༢༠༡༣ ཟླ་ ༧ ཚེས་ ༡ རེས་གཟའ་ཟླ་བ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༦ ཚེས་ ༢༨ ཉིན་ཨ་རིའི་ཕྱི་སྲིད་ལས་ཁུངས་ཀྱི་རྒྱུན་ལྡན་བཞིན་གསར་འགོད་པའི་དྲི་ལན་སྐབས། ཕྱི་སྲིད་ལས་ཁུངས་ཀྱི་མགྲིན་ཚབ་པ་ (Patrick Vintrell) མཆོག་གིས་གསུང་དོན། སྐུ་ཞབས་གྷེ་རེ་ལོཀ་མཆོག་གིས་བོད་རང་སྐྱོང་ལྗོངས་ཀྱི་ཏང་གི་དྲུང་ཆེ་གྲན་ཆོན་གོ་དང་ལྷ་ས་གྲོང་ཁྱེར་གྱི་ཏང་གི་དྲུང་ཆེ་ཆེ་དགྲ་ལྷ་སོགས་འགོ་ཁྲིད་ཁག་གཅིག་དང་མཇལ་འཕྲད་གནང་ཡོད་ཅིང་། མཇལ་འཕྲད་དེའི་སྐབས་ལྷ་ས་གྲོང་ཁྱེར་གྱི་ཉེ་འཁོར་གྱི་དགེ་འདུན་པའི་འགོ་འཁྲིད་ཁག་གཅིག་ཀྱང་མཉམ་ཞུགས་བྱས་ཡོད་པ་རེད། དེ་བཞིན་གཞུང་ཚབ་ཆེན་མོས་བོད་རང་སྐྱོང་ལྗོངས་ཀྱི་འགོ་ཁྲིད་ཚོར་བོད་ཀྱི་སྐད་ཡིག་དང་། རིག་གཞུང་། ཆོས་ལུགས་སོགས་ལ་བདག་གཅེས་སྲུང་སྐྱོབ་དགོས་པའི་འབོད་སྐུལ་ནན་པོ་གནང་བ་མ་ཟད། རང་ལུས་མེར་སྲེག་གཏོང་བའི་གནད་དོན་ཐད་ཐུགས་འཚབ་ཆེན་པོ་ཡོད་སྐོར་གསལ་བཤད་གནང་འདུག ཅེས་འགྲེལ་བརྗོད་གནང་ཡོད་པ་མ་ཟད། ལྷག་པར་ཁོང་གིས་གསུང་གསལ། བོད་ནང་ཕྱི་རྒྱལ་གསར་འགོད་པ་དང་ཡུལ་འཁོར་སྤྲོ་འཆམ་པ་སོགས་འགྲོ་བསྐྱོད་ཆོག་པའི་རང་དབང་ཆེ་རུ་གཏོང་དགོས་པའི་འབོད་སྐུལ་ཡང་གནང་ཡོད་སྐོར་གསུངས་འདུག་པ་བཅས། །
