༢༠༡༣ ཟླ་ ༨ ཚེས་ ༢ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༣༡ ཉིན་གྱི་ལྷག་དཀར་དང་སྟབས་བསྟུན་སེ་པན་ནང་རྟེན་གཞི་བྱས་པའི་བོད་ཁང་གི་སྣེ་འཁྲིད་འོག་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་གཙུག་ལག་སློབ་གཉེར་ཁང་ཞིག་གི་མདུན་ཐང་དུ་བོད་དོན་ངོ་སྤྲོད་ཀྱི་ལས་འགུལ་ཞིག་སྤེལ་འདུག

སྐབས་དེར་ལས་འགུལ་བ་རྣམས་ནས་ལག་ཏུ་བོད་ཀྱི་རྒྱལ་དར་དང་བོད་མིར་གདུང་སེམས་མཉམ་སྐྱེ། ཞེས་པའི་དབྱིན་ཡིག་དང་སེ་པན་གྱི་ཡི་གེ་སོགས་བཀོད་པའི་ཤོག་བྱང་ཁག་བསྣམས་ཏེ་ཁུལ་དེར་གནས་འཁོད་མང་ཚོགས་རྣམས་ལ་ཡིག་ཆ་འགྲེམས་སྤེལ་གྱི་ལམ་ནས་བོད་ནང་གི་དངོས་ཡོད་གནས་སྟངས་སྤྱི་དང་ཡང་སྒོས་ད་ལྟའི་ཛ་དྲག་གནས་སྟངས། ལྷག་པར་བོད་མི་རྣམས་ནས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན་སོགས་བོད་དོན་དང་འབྲེལ་བའི་པར་རིགས་འདྲ་མིན་སྣ་ཚོགས། དེ་བཞིན་བོད་ཀྱི་ས་ཁྲ་སོགས་འགྲེམས་སྤེལ་གནང་བ་བརྒྱུད་བོད་དོན་ངོ་སྤྲོད་ཀྱི་ལས་འགུལ་སྤེལ་འདུག་པ་བཅས། །