༢༠༡༣ ཟླ་ ༨ ཚེས་ ༢༦ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་ཐེ་ཝན་སློབ་ཕྲུག་བོད་དོན་རྒྱབ་སྐྱོར་ཚོགས་པས་ (SFT TW)གོ་སྒྲིག་གིས་ཕྱི་ལོ་ ༢༠༡༣ ཟླ་ ༨ ཚེས་ ༢༣ ནས་ཚེས་ ༢༥ བར་སྐབས་ལྔ་པའི་དབྱར་དུས་བོད་ཀྱི་སྒར་ཞེས་པའི་བོད་དོན་ངོ་སྤྲོད་ཀྱི་ཟབ་སྦྱོང་ཞིག་སྤེལ་ཡོད།
ཉིན་གྲངས་གསུམ་རིང་བོད་དོན་ངོ་སྤྲོད་བྱེད་སྒོ་དང་། ལེགས་སྦྱར། གློག་བརྙན། བགྲོ་གླེང་སོགས་སློབ་གཞི་སྣ་མང་ཞིག་གོ་སྒྲིག་གནང་ཡོད། བོད་དོན་ངོ་སྤྲོད་བྱེད་སྒོའི་ནང་སློབ་ཕྲུག་ཚོར་རི་མོ་དང་། པར་རིགས། ལས་འགུལ་སྤེལ་ཕྱོགས་སྐོར་སློབ་སྟོན་དང་། ཉིན་དང་པོའི་བོད་དོན་ལེགས་སྦྱར་ནི་ཐེ་ཝན་བོད་ཀྱི་སྐུ་ཚབ་དོན་ཁང་གི་དྲུང་ཆེ་བསོད་ནམས་རྡོ་རྗེ་ལགས་ཀྱིས་རྒྱ་གཞུང་གི་སྲིད་བྱུས་འོག་བོད་ཀྱི་ཆོས་ལུགས་རང་དབང་ཞེས་པའི་བརྗོད་གཞིའི་ཐོག་སློབ་ཕྲུག་རྣམས་ལ་བོད་ནང་གི་གནས་སྟངས་ངོ་སྤྲོད་ཀྱི་གསུང་བཤད་གནང་།
ཉིན་གཉིས་པར་ཐེ་ཝན་གྱི་དགེ་རྒན་ལུའུ་ཧུད་ཅོན་ལགས་ཀྱིས་བཙན་བྱོལ་བོད་མིའི་སློབ་གསོ་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་ཅིང་། ཁོང་ནི་དེ་སྔ་བཙན་བྱོལ་བོད་མིའི་སྡོད་སྒར་དུ་ཐེངས་མང་བསྐྱོད་ནས་གཙོ་བོ་བོད་པའི་སློབ་གྲྭ་ཁག་ལ་ཉམས་ཞིབ་ཀྱིས་བཙན་བྱོལ་བོད་མིའི་ཤེས་ཡོན་གླེང་བ་ཞེས་པའི་དེབ་གཅིག་འབྲི་མྱོང་ཡོད། གཞན་ཡང་ཐེ་ཝན་དུ་གནས་སྡོད་བོད་མི་དང་སློབ་ཕྲུག་དབར་ཕན་ཚུན་བསམ་ཚུལ་བརྗེ་ལེན་དང་། སློབ་ཕྲུག་ནང་ཁུལ་བོད་དོན་སྐོར་རང་རང་གི་བལྟ་ཚུལ་སོགས་ཀྱི་སྐོར་ལ་བགྲོ་གླེང་བྱས་ཡོད།
ཐེ་ཝན་དབྱར་དུས་སློབ་གྲྭའི་གུང་སེང་དང་སྟབས་བསྟུན་སློབ་ཕྲུག་བོད་དོན་རྒྱབ་སྐྱོར་ཚོགས་པས་དྲ་ལམ་བརྒྱུད་དབྱར་དུས་བོད་ཀྱི་སྒར་ཞེས་པའི་ལས་འགུལ་ཁྱབ་བསྒྲགས་དང་། དེའི་ནང་ཞུགས་མཁན་སློབ་ཕྲུག་ཚོས་རང་མོས་ཐོ་འགོད་ཀྱིས་སློབ་ཕྲུག་གྲངས་ཉི་ཤུ་ལྷག་ལ་ཟབ་སྦྱོང་སྤྲོད་ཀྱི་ཡོད་པ་དང་། ལོ་ལྟར་ཟབ་སྦྱོང་ནང་ཞུགས་མཁན་སློབ་ཕྲུག་ཁག་གཅིག་མུ་མཐུད་སློབ་ཕྲུག་ཚོགས་པའི་ཚོགས་མིར་གསར་ཞུགས་དང་། ཁག་གཅིག་གིས་རང་རང་གི་སློབ་གྲྭ་ཁག་ནང་བོད་དོན་གློག་བརྙན་དང་། བོད་དོན་ངོ་སྤྲོད་ལེགས་སྦྱར་སོགས་གོ་སྒྲིག་ཞུ་བཞིན་ཡོད་ལ། ཐེ་ཝན་ནང་བོད་དོན་གྱི་ལས་འགུལ་སྤེལ་སྐབས་སློབ་ཕྲུག་དེ་དག་གིས་རྒྱབ་སྐྱོར་གྱི་མཉམ་ཞུགས་བྱེད་ཀྱི་ཡོད་པ་རེད། དེང་སྐབས་ཐེ་ཝན་ནང་གི་གཞོན་སྐྱེས་རྣམས་ལ་བོད་དོན་གོ་རྟོགས་རྒྱ་ཆེ་རུ་འགྲོ་བཞིན་ཡོད་པ་བཅས།།
