༢༠༡༣ ཟླ་ ༨ ཚེས་ ༢༦ རེས་གཟའ་ཟླ་བ།
༄༅། །བཀའ་ཤག་གི་བཀོད་ཁྱབ་དགོངས་དོན་ལྟར་ཕྱི་ལོ་ ༢༠༡༣ ཟླ་ ༨ ཚེས་ ༢༦ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་ནང་ཕྱི་དྲིལ་བཀའ་བློན་མཆོག་གིས་གཙོས་དྲུང་ཆེ་བཀྲ་ཤིས་ཕུན་ཚོགས་ལགས་དང། ལས་བྱེད་རྣམས་ལྷན་འཛོམས་ཐོག་བདེ་སྲུང་ལས་ཁུངས་ཀྱི་འཛིན་སྐྱོང་དྲུང་ཆེ་ཞིང་ཆེན་དངོས་གྲུབ་རྡོ་རྗེ་ལགས་ཕྱི་དྲིལ་ལས་ཁུངས་ཀྱི་དྲུང་ཆེའི་ས་མིག་ཏུགནས་སྤོས་གནང་བ་བཞིན་ལས་འཁུར་ཞུས་པའི་རྟེན་འབྱུང་གི་མཛད་སྒོ་སྟབས་བདེ་ཞིག་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༩།༤༥ ཐོག་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་གཙོ་སྐྱོང་འོག་ངོ་སྤྲོད་གསུང་བཤད་གནང་རྗེས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་དངོས་གྲུབ་རྡོ་རྗེ་ལགས་སུ་འཚམས་འདྲི་དང་ལྷན་ལས་འགན་ངོ་སྤྲོད་གནང་བའི་ནང་ཕྱི་དྲིལ་ལས་ཁུངས་ཀྱི་ཨི་ཡཱུ་རོགས་དངུལ་ལས་འཆར་དང་དཔར་སྐྲུན་ལས་འཆར། ཕབ་སྒྱུར་ལས་གཞི། བོད་གནས་དྲ་རྒྱ་བཅས་ཀྱི་ལྟ་སྐྱོང་འགན་འཁུར་ངོ་སྤྲོད་གནང་ཡོད། དེ་ནས་དངོས་གྲུབ་རྡོ་རྗེ་ལགས་ཀྱིས་རང་ཉིད་ཀྱི་རྒྱུན་གཤིས་དང་ལས་དོན་བྱེད་ཕྱོགས་དང་འབྲེལ་བའི་གསུང་བཤད་སྙིང་བསྡུས་ཤིག་གནང་གྲུབ་བསྟུན་གསོལ་ཇ་འབྲས་སིལ་ཕུལ་ཏེ་སྟབས་བདེའི་མཛད་སྒོ་དེ་བཞིན་གྲོལ་ཡོད་པ་བཅས། །
