༢༠༡༣ ཟླ་ ༨ ཚེས་ ༢༧ རེས་གཟའ་ཟླ་བ།
༄༅། །འདི་གར་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༣ ཟླ་ ༨ ཚེས་ ༢༦ བཏང་གནས་ནང་འཁོད་དོན། བྱང་ཕྱོགས་བོད་མིའི་ས་གནས་ཁྲིམས་ཞིབ་པ་བསྟན་འཛིན་ལྷུན་གྲུབ་ལགས་ཀྱིས། ཕྱི་ལོ་ ༢༠༡༣ ཟླ་ ༨ ཚེས་ ༡༤ ཉིན་སིམ་ལ་དགའ་ཚལ་གླིང་གི་ས་གནས་འཐུས་ཚོགས་སྐབས་བདུན་པའི་འདེམས་ཐོན་ཚོགས་མི་རྣམས་དང་ཚོགས་གཙོ། ཚོགས་གཞོན་བཅས་ཀྱི་དམ་བཅའ་འབུལ་བཞེས་ཀྱི་གནང་སྒོ་ཁག་ལེགས་གྲུབ་བྱུང་ཡོད་པ་དང་།
ཉིན་དེའི་ཕྱེད་ཡོལ་ཚོུད་ ༢། ༣༠ ནས་ ༤། ༤༥ བར་ཁུལ་དེའི་སེར་སྐྱ་མང་ཚོགས་དང་།
ཕྱི་ཚེས་ ༡༥ ཉིན་ཌོ་ལན་ཇི་མི་མང་དང་གཏན་སློབ་འཛིན་རིམ་ ༡༡ དང་ ༡༢ གཉིས་ཀྱི་སློབ་མ་དང་དགེ་རྒན། དེ་བཞིན་ཚེས་ ༡༦ ཉིན་སྔ་དྲོའི་ཚོུད་ ༩ ནས་ ༡༡་༤༠ བར་སྨན་རི་དགོན་པའི་དཔེ་མཛོད་ཁང་གི་ཚོགས་ཁང་དུ་དགེ་འདུན་པ་ ༡༠༠ སྐོར་བཅས་ལ་བཙན་བྱོལ་བོད་མིའི་ཁྲིམས་ལུགས་གོ་རྟོགས་སྤེལ་བའི་ཁོངས་དམིགས་བསལ་ཁ་མཆུ་ཞུ་གཏུག་གི་བྱ་རིམ་ཁག་དང་། གཞི་རྩའི་ཆ་རྐྱེན། ཁྲིམས་ཁོངས་ཁྱབ་ཚད། ཁ་མཆུ་འགོ་བཙུགས་པ་ནས་བཅད་ཁྲ་བར་གྱི་བྱ་རིམ། དེ་བཞིན་ཁ་མཆུ་ཕྱིར་འཐེན་དང་ནང་འགྲིག ཕྱོགས་ལྷུང་བཅས་ཀྱི་སྐོར། གཞན་ཡང་ཟུར་སྣོན་ཡིག་ཆ་ཁག གྱོད་ཡ་ཉམ་ཐག་ལ་མཐུན་རྐྱེན། དེའི་ཐོག་ཆེས་མཐོའི་ཁྲིམས་ཞིབ་ཁང་ནས་རང་རིགས་མི་མང་གི་དཀའ་ངལ་སེལ་སླད་ཟུར་འཛུགས་བོད་མིའི་ས་གནས་ཁྲིམས་ཞིབ་ཁང་ཁག་གི་འཕྲལ་སེལ་ཞུ་གཏུག་བྱ་ཡུལ་ས་གནས་བཀོད་སྒྲིག་གནང་བའི་རྩ་འཛིན་ལམ་སྟོན་བཅས་ཀྱི་སྐོར་གསལ་བསྒྲགས་གནང་བར་མང་ཚོགས་ནས་ཧ་ཅང་དོ་སྣང་ཆེན་པོ་གནང་ཡོད་པ་མ་ཟད་དྭོགས་འདྲི་བྱུང་བ་ཁག་ལ་ལན་འདེབས་གསལ་བཤད་གནང་འདུག
