༢༠༡༣ ཟླ་ ༨ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༣༡ ཉིན་བཀའ་དྲུང་ཡིག་ཚང་ནས་བཀོད་ཁྱབ་ཕེབས་དོན་ལྟར། ཕྱི་ལོ་ ༢༠༡༣ ཟླ་ ༨ ཚེས་ ༨ ཉིན་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་ནས་བཀའ་བློན་ཁྲི་པའི་ལས་འཁུར་དམ་འབུལ་གནང་སྟེ་ལོ་གཉིས་ཧྲིལ་པོ་འཁོར་རྒྱུ་དང་། དུས་ཡུན་དེའི་ནང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོའི་ཐུགས་རྗེའི་བྱིན་མཐུ་དང་གཞུང་བསྟེན་ཆོས་སྲུང་རྣམས་ཀྱི་འཕྲིན་ལས། གཞིས་བྱེས་བོད་མི་ཡོངས་ཀྱི་ཡིད་ཆེས་དང་རྒྱབ་སྐྱོར། བོད་མིའི་སྒྲིག་འཛུགས་ཀྱི་མཛད་གཙོ་དང་ལས་བྱེད་རྣམས་ཀྱི་མཐུན་སྐྱོར་བཅས་ལ་བརྟེན་ནས་བོད་མིའི་སྤྱི་དོན་འགན་འཁུར་ཞུ་སྒོ་གང་ཅི་གེགས་མེད་ལམ་ལྷོངས་དང་གྲུབ་འབྲས་མི་དམན་ཙམ་བྱུང་བའི་བཀའ་དྲིན་གཏང་རག་མཚོན་ཕྱིར་དང་།
བོད་དང་བོད་མིའི་རྩ་དོན་ཆེད་ཕྱི་ལོ་ ༢༠༠༩ ནས་བཟུང་རང་ལུས་མེར་སྲེག་གནང་མཁན་འདས་གསོན་འབྲེལ་ལྟོས་ཡོངས་ཀྱི་ཆེད་དུ་མཆོག་གསུམ་༸རྒྱལ་བ་རྒྱ་མཚོར་གདུང་འབོད་གསོལ་འདེབས་ཀྱིས་གོང་ཚེས་ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དང་། དེ་བཞིན་བཙན་བྱོལ་བོད་མིའི་འདུ་སྡོད་ས་གནས་གཞན་ཁག་ནང་མཆོད་འབུལ་སྨོན་ལམ་གྱི་འདུ་འཛོམས་རྒྱས་པ་རེ་གོ་སྒྲིག་དགོས་རྒྱུ་ཞེས་བཀའ་ཤག་ནས་ཐག་གཅོད་ལམ་སྟོན་ཕེབས་འདུག་པ་བཅས།།
