༢༠༡༣ ཟླ་ ༩ ཚེས་ ༡༢ རེས་གཟའ་ཕུར་བུ།
༄༅། །རྒྱ་རིགས་ཁྲིམས་རྩོད་པ་ཞིག་གིས་བོད་མི་ཚོས་རང་ལུས་མེར་སྲེག་བཏང་དང་གཏོང་བཞིན་པའི་དུས་སྐབས་འདིར་འཛམ་གླིང་མི་དམངས་ནས་གླེང་སློང་དང་འབོད་སྒྲ་མ་བསྒྲགས་ན། མ་འོངས་པར་ལོ་རྒྱུས་ནང་ད་ལྟའི་མི་རབས་ཚོའི་བྱེད་ལུགས་གསལ་པོ་ཆགས་རྒྱུ་ཡིན་སྐོར་གསུངས་འདུག
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་ནག་གི་རྒྱལ་ས་པེ་ཅིང་གི་ཆབ་སྲིད་དང་ཁྲིམས་སྒྲིག་གི་གཙུག་ལག་སློབ་གྲྭ་ཆེན་པོ་ནང་དགེ་རྒན་ཆེན་མོའི་ཕྱག་ལས་གནང་མཁན་དང་། ལྷག་པར་འགྲོ་བ་མིའི་ཐོབ་ཐང་རྩོད་ལེན་པ་སྐུ་ཞབས་ཏེང་བེ་ཝོ་ལགས་ཕྱི་ལོ་ ༢༠༡༣ ཟླ་ ༩ ཚེས་ ༧ ཉིན་ཁུལ་དེའི་བགྲོ་གླེང་ཞིག་ཐོག་མགྲོན་འབོད་གནང་ཡོད་པ་ལྟར། སྐབས་དེར་ཁོང་གིས་བོད་མིའི་རང་ལུས་མེར་སྲེག་སྐོར་ལ་གླེང་སློང་གནང་དོན། བོད་ནང་གི་བོད་མི་བརྒྱ་བརྒལ་ནས་རང་ལུས་མེར་སྲེག་བཏང་ཡོད་པའི་དོན་རྐྱེན་དེ་དག་འགྲོ་བ་མིའི་ལོ་རྒྱུས་ནང་གཉའ་འཕྲང་ཆེ་བའི་དུས་སྐབས་ཤིག་ཆགས་ཀྱི་ཡོད། དེར་བརྟེན་དུས་རབས་འདིའི་སྐབས་ཀྱི་མི་དམངས་ནས་དོན་རྐྱེན་དེ་དག་སྐོར་ལ་འབོད་སྒྲོག་གིས་གླེང་སློང་གང་ཡང་མ་བྱས་ན། མ་འོངས་པར་ལོ་རྒྱུས་ནང་ད་ལྟའི་མི་རབས་ཚོའི་བྱེད་ལུགས་འཁོད་ཀྱི་རེད། གལ་ཏེ་འཛམ་གླིང་གི་མི་དམངས་ནས་དོ་ཁུར་ཆེ་བཞེས་ཀྱིས་སྐབས་ཐོག་གླེང་སློང་བྱས་ཚེ། མ་འོངས་པར་ལོ་རྒྱུས་ཀྱི་རང་བཞིན་ཐོག་ནས་ཀྱང་འབོད་སྒྲོག་གི་ཚིག་དོན་དེ་དག་གསལ་རྒྱུ་ཡིན་ངེས་རེད། ཅེས་སོགས་ཀྱི་གསུངས་འདུག
