༢༠༡༣ ཟླ་ ༨ ཚེས་ ༩ རེས་གཟའ་པ་སངས།
༄༅། །འདི་གར་ཕྱི་ལོ་ ༢༠༡༣ ཟླ་ ༨ ཚེས་ ༩ ཉིན་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གིས་བཏང་གནས་ནང་འཁོད་དོན། ཐེ་ཝན་དབུས་གྲོང་ཁྱེར་དུ་ཆགས་པའི་རྒྱལ་གཉེར་ཐེ་ཀྲུང་བུད་མེད་སློབ་འབྲིང་ནང་དབྱར་དུས་གུང་སེང་གི་བྱེད་སྒོ་སྣ་མང་སྤེལ་བའི་ཁོངས་བོད་དོན་སྐོར་གྱི་སློབ་གཞི་གཅིག་གོ་སྒྲིག་འོག་སྐུ་ཚབ་དོན་གཅོད་ཟླ་བ་ཚེ་རིང་ལགས་ཆེད་དུ་གདན་ཞུ་གནང་བ་ལྟར། ཕྱི་ཚེས་ ༢༩ ཉིན་གྱི་སྔ་དྲོ་ཆུ་ཚོད་ ༨།༡༠ ཐོག་འགོ་འཛུགས་ཀྱིས་སློབ་ཕྲུག་རྣམས་ལ་བོད་དོན་གློག་བརྙན་༼བོད་ནས་བྲོས་བྱོལ་༽དང་། ༼གངས་རིའི་ཁྲོད་ཀྱི་ལྐོག་གསོད།༽ཞེས་པ་སྟོན་རྗེས་དོན་གཅོད་ཟླ་བ་ཚེ་རིང་ལགས་ཀྱིས་ཆུ་ཚོད་གཅིག་རིང་སློབ་ཕྲུག་རྣམས་ལ་བོད་ཀྱི་རིག་གཞུང་དང་བོད་མིས་རང་ལུས་མེར་སྲེག་གཏོང་དགོས་ཐུག་པའི་རྒྱུ་རྐྱེན། བོད་མི་ཚོ་རྒྱ་གར་དུ་བྲོས་བྱོལ་ཡོང་དགོས་པའི་དོན་རྐྱེན་སོགས་ངོ་སྤྲོད་ཞིབ་ཕྲ་གནང་རྗེས་དུས་ཚོད་སྐར་མ་བཞི་བཅུ་ཙམ་རིང་སློབ་ཕྲུག་རྣམས་ཀྱི་དྲི་བ་ཁག་ལ་ལན་འདེབས་གནང་ཡོད།
ཐེངས་འདིའི་བྱེད་སྒོར་སློབ་ཕྲུག་རང་མོས་ཀྱིས་ཐོ་འགོད་འཛུལ་ཞུགས་ཀྱིས་ཁྱོན་མི་གྲངས་ ༡༠༠ བརྒལ་བ་མཉམ་ཞུགས་གནང་བ་དེ་ནི་འདས་པའི་ལོ་ཤས་ནང་ཐེ་ཝན་གཞོན་སྐྱེས་སློབ་ཕྲུག་ནང་བོད་ཀྱི་གནས་སྟངས་སྐོར་ལ་དོ་སྣང་སླེབས་ཀྱི་ཡོད་པ་མཚོན་པ་མ་ཟད། དེ་ཉིན་བོད་ཕྱི་ནང་གཉིས་ཀྱི་གནས་སྟངས་ངོ་སྤྲོད་ཡག་པོ་བྱུང་ཡོད་འདུག
