༢༠༡༣ ཟླ་ ༨ ཚེས་ ༣ རེས་གཟའ་སྤེན་པ།
༄༅། །ཨ་རིའི་ངལ་རྩོལ་ཚན་པའི་དྲུང་གཞོན་མཆོག་གིས་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པའི་བོད་ཀྱི་འགྲོ་བ་མིིའི་ཐོབ་ཐང་གནད་དོན་ལ་ཨ་རིའི་གཞུང་ཕྱོགས་ལ་སེམས་འཚབ་ཡོད་སྐོར་གསུངས་འདུག
དེ་ཡང་ཕྱི་ལོ་ ༢༠༡༣ ཟླ་ ༧ ཚེས་ ༣༠ དང་ ༣༡ ཉིན་གྲངས་གཉིས་རིང་ཨ་རི་དང་རྒྱ་ནག་དབར་ལོ་འཁོར་གྱི་འགྲོ་བ་མིའི་ཐོབ་ཐང་གྲོས་མོལ་ཚོགས་འདུ་ཐེངས་ ༡༨ པ་གྲོལ་རྗེས་ཨ་རིའི་ངལ་རྩོལ་ཚན་པའི་དྲུང་ཆེ་གཞོན་པ་ལྕམ་སྐུ་(Uzra Zeya)ལགས་ཀྱིས་རྒྱ་ནག་གི་རྒྱལ་ས་པེ་ཅིང་དུ་གསར་འགོད་ལྷན་ཚོགས་ཐོག་གསུང་དོན། རྒྱ་ནག་གཞུང་གི་བོད་དང་ཡུ་གུར་ས་གནས་ཀྱི་ཆོས་ཕྱོགས་ལ་དམ་བསྒྲགས་བྱེད་ཤུགས་ཆེ་རུ་བཏང་ཡོད།
དེ་བཞིན་རྒྱ་ནག་གཞུང་གིས་རང་ཉིད་དང་སྲིད་དོན་ལྟ་བ་མཐའ་དད་འཛིན་མཁན་རྣམས་ཀྱི་ཁ་བཀག་རྒྱུ་དེ་བས་ཤུགས་ཆེ་རུ་གཏོང་ཐབས་བྱེད་བཞིན་ཡོད་པ་མ་ཟད། བོད་དང་ཡུ་གུར་མི་རིགས་ཐོག་སྔར་ལྷག་དམ་བསྒྲགས་ཆེ་རུ་བཏང་དང་གཏོང་མུས་ཡིན་པའི་གནས་ཚུལ་ཐོག་ང་ཚོ་ཨ་རིའི་གཞུང་ཕྱོགས་ལ་སེམས་འཚབ་ཆེན་པོ་ཡོད།
རྒྱ་ནག་གཞུང་གི་དེ་ལྟ་བུའི་དམ་བསྒྲགས་ཀྱི་སྲིད་བྱུས་དེ་ཕྱི་ཚུལ་བརྟན་ལྷིང་ལ་དམིགས་པ་ཞིག་ཡིན་ཡང་དོན་དངོས་ཐོག་འབྲས་བུ་ལྡོག་ཕྱོགས་འཐོན་བཞིན་ཡོད། ལྷག་པར་རྒྱ་ནག་གཞུང་ནས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་བོད་རྒྱའི་དབར་དོན་སྙིང་ལྡན་པའི་གྲོས་མོལ་གནང་དགོས་པའི་འབོད་སྐུལ་ཞུ་བཞིན་ཡོད། ཅེས་སོགས་གསུངས་འདུག་པ་བཅས། །
