༢༠༡༣ ཟླ་ ༩ ཚེས་ ༤ རེས་གཟའ་ལྷག་པ།
༄༅། །འདི་གར་དར་རྒྱས་གླིང་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༩ ཚེས་ ༢ ཉིན་རྒྱ་གར་བྱང་ཤར་ཏི་ཛུ་དར་རྒྱས་གླིང་གཞིས་ཆགས་ཀྱི་༸རྒྱལ་བའི་ཕོ་བྲང་གི་མདུན་དུ་བཙན་བྱོལ་བོད་མིའི་མང་གཙོའི་དུས་ཆེན་ཐེངས་ ༥༣ པ་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༦།༣༠ ཐོག་སེར་སྐྱ་མི་དམངས་རྣམས་ནས་རང་ལུགས་ཀྱི་གཟབ་མཆོར་དང་བཅས་བརྟན་མཁར་གྱི་མདུན་དུ་ཚང་འཛོམས་ཀྱིས་བསང་གསོལ་གནད་སྨིན་གྲུབ་མཚམས་ཆུ་ཚོད་ ༧།༡༥ ཐོག་མཛད་སྒོའི་སྐུ་མགྲོན་གཙོ་བོ་ས་གནས་འཐུས་ཚོགས་ཀྱི་ཚོགས་གཙོ་དང་། ལྷ་དགོན་བྱང་ཆུབ་ཆོས་གླིང་དབུ་འཛིན་རྫོགས་ཆེན་དགའ་ནོར་རིན་པོ་ཆེ་མཆོག་གིས་གཙོས་ས་གནས་ཉིན་སློབ་ཀྱི་དགེ་ཆེ་དང་དགེ་ལས་རྣམ་པ། ས་གནས་རང་བདེན་ཚོགས་ཆུང་གི་འཐུས་མི། ས་གནས་འཐུས་ཚོགས་ཀྱི་ཚོགས་མི་རྣམ་པ། གཞིས་དགོན་གསུམ་གྱི་དབུ་འཛིན་རྣམ་པ། སློབ་ཕྲུག་དང་སེར་སྐྱ་མི་དམངས་བཅས་ཁྱོན་མི་གྲངས་ ༣༠༠ བརྒལ་བ་ལྷན་འཛོམས་ཐོག་རྫོགས་ཆེན་དགའ་ནོར་རིན་པོ་ཆེ་མཆོག་སོགས་ཀྱིས་ཞལ་འདོན་དབུ་བསྐུལ་དང་འབྲེལ་ས་གནས་འཐུས་ཚོགས་ཀྱི་ཚོགས་གཙོ་དང་ས་གནས་འགོ་འཛིན་རྣམས་གཉིས་ཀྱིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེ་མཆོག་ལ་མཎྜལ་རྟེན་གསུམ་འདེགས་འབུལ་དང་ལྷན་གནད་ཡོད་མི་སྣ་ཁག་གིས་རིམ་བཞིན་མཇལ་ཁ་ཞུས་ཡོད།
དེ་རྗེས་ལས་དྲུང་ལས་ཚབ་ཀྱིས་མཛད་རིམ་ངོ་སྤྲོད་དང་འབྲེལ་ས་གནས་ཉིན་སློབ་ཀྱི་སློབ་ཕྲུག་གིས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ། དེ་བཞིན་མང་གཙོའི་གསར་བཞད་བཏང་ཡོད། དེ་ནས་སྐུ་མགྲོན་
དང་མི་དམངས་རྣམས་ལ་གསོལ་ཇ་འབྲས་སིལ་ཕུལ་གྲུབ་མཚམས་ས་གནས་འཐུས་ཚོགས་ཀྱི་ཚོགས་གཙོས་བོད་མི་མང་སྤྱི་འཐུས་ལྷན་ཚོགས་ཀྱི་མང་གཙོའི་དུས་ཆེན་གྱི་གསུང་བཤད་དང་ས་གནས་འགོ་འཛིན་གྱིས་བཀའ་ཤག་གི་མང་གཙོའི་དུས་ཆེན་གྱི་གསུང་བཤད་སྒྲོགས་སྦྱང་དང་འབྲེལ་མང་གཙོའི་བྱུང་རིམ་སྐོར་གསུང་བཤད་གནང་སྟེ་དངོས་གཞིའི་མཛད་སྒོ་གྲོལ། ཕྱེད་ཡོལ་ཆུ་ཚོད་ ༣ ནས་ ༥ བར་གཞིས་ལུས་བོད་མིར་གདུང་སེམས་མཉམ་སྐྱེ་མཚོན་སླད་སྨོན་ལམ་གསུང་འདོན་གནང་ཡོད་པ་བཅས། །
