༢༠༡༣ ཟླ་ ༩ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༩ ཚེས་ ༣ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་ལྷན་ཚོགས་ཁང་དུ་རྒྱ་རིགས་འབྲེལ་མཐུད་པ་རྣམས་དང་མཇལ་མོལ་གནང་ཡོད། དེ་ཉིན་ཕྱི་དྲོ་ཆུ་ཚོད་ ༥།༣༠ ཐོག་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་དང་། ཨ་རི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས། ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས། ཨོ་སི་ཊོ་ལི་ཡའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་སྒྲོན་ལགས། སུད་སི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་བློ་བཟང་ཉི་མ་ལགས་བཅས་ལྷན་འཛོམས་ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ཕྱི་དྲིལ་རྒྱ་ཡིག་སྡེ་ཚན་གྱི་ལས་བྱེད་རྣམས་དང་རྒྱ་རིགས་འབྲེལ་མཐུད་པའི་དབར་ཉིན་ཤས་རིང་གི་ལྷན་ཚོགས་དང་། འདས་པའི་ཉམས་མྱོང་གི་ལས་དོན་ཕྱོགས་བསྡོམས་དང་མ་འོངས་པའི་ལས་དོན་ཡར་རྒྱས་གནང་ཕྱོགས་སྐོར་ངོ་སྤྲོད་རྗེས་ཨ་རི་དོན་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲ་ཤིས་ལགས་ཀྱིས་མ་འོངས་པར་རྒྱ་རིགས་འབྲེལ་མཐུད་པའི་ལས་དོན་ཞུ་ཕྱོགས་ཀྱི་ལས་རིམ་ངོ་སྤྲོད་ཞུས་རྗེས་སྲིད་སྐྱོང་མཆོག་གིས་རྒྱ་རིགས་འབྲེལ་མཐུད་པའི་ལས་དོན་གལ་ཆེ་ཡིན་པའི་ལམ་སྟོན་ཀྱང་གནང་ཡོད། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་ཐོག་སྲི་ཞུ་བའི་ལས་བྱེད་རྣམས་དང་བསམ་ཚུལ་བརྗེ་ལེན་གྱི་ལྷན་ཚོགས་གནང་སྟེ་རྒྱ་རིགས་འབྲེལ་མཐུད་པ་མི་རེ་ངོ་རེས་རང་གི་ལས་དོན་གྱི་མྱོང་བ་དང་འབྲེལ་བའི་དྲི་བ་དྲིས་ལན་ཁག་ལ་ལན་འདེབས་ཀྱང་གནང་འདུག
