན་གྱི་འདུག ནད་གཞི་འདི་ཉུང་དུ་ཕྱིན་ཡོད་མེད། ན་ཚ་དེ་ས་གནས་གང་ནས་མང་བ་ཡོང་གི་ཡོད་མེད་དེ་དག་མཁྱེན་དགོས་རྒྱུ་ཧ་ཅང་གལ་ཆེན་པོ་ཆགས་འདུག ད་ལྟའི་འཕྲོད་བསྟེན་གྱི་གྲངས་ཐོ་ལས་གཞི་འདིའི་ནང་སྨན་ཁང་ཁག་ནང་ཡོད་པ་དེ་མ་གཏོགས་སླེབས་ཐུབ་ཀྱི་མེད། དེར་བརྟེན་གནད་དོན་དེའི་ཐོག་ང་ཚོས་འབྲེལ་ལས་རྣམས་གོ་བསྡུར་བྱས་པ་བརྒྱུད་སྨན་ཁང་ཁག་ནང་ཡོད་པའི་གྲངས་ཐོ་ཙམ་མ་ཡིན་པར་ཁྱིམ་ཚང་སོ་སོར་ཕྱིན་ཏེ་ཕྲུ་གུ་སྐྱེ་མཁན་ག་ཚོད་ཡོང་གི་ཡོད་མེད་སོགས་ཀྱི་གྲངས་ཐོ་ཞིབ་ཚགས་ལེན་རྒྱུར་འབད་བརྩོན་བྱེད་བཞིན་ཡོད། དེ་བཞིན་འཕྲོད་བསྟེན་ལས་ཁུངས་ལ་ལས་གཞི་གལ་ཆེ་བ་ལྔ་རྩི་བཞིན་ཡོད།
༡༽འཕྲོད་བསྟེན་གྲངས་ཐོ་ལས་གཞི་གལ་ཆེ་ཤོས་རྩི་བཞིན་ཡོད།
༢༽འཕྲོད་བསྟེན་གོང་འཕེལ་གཏོང་རྒྱུའི་ལས་གཞི་མང་དག་ཅིག་བྱས་དང་བྱེད་མུས་ཡིན་པ་དེ་དག་སྔར་ལྷག་མུ་མཐུད་ནས་འགྲོ་ཐུབ་རྒྱུ།
༣༽འཕྲོད་བསྟེན་ལས་ཁུངས་ནས་སྨན་བཅོས་རིམ་པ་གཉིས་པ། གསུམ་པ་དང་འབྲེལ་བ་ཡོད་པའི་ཐོག་ནས་སྨན་བཅོས་ལྟ་སྐྱོང་ལས་གཞི་འདི་ཡིན།
༤༽ལས་བྱེད་ཀྱི་ནུས་ཤུགས་ཆེ་རུ་གཏོང་རྒྱུ།
༥༽སྤྱིར་བཏང་གཞིས་ཆགས་ཁུ་ཀྱོག་རིགས་ལ་འཕྲོད་བསྟེན་གྱི་སྨན་ཁང་ཡོད་ཀྱང་ད་དུང་ཡང་སྨན་བཅོས་ཀྱི་རིམ་པ་དང་པོ་ཡང་ཡག་པོ་ཞིག་གནང་མི་ཐུབ་པའི་གནས་སྟངས་མང་དག་ཅིག་ཡོང་གི་འདུག དེའི་ཐོག་འཕྲོད་བསྟེན་ལས་ཁུངས་ནས་ཤུགས་སྣོན་རྒྱག་རྒྱུ་ཡིན། ཞེས་སོགས་ཀྱི་གསུང་བཤད་གྲུབ་མཚམས་ཐེངས་འདིའི་ཟབ་སྦྱོང་འགོ་འཛུགས་གནང་ཡོད།
