༢༠༡༣ ཟླ་ ༩ ཚེས་ ༡༣ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ནོར་ཝེའི་སྲིད་བློན་གསར་པའི་འོས་བསྡུའི་ནང་རྒྱལ་ཁ་ཐོབ་མཁན་ལྕམ་སྐུ་ཨེར་ན་སོལ་སྦག་(Ms Erna Solberg) མཆོག་ཡུལ་དེའི་སྲིད་བློན་གསར་པར་འོས་འདེམས་བྱུང་བར་དགའ་བསུའི་འཚམས་འདྲི་ཞུས་པའི་ནང་འཁོད་དོན།

སྐུ་ཉིད་མཆོག་ལ་ཕྱི་ལོ་ ༢༠༡༣ ལོའི་ནོར་ཝེའི་སྲིད་བློན་གསར་པའི་འོས་བསྡུའི་ནང་རྒྱལ་ཁ་ཐོབ་སྟེ་འོས་འདེམས་བྱུང་བར་ངོས་ནས་བོད་མི་ཡོངས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། སྐུ་ཉིད་མཆོག་གིས་དབུ་ཁྲིད་འོག་ལས་དོན་མཐའ་དག་ལམ་ལྷོང་ལྡན་པ་ཡོང་རྒྱུར་སྨོན་འདུན་ཞུ་རྒྱུ་ཡིན། སྐུ་ཉིད་མཆོག་ལ་ཐེངས་འདིར་སྲིད་བློན་གྱི་འོས་བསྡུའི་རྒྱལ་ཁ་ཐོབ་པ་ནི་ཕྱི་ལོ་ ༡༩༩༠ ནས་རྙིང་ཞེན་ཚོགས་པའི་ (Conservative) དབུ་ཁྲིད་ལ་རྒྱལ་ཁ་ཐོབ་པ་ཐེངས་དང་པོ་ཆགས་ཡོད། ནོར་ཝེའི་གཞུང་མང་གཉིས་ཀྱིས་འཚེ་མེད་ཞི་བ་དང་མང་གཙོའི་ལྟ་གྲུབ་ལ་གཞི་བཅོལ་བའི་བོད་མིའི་འཐབ་རྩོད་ལ་ཡུན་རིང་ནས་རྒྱབ་སྐྱོར་གནང་བར་བཀའ་དྲིན་རྗེས་དྲན་ཞུ་རྒྱུ་དང་། སྐུ་ཉིད་མཆོག་གི་དབུ་ཁྲིད་འོག་བོད་དོན་ཐོག་སྔར་བཞིན་རྒྱབ་སྐྱོར་མུ་མཐུད་གནང་རྒྱུའི་རེ་འདུན་ཞུ་བཞིན་ཡོད། ཅེས་འཁོད་ཡོད།