༢༠༡༣ ཟླ་ ༧ ཚེས་ ༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༧ ཚེས་ ༨ ཉིན་གྱི་སྔ༞་དྲོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་སྡེ་ར་ལྡུན་མེ་འཁོར་འབབ་ཚུགས་སུ་ཕེབས་འབྱོར་སྐབས་སྡེ་ར་ལྡུན་གྱི་ས་གནས་འགོ་འཛིན་གྱིས་གཙོས་ས་གནས་གཞིས་སྒར་དང་སློབ་གྲྭ དགོན་སྡེ་ཁག་གི་གནད་ཡོད་མི་སྣ་ལྔ་བཅུ་བརྒལ་བས་ཕེབས་བསུ་ཞུས་འདུག དེ་ནས་ཚུ་ཚོད་ ༡༡ ཙམ་ལ་བདེ་སྐྱིད་གླིང་ས་གནས་ཀྱི་སྤྱི་མིའི་ཚོགས་ཁང་ཆེན་པོའི་ནང་སྲིད་སྐྱོང་མཆོག་གིས་དབུས་ས་གནས་སྡེ་ར་ལྡུན་བྱང་ཕྱོགས་ཁྲིམས་ཞིབ་པ་ཆེ་བ་མཆོག་དང་ས་གནས་འགོ་འཛིན། ས་གནས་གྲོས་ཚོགས་ཀྱི་ཚོགས་གཙོ་བགྲེས་གཞོན་
ཀྱིས་གཙོས་གཞུང་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་རྣམ་པ། དགོན་སྡེ་དང་སློབ་གྲྭ་ཁག་གི་འགན་འཛིན་རྣམ་པ། ས་གནས་མི་མང་སོགས་ཁྱོན་མི་གྲངས་ཆིག་སྟོང་བརྒལ་བ་འདུ་འཛོམས་ཀྱིས་ཐོག་མར་འཕགས་བོད་གཉིས་ཀྱི་རྒྱལ་གླུ་བཏང་གྲུབ་མཚམས་ས་གནས་འགོ་འཛིན་གྱིས་ས་གནས་ཀྱི་ལས་དོན་བྱེད་ཕྱོགས་ངོ་སྤྲོད་གནང་ཡོད།
དེ་ནས་སྲིད་སྐྱོང་མཆོག་གིས་
དེར་འདུས་སེར་སྐྱ་མི་མང་ལ་བཀའ་ཤག་གི་ལས་དོན་བྱེད་ཕྱོགས་ཐོག་གསུང་བཤད་གནང་དོན། དེ་རིང་ང་རང་འདི་གར་ཡོང་སྟེ་ཁྱེད་རྣམས་དང་ཐུག་རྒྱུ་བྱུང་ཡོད། ང་རང་བཀའ་ཤག་ཏུ་སླེབས་ནས་ལོ་གཉིས་ཉེ་བའི་ནང་སྤྱི་ཡོངས་ཐོག་ནས་ལྟ་སྐབས། རྡོག་རྩ་ཆིག་སྒྲིལ་གྱི་རྣམ་པ་ཧ་ཅང་ཤུགས་ཆེན་པོ་ཡོང་གི་འདུག དེ་ནི་རྒྱལ་སྤྱི་ཐོག་ནས་བལྟས་ཀྱང་གཟིགས་བརྗིད་རེད་འདུག དེ་བཞིན་རྒྱ་ནག་གཞུང་ཡང་ཏན་ཏན་བསམ་བློ་གཏོང་དགོས་པ་ཞིག་ཆགས་ཡོད། བོད་ནང་གི་བོད་མི་ཚོ་ཡིན་རུང་བཙན་བྱོལ་ནང་ཡོད་པའི་བོད་མི་ཚོས་སྣང་དག་མི་འདུག་བསམས་པ་ཞིག་ཏན་ཏན་ཡོང་གི་རེད། དེ་ནི་ང་ཚོ་ཚང་མས་ཕྱར་གྲུ་མཉམ་འདེགས་གནང་བའི་བཀའ་དྲིན་ལ་བརྟེན་ནས་བྱུང་བ་ཞིག་རེད། དབུ་མའི་ལམ་གྱི་སྲིད་རྒྱུས་གཏན་ལ་ཕབ་པ་དེའི་ཐོག་མུ་མཐུད་ཕྱིན་ན། དེ་ལ་བརྟེན་ནས་ཕུགས་ལ་བོད་དོན་བདེན་མཐལ་གསལ་རྒྱུའི་རེ་བ་ཞིག་ཆགས་ཀྱི་ཡོད།
རྒྱལ་སྤྱིའི་ཐོག་ནས་ཀྱང་དབུ་མའི་ལམ་ལ་མོས་མཐུན་དང་རྒྱབ་སྐྱོར་ཡོད་པའི་རྣམ་པ་རྒྱལ་ཁབ་ཁག་ནས་གྲོས་ཆོད་བཞག་ཡོད་པ་སོགས་ཧ་ཅང་གསལ་པོ་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད། དེ་ནས་སྲིད་སྐྱོང་མཆོག་དང་ནང་སྲིད་དྲུང་ཆེ་བཅས་མངོན་དགའ་སློབ་གྲྭ་དང་ར་ཇཱ་པུའི་རྒན་གསོ་ཁང་སོགས་ལ་གཟིགས་སྐོར་དུ་ཕེབས་ཡོད་པ་མ་ཟད། ལྷག་པར་སྲིང་སྐྱོང་མཆོག་གིས་ར་ཇཱ་པུའི་བོད་ཁྱིམ་སློབ་གྲྭར་དགེ་སློབ་རྣམ་པས་གཙོས་ཉེ་འཁོར་གྱི་སེར་སྐྱ་མི་དམངས་བཅས་ལ་གསུང་བཤད་དང་དམིགས་བསལ་སློབ་ཕྲུག་ཚོར་གསུང་བཤད་གནང་གྲུབ་མཚམས་མ་སུ་རིར་ཕེབས་ཐོན་གནང་ཡོད་པ་བཅས། །
