༢༠༡༣ ཟླ་ ༩ ཚེས་ ༣༠ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་པོ་མཆོག་ལ་ཐེ་ཝན་དད་ལྡན་ཆོས་ཞུ་བ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་མགོན་པོ་གང་ཉིད་མཆོག་གིས་ཕྱི་ལོ་ ༢༠༡༣ ཟླ་ ༩ ཚེས་ ༣༠ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་རིག་པ་དྲུག་ཅུ་པ་དང་རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་གྱི་ཆོས་འབྲེལ་དབུ་འཛུགས་མཛད་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་༸གོང་ས་མཆོག་ཕོ་བྲང་གཟིམ་ཆུང་ནས་ཐེ་ཝན་དད་ལྡན་ཆོས་ཞུ་བའི་སྐུ་ཚབ་ཀྱིས་སྤོས་སྣེས་སྔོན་བསུས་ཏེ་གཙུག་ལག་ཁང་གི་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན། རྒྱ་སྐད་ཐོག་ཤེས་རབ་སྙིང་པོ་གསུང་འདོན་གནང་གྲུབ་མཚམས་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་འབྲེལ་སྔོན་ཐེ་ཝན་ནས་ཡོང་བའི་རྒྱ་རིགས་ཆོས་གྲོགས་ཚོ་དང། དེ་བཞིན་ས་ཁུལ་ཁག་འགའ་ཞིག་ནས་ཡོང་བའི་རྒྱ་རིགས་ཆོས་གྲོགས་ཚོ་ད་རེས་ཆེད་དུ་འཛིན་པའི་འདུལ་བྱ་གཙོ་བོ་ཆགས་ཡོད། བྱས་ཙང་ཁྱེད་རང་ཚོས་དཀའ་ལས་བརྒྱབ་སྟེ་འདིར་ཡོང་བར་ཚང་མར་འཚམས་འདྲི་ཡོད། དེ་ནས་ད་ལན་ཉེ་ཆར་བསྒྲུབས་པའི་རྒྱ་རིགས་དགེ་སློང་དང་དགེ་ཚུལ་ཚང་མ་དེ་རིང་ཁྱེད་རང་ཚོ་ཧ་ལམ་བསྙེན་རྫོགས་དང་དགེ་ཚུལ་བསྒྲུབས་མ་ཐག་ཡིན་ཚོར། དེ་རིང་འདིར་ཆོས་འབྲེལ་བྱེད་རྒྱུའི་དུས་ཚོད་འདི་འདྲ་ཞིག་འཁེལ་བ་རེད། དེར་བརྟེན་ཁྱེད་རང་ཚོ་ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན་ཞེས་འཚམས་འདྲི་མཛད་པ་དང་ལྷན་བཀའ་སློབ་སྩལ་དོན།
