༢༠༡༣ ཟླ་ ༡༠ ཚེས་ ༢༦ རེས་གཟའ་སྤེན་པ།

༄༅། །ཕྱི་ལོ་ ༢༠༡༣ ཟླ་ ༡༠ ཚེས་ ༢༦ རེས་གཟའ་སྤེན་པའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐའེ་ལེན་ཌིའི་ཆེས་མཐོའི་ནང་པའི་དགེ་འདུན་ལྷན་ཚོགས་ཀྱི་དབུ་བླ་སྐུ་ཞབས་སོམ་ཌེ་ཏི་ཕ་ར་ན་ཡ་སམ་ཝ་ར་མཆོག་ His Holiness Somdet Phra Nyanasamvara འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་མ་ཐག་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན།

ཆོས་གྲོགས་རྣམ་པ་ཚོར་ཞུ་རྒྱུར། ༸སྐྱབས་མགོན་སོམ་ཌེ་ཏི་ཕ་ར་ན་ཡ་སམ་ཝ་ར་མཆོག་ཉེ་ལམ་དགུང་གྲངས་བརྒྱར་ཕེབས་པའི་སྐུའི་འཁྲུང་སྐར་སྲུང་བརྩི་ཞུས་ནས་རིང་པོར་མ་སོང་བར་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་ཐོས་སྐབས་ངོས་རང་ཧ་ཅང་བློ་ཕམ་ཆེན་པོ་བྱུང་།  དེར་བརྟེན་དབུ་བླ་དམ་པ་ཁོང་ལ་སྨོན་འདུན་དང་སྦྲགས། ཐའེ་ལེན་ཌིའི་སྐྱབས་གནས་དགེ་འདུན་གྱི་ཆེས་མཐོའི་ལྷན་ཚོགས་དང་། འཛམ་གླིང་ཁྱོན་ཡོངས་སུ་དབུ་བླ་དམ་པ་མཆོག་གི་དད་ལྡན་རྗེས་འབྲངས་པ་ས་ཡ་མང་པོ་ཡོད་པ་རྣམས་ལ་གདུང་སེམས་མཉམ་སྐྱེ་དང་མྱ་ངན་གུས་འདུད་ཞུ་རྒྱུ་ཡིན། དབུ་བླ་དམ་པ་ཁོང་འདས་གྲོངས་སུ་གྱུར་བ་དེས་ང་ཚོ་ཚང་མར་ཕུལ་དུ་བྱུང་བའི་ཆོས་གྲོགས་ཤིག་མེད་པར་གྱུར་ཡོད། ལོ་ཤས་གོང་ངོས་ཀྱིས་དབུ་བླ་དམ་པ་ཁོང་དང་མཇལ་ནས་དམ་པ་ཁོང་གི་ཆོས་ཕྱོགས་ཀྱི་མཛད་འགན་རྣམས་ཧུར་བསྐྱེད་བསྐྱངས་པ་དེར་གུས་བརྩི་ཆེན་པོས་བསྔགས་བརྗོད་ཞུ་རྒྱུ་བྱུང་། དབུ་བླ་དམ་པ་ཁོང་གིས་དོན་དང་ལྡན་པའི་སྐུ་ཚེ་རིང་པོ་ཧྲིལ་པོའི་རིང་འགྲོ་བ་མིའི་བདེ་དོན་ཆེད་ཕྱག་ལས་གནང་ཡོད། དུས་ཚོད་གཉན་འཕྲང་ཅན་འདི་འདྲའི་སྐབས་ང་ཚོར་བློ་ཕམ་ཡོང་རྒྱུ་བརྗོད་མི་དགོས་ཀྱང་། དམ་པ་ཁོང་ལ་ང་ཚོས་གུས་འདུད་དང་ཆེ་བསྟོད་ཞུ་རྒྱུའི་གོ་སྐབས་བཟང་ཤོས་ནི་དམ་པ་ཁོང་གི་ལམ་སྟོན་འོག་ང་ཚོས་དབུ་བླ་དམ་པའི་དགོངས་གཞི་ལྟར་འཛམ་གླིང་ཞི་བདེ་དང་ཤེས་རབ་གོང་མཐོར་སྤེལ་ཐབས་བྱ་རྒྱུ་ཡིན།

ཞེས་བཀའ་སྩལ་བ་དང་སྦྲགས། མགོན་པོ་གང་ཉིད་མཆོག་གི་སྐུ་ཚབ་མགྱོགས་མྱུར་ཐའེ་ལེན་ཌིའི་མི་མང་ཚོར་གདུང་སེམས་མཉམ་སྐྱེ་ཞུ་ཆེད་མངགས་གཏོང་མཛད་རྒྱུའི་ཐུགས་རེ་མཛད་བཞིན་ཡོད་སྐོར་འཁོད་ཡོད། གསུང་འཕྲིན་ངོ་མ་དབྱིན་ཡིག་ནང་ཡོད་པ་འདི་ག་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་ཡོང་བ་ཞུ།།