༢༠༡༣ ཟླ་ ༧ ཚེས་ ༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༢༨ ཉིན་སྲིད་སྐྱོང་བློ་བཟང་སེང་གེ་མཆོག་གིས་བོད་ཀྱི་སྨན་རྩིས་ཁང་གི་ཚོགས་ཁང་དུ་ལུས་སེམས་སྲོག་གི་བགྲོ་གླེང་ཚོགས་ཆེན་གྱི་མཇུག་བསྡོམས་མཛད་སྒོར་གསུང་བཤད་གནང་ཡོད།
དེ་ཉིན་ཕྱི་དྲོ་ཆུ་ཚོད་ ༥།༣༠ ཐོག་སྐུ་མགྲོན་གཙོ་བོ་སྲིད་སྐྱོང་བློ་བཟང་སེང་གེ་མཆོག་དང་། བོད་ཀྱི་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་དང་། དྲུང་ཆེ་ཚེ་རིང་ཕུན་ཚོགས་ལགས། བགྲོ་གླེང་ནང་གཏམ་བཤད་གནང་མཁན་རྣམ་པ་དང་། སྨན་རྩིས་ཁང་གི་ཡན་ལག་ཁག་གི་འགན་འཛིན་རྣམ་པ། སྨན་རྩིས་ཁང་གི་ལས་སློབ་བཅས་ལྷན་འཛོམས་ཐོག་སྐུ་མགྲོན་གཙོ་བོ་སྲིད་སྐྱོང་མཆོག་གིས་ཆེད་དུ་གདན་ཞུས་བགྲོ་གླེང་ཐོག་གཏམ་བཤད་གནང་མཁན་རྣམ་པ་དང་ཚོགས་ཆེན་ལ་རམ་འདེགས་གནང་མཁན་རྣམ་པར་བཀའ་དྲིན་ལེགས་གསོའི་ཕྱག་རྟགས་དང་། ཚོགས་ཞུགས་པ་ཡོངས་ལ་ཕྱག་འཁྱེར་གནང་སྟེ་ཚོགས་ཞུགས་མི་སྣ་གསུམ་ནས་ཚོར་སྣང་དང་འབྲེལ་བའི་གསུང་བཤད་གནང་གྲུབ་བསྟུན། གོ་སྒྲིག་ཚོགས་ཆུང་གི་སྨན་པ་བསོད་ནམས་སྒྲོལ་དཀར་ལགས་ཀྱིས་ཚོགས་འདུའི་ལས་བསྡོམས་སྙིང་བསྡུས་སྒྲོགས་སྦྱང་རྗེས་འགན་འཛིན་ཚེ་རིང་བཀྲ་ཤིས་ལགས་ཀྱིས་གསུང་བཤད་གནང་དོན།
ང་རང་སྨན་རྩིས་ཁང་གི་འགན་འཛིན་དུ་སླེབས་ཏེ་ལོ་གཅིག་དང་ཟླ་བ་ཁ་ཤས་ཕྱིན་པ་དེའི་རིང་༸གོང་ས་མཆོག་གི་མཇལ་བཅར་ཐེངས་བཞི་ཙམ་ཞུ་རྒྱུའི་སྐལ་བཟང་གོ་སྐབས་ཐོབས་སྐབས་མགོན་པོ་གང་ཉིད་མཆོག་གིས་སྨན་ཁང་དང་སྨན་པ་མང་པོ་ཡོད། དེ་བཞིན་མ་དངུལ་ཡང་གང་ཙམ་ཡོད་སྙམ་ཏེ་ཚོད་ཚོད་བྱས་ཏེ་མ་བསྡད་པར་གོ་སྐབས་བླང་སྟེ་རྒྱུན་གཏན་ནས་འཛིན་སྐྱོང་ཚགས་ཚུད་བྱེད་དགོས་པའི་བཀའ་སློབ་ཕེབས་ཡོད་སྐོར་སོགས་ཀྱི་གསུང་བཤད་གནང་ཡོད།
དེ་ནས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། བཀའ་ཤག་སྐབས་བཅུ་བཞི་པའི་ངོས་ནས་ཚོགས་བཅར་བ་ཡོངས་ལ་འཚམས་འདྲི་དང་འབྲེལ་སྨན་རྩིས་ཁང་གི་ལས་དོན་ཁག་བཀའ་ཤག་གི་ལྟ་གྲུབ་གསུམ་སྟེ་ཆིག་སྒྲིལ། གསར་གཏོད། རང་ཁ་རང་གསོ་ཡིན་པ་ལྟར་དངོས་སུ་ལག་བསྟར་འགྲོ་བཞིན་ཡོད། དེ་བཞིན་༸གོང་ས་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་བོད་མི་རིགས་ཀྱི་རིག་གཞུང་ཕྱུག་པོ་ཡོད་པ་དེ་འཛམ་གླིང་ཁྱོན་ཡོངས་ལ་ཁྱབ་སྤེལ་བྱུང་ཡོད་པ་མ་ཟད། ནང་དོན་རིག་པ་དང་གསོ་བ་རིག་པས་འགྲོ་བ་མི་སྤྱི་ཡོངས་ལ་ཕན་ཐོགས་ཆེན་པོ་ཡོང་བཞིན་ཡོད། ལྷག་པར་ནང་ཆོས་དང་ཚན་རིག་དབར་སེམས་དང་སྲོག་གི་ཚོགས་འདུ་མང་པོ་ཚོགས་ཏེ་སྤྱི་ཡོངས་ནས་ཕན་རླབས་ཆེན་པོ་ཡོད་པའི་ཁས་ལེན་བྱུང་ཡོད། འདི་ག་སྨན་རྩིས་ཁང་ནས་ལུས་སེམས་སྲོག་གསུམ་ཐོག་བགྲོ་གླེང་ཚོགས་ཆེན་ཐེངས་དང་པོ་ཚོགས་པར་བཀའ་ཤག་གི་ལྟ་གྲུབ་གསར་གཏོད་ལྟར་ཧ་ཅང་ཡག་པོ་བྱུང་འདུག དེར་བརྟེན་ཚོགས་འདུ་གོ་སྒྲིག་གནང་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་མཚམས་གོ་སྒྲིག་ཚོགས་ཆུང་གི་ཚོགས་གཙོ་སྨན་རམས་པ་བསོད་ནམས་སྒྲོལ་མ་ལགས་ཀྱིས་ཐུགས་རྗེ་ཆེ་ཞུས་རྗེས་སྨན་རྩིས་བསྟན་རྒྱས་པའི་སྨོན་ལམ་གསུངས་ཏེ་ཚོགས་འདུ་ཡོངས་སུ་ལེགས་གྲུབ་བྱུང་ཡོད་པ་བཅས།།