སྤྱིར་བཏང་མིའི་སྤྱི་ཚོགས་འདི་ལོ་ས་ཡ་ཁ་ཤས་ཀྱི་གོང་ལ་རིམ་བཞིན་ཆགས་པ་རེད། མིའི་ལུས་མི་འདྲ་བ་ཞིག་གི་ཐོག་ནས་འགྱུར་བ་བྱུང་སྟེ་ཀླད་པ་ཡང་མི་འདྲ་བ་ཞིག་ཆགས་ཡོད། དེར་བརྟེན་མིར་དུད་འགྲོ་གཞན་ལས་ཁྱད་དུ་འཕགས་པའི་རྣམ་དཔྱོད་ཅིག་ལྡན་ཡོད། ང་ཚོར་སྐད་དང་ཡི་གེ་རིམ་བཞིན་བྱུང་ཡོད། དེ་གཉིས་ཀྱི་ཐོག་ནས་མིར་སྒོ་ངའི་ཤེས་པའི་ཡུལ་དུ་ཡོད་པ་དེ་ཁོ་ན་མ་ཡིན་པར་ཡིད་བློའི་སྟེང་ནས་རྣམ་གཞག་མང་དག་ཅིག་མིའི་སྤྱི་ཚོགས་ནང་ཡོད། དེ་དག་གི་དམིགས་ཡུལ་ནི་བདེ་སྐྱིད་བསྒྲུབ་རྒྱུའི་དོན་དུ་རེད་མ་གཏོགས་རྙོག་གྲ་བཟོ་ཆེད་ཕལ་ཆེར་བྱུང་མེད། དེ་ལྟ་བུའི་ཐོག་ནས་ཆོས་བརྒྱུད་མི་འདྲ་བ་མང་པོ་ཞིག་ལོ་སྟོང་ཕྲག་བཞི་ལྔ་ཙམ་ནས་དད་པ་བྱེད་རྒྱུ་ཞིག་ཆགས་ཡོད། དེ་ཡང་མིར་དཀའ་ངལ་འཕྲད་སྐབས་རང་ཉིད་ཀྱི་ནུས་པས་སེལ་མི་ཐུབ་པའི་སྐབས་དད་པའི་ཐོག་ནས་མི་སེམས་ལ་རེ་བ་མ་བརླག་པར་འཛིན་རྒྱུའི་ཐོག་ནས་དད་པའི་རྣམ་གཞག་བྱུང་ཡོད་ངེས་རེད། དེ་བཞིན་དུད་འགྲོ་ཚང་མས་བརྩེ་བར་ཧ་ཅང་དགའ་ཞེན་བྱེད་ཀྱི་འདུག སྤྱིར་བཏང་མངའ་སྐྱེས་དང་སྒོང་སྐྱེས་ཕལ་ཆེ་བ་མའི་བརྩེ་བ་ཡོད་མུས་རེད། ལྷག་པར་ང་ཚོ་འགྲོ་བ་མིར་མའི་བརྩེ་བ་ཧ་ཅང་གལ་ཆེན་པོ་ཆགས་ཡོད། དེར་བརྟེན་ལྟ་གྲུབ་ཡོད་པའི་ཆོས་ལུགས་ཚང་མས་བརྩེ་བ་གལ་ཆེན་ཡིན་སྐོར་གསུང་གི་འདུག དཔེར་ན། དད་པ་ཞེས་སྐབས་མུན་ནག་ལ་འཇིགས་སྣང་ཡོང་དུས་ཉི་འོད་ཀྱིས་མུན་པ་སེལ་སྐབས་ཉི་མར་དགའ་པོ་དང་དད་པ་བྱ་རྒྱུ་ལྟ་བུ་དེ་དག་ལ་བརྩེ་བའི་སྐད་ཆ་གང་ཡང་མེད། ཆོས་ལ་ལྟ་གྲུབ་ཡོད་མེད་གཉིས་ནང་ནས་ལྟ་གྲུབ་ཡོད་མཁན་གྱི་ཆོས་ལུགས་དེས་མིའི་བརྩེ་བ་གལ་ཆེན་པོ་ངོས་འཛིན་བྱས་ཐོག་ཡར་རྒྱས་གཏོང་རྒྱུར་དཔེར་ན།
ཡི་ཤུ་ཆོས་པ་ཚོར་ཆ་བཞག་ན་བརྩེ་བའི་བདག་ཉིད་ཅན་གྱི་འཇིག་རྟེན་བཀོད་པ་པོས་ང་ཚོ་བཀོད་པ་རེད་ཅེས་བརྗོད་ཀྱི་ཡོད། ཆོས་ལུགས་གང་དང་གང་ཞིག་ཡིན་རུང་སོ་སོའི་དཀོན་མཆོག་གི་ཡོན་ཏན་བརྗོད་སྐབས། བརྩེ་བའི་བདག་ཉིད་ཡིན་སྐོར་བརྗོད་ཀྱི་འདུག དད་པ་དེ་བརྩེ་བ་གོང་འཕེལ་གཏོང་རྒྱུའི་རྒྱུ་མཚན་དུ་འདྲེན་གྱི་ཡོད་པ་ལྟ་བུ་འདུག འཛམ་གླིང་འདིའི་ཐོག་མི་དུང་ཕྱུར་བདུན་ཅུ་ལྷག་ཙམ་ཡོད་པ་རྣམས་ལ་ཁམས་དང་མོས་པ་མི་འདྲ་བ་ཡོད་སྟབས། ལྟ་གྲུབ་མི་འདྲ་བའི་ཆོས་བརྒྱུད་དགོས་ཀྱི་ཡོད་པ་དེ་ཧ་ཅང་གསལ་པོ་རེད། འོན་ཀྱང་རང་རང་གི་ཆོས་བརྒྱུད་ལ་དད་པ་བྱས་ཐོག་ཆོས་བརྒྱུད་ཚང་མར་གུས་པ་བྱ་རྒྱུ་ཧ་ཅང་གལ་ཆེན་པོ་རེད། དེར་བརྟེན་ཆོས་ལུགས་མཐུན་སྒྲིལ་བྱེད་རྒྱུ་གལ་འགངས་ཆེན་པོ་རེད། ང་ཚོར་ཆགས་སྡང་བྱེད་རྒྱུའི་རྐྱེན་མང་དག་ཅིག་ཡོད་པར་བརྟེན། ཆོས་དེ་ཡང་ཆགས་སྡང་བྱེད་རྒྱུའི་ཐོག་ཕྱིན་ན་ཧ་ཅང་ཐབས་སྐྱོ་དང་སེམས་ཕངས་པོ་རེད། ཉེ་ཆར་འབར་མ་དང་ཤི་རི་ལངྒར་ནང་པ་དང་ཁ་ཆེའི་དབར་དཀའ་ངལ་ཞིག་ཡོང་གི་འདུག
ལྷག་པར་འབར་མའི་དགེ་སློང་ཁག་གཅིག་ལ་དྲག་གཅོད་པའི་མིང་དེ་འདྲ་འདོགས་ཀྱི་འདུག ཉེ་དུས་ངོས་རང་ཅེཀ་སྤྱི་མཐུན་རྒྱལ་ཁབ་ (Czech Republic) ཀྱི་རྒྱལ་ས་པ་རག་ (Prague) ཏུ་ཕོ་རམ་ ༢༠༠༠ (Forum 2000) ཞེས་པའི་རྒྱལ་སྤྱིའི་ལྷན་ཚོགས་སུ་ལྕམ་སྐུ་ཨང་སང་སུ་ཀི་ཕེབས་འདུག ཁོང་དང་གནད་དོན་དེའི་སྐོར་བཀའ་མོལ་བྱུང། ཁོང་གིས་ཐུགས་ཁྲལ་ཡང་གནང་གི་འདུག ལོ་སྟོང་ཕྲག་བཞི་ལྔ་ཙམ་ནང་དུ་ཆོས་དད་ཅེས་པ་བྱུང་ཡོད། འདས་པའི་ལོ་སུམ་བརྒྱ་དེ་འདྲ་ཞིག་ནས་ཚན་རིག་གི་རིག་གནས་ཐོག་འཕྲུལ་ཆས་རིགས་ཡར་རྒྱས་བྱུང་སྟེ། དངོས་པོ་ཡར་རྒྱས་ཐོག་ཧ་ཅང་ཕན་ཐོགས་བྱུང་ཡོད། ཚན་རིག་རིམ་བཞིན་དར་སྐབས་ཆོས་ཕྱོགས་ལ་དོ་སྣང་ཕྲན་བུ་ཆུང་དུ་འགྲོ་གི་ཡོད་པ་ལྟ་བུ་འདུག དུས་རབས་ཉི་ཤུའི་སྨད་ཆ་ནས་ཀླད་ཁམས་དང་འཕྲོད་བསྟེན་གྱི་ཚན་རིག་ཡར་རྒྱས་ཤུགས་ཆེ་འགྲོ་སྐབས། མིའི་སེམས་ཚོར་ཐོག་ནས་ལུས་པོ་བདེ་མིན་སྐོར་ཉམས་ཞིབ་ཚད་མཐོན་པོར་སླེབས་སྐབས་གཞི་ནས་སེམས་ལ་དོ་སྣང་གསར་པ་ཞིག་ཡོང་གི་ཡོད། སེམས་ཀྱི་རྣམ་གཞག་ཤོད་སྐབས་ཆོས་ཕྱོགས་ནས་ཆོས་ཚང་མ་སེམས་ཀྱི་འཕྲོད་བསྟེན་ཐོག་སླེབས་ཀྱི་འདུག ངོས་རང་ཚན་རིག་པ་ཚོ་དང་འབྲེལ་བ་བྱས་ནས་ཕལ་ཆེར་ལོ་སུམ་ཅུ་ཙམ་ཕྱིན་ཡོད། ཚན་རིག་པ་དང་དགེ་རྒན་ཆེན་མོ། ཤེས་ཡོན་ཅན་སོགས་ལྷན་འཛོམས་ཀྱི་ཚོགས་འདུ་ཁ་ཤས་ཤིག་ལ་ངོས་རང་མཉམ་ཞུགས་བྱས་པ་ཡིན། ཚང་མའི་བསམ་ཚུལ་ལ་ང་ཚོའི་སྤྱི་ཚོགས་ནང་བྱམས་བརྩེ་འདང་གི་མི་འདུག ལྷག་པར་ཁྱིམ་ཚང་ནང་བྱམས་བརྩེ་མ་འདང་བའི་དབང་གིས་གཞོན་སྐྱེས་ཚོ་སེམས་པ་མ་སྐྱིད་པ་ཡོང་གི་འདུག ཆོས་བཤད་ནས་འཛམ་གླིང་ཀུན་ལ་བྱམས་བརྩེ་སྤེལ་རྒྱུ་ཧ་ཅང་ཁག་པོ་ཡིན་སྟབས།
ཆོས་ལུགས་རིས་མེད་ཐོག་བསམ་བློ་གཏོང་དགོས་འདུག ཅེས་ནས་བར་སྐབས་ཚན་རིག་པ་མང་དག་ཅིག་གིས་ཆོས་ལུགས་རིས་མེད་ཐོག་ནས་སློབ་སྦྱོང་སྤྲད་དེ་བྱམས་བརྩེ་གོང་འཕེལ་གཏོང་རྒྱུའི་སློབ་སྦྱོང་སྤྲོད་ཀྱི་ཡོད། ཨ་རིའི་ནང་ཁ་ཤས་ཤིག་ཡོད་ལ་ཡུ་རོབ་ནང་དེ་ལྟ༌བུ་རིམ་བཞིན་ཡོང་རྒྱུའི་རེ་བ་ཞིག་འདུག དེར་བརྟེན་ཆོས་ལུགས་རིས་མེད་ཀྱི་སློབ་སྦྱོང་བྱེད་རྒྱུར་ང་ཚོས་ཡིག་ཆ་ཞིག་གོ་སྒྲིག་བྱེད་ཀྱི་ཡོད། ཁྱེད་རང་ཚོ་ཐེ་ཝན་ལ་ཡང་དེའི་ཐོག་བསམ་བློ་གཏོང་དགོས། ཅེས་སོགས་ཀྱི་བཀའ་སློབ་དང་སྔོན་འགྲོའི་ཆོས་འབྲེལ་དབུ་འཛུགས་མཛད་ཡོད།
ཐེངས་འདིའི་གསུང་ཆོས་ཐེ་ཝན་དད་ལྡན་ཆོས་ཞུ་བ་གྲངས་ ༩༠༠ གཙོ་བོ་གྱུར་བའི་རྒྱ་ནག་སྐམ་ས་ནས་ ༣༣ ། ཧོང་ཀོང། ༡༢ ཕྱི་རྒྱལ་ལུང་པ་ ༥༤ ནས་མི་གྲངས་ ༡༠༥༨ ། གྲྭ་བཙུན། ༡༤༧༡ དེ་བཞིན་རང་རིགས་སེར་སྐྱ་མི་མང་ ༡༦༣༤ རྒྱ་གར་དང་ཧི་མ་ལ་ཡ་ ༡༦༧ བཅས་ཁྱོན་མི་གྲངས་ ༥༠༠༠ བརྒལ་བ་ཆོས་ཞུར་བཅར་འདུག ཉིན་གྲངས་གསུམ་གྱི་ཆོས་འབྲེལ་དེ་བཞིན་ཐད་ཀར་རྒྱ་སྐད་ཐོག་གསུང་བསྒྱུར་ཞུས་ཡོད་པ་མ་ཟད། དབྱིན་སྐད་དང་། ཉི་ཧོང་། ཀོ་རི་ཡ། ཝི་ཏི་ནམ་བཅས་ཀྱི་སྐད་ཐོག་ལའང་བསྒྱུར་ཏེ་རླུང་འཕྲིན་དང་དྲ་རྒྱའི་ཐོག་ཐད་གཏོང་གནང་བཞིན་འདུག
