༢༠༡༣ ཟླ་ ༧ ཚེས་ ༤ རེས་གཟའ་ཕུར་བུ།
༄༅། །བོད་མི་མང་ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་སེ་པན་རྒྱལ་ཁབ་ཀྱི་ཁོངས་སུ་གཏོགས་པའི་ཚད་མཐོའི་རང་སྐྱོང་གི་བདག་དབང་ཡོད་པའི་ཁ་ཏ་ལུ་ནི་ཡའི་མངའ་སྡེའི་(Catalonia)གྲོས་ཚོགས་ཀྱི་ཚོགས་གཙོས་དབུས་འབྲེལ་ཡོད་གྲོས་ཚོགས་ཀྱི་འཐུས་མི་རྣམ་པར་མཇལ་འཕྲད་ཞུས་ཏེ་བོད་ནང་གི་བོད་མིར་སྡུག་བསྔལ་དང་དངངས་སྐྲག་ཡོད་སྐོར་གསལ་བཤད་དང་འབྲེལ་ཁ་ཏ་ལུའི་གྲོས་ཚོགས་ནང་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་གནང་མཁན་གྱི་ཚོགས་ཆུང་ཞིག་གསར་འཛུགས་གནང་སྐྱོང་ཡོང་བའི་རེ་འདུན་ཞུས་འདུག
དེ་ཡང་ཕྱི་ལོ་ ༢༠༡༣ ཟླ་ ༧ ཚེས་ ༣ ཉིན་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། འདི་ཟླའི་ཚེས་ ༡ ཉིན་ཡུ་རོབ་སྤྱི་འཐུས་ཀྱིས། ཁ་ཏ་ལུའི་གྲོས་ཚོགས་ཁང་ནང་བཅར་ཏེ་གྲོས་ཚོགས་ཀྱི་ཚོགས་གཙོས་དབུས་ཕྱི་འབྲེལ་སྡེ་ཚན་གྱི་འཐུས་མི་རྣམ་པ་དང་། དེ་བཞིན་ཡུ་རོབ་གྲོས་ཚོགས་ཀྱི་འཐུས་མིའི་མཚན་གནས་ཡོད་པའི་འཐུས་མི་རྣམ་པ། གཞན་ཡང་འགྲོ་བ་མིའི་ཐོབ་ཐང་གི་འཐུས་མི་སོགས་དང་ཐུག་འཕྲད་སྐབས་གསུང་དོན། རྒྱ་ནག་གཞུང་གིས་བོད་ལ་དབང་སྒྱུར་བྱས་པ་ནས་བཟུང་བོད་མི་རིགས་ཀྱི་ཆོས་དང་རིག་གཞུང་རྩ་མེད་བཟོ་རྒྱུའི་གོམ་སྟབས་མགྱོགས་སུ་བཏང་བར་བརྟེན། བོད་མི་རྣམས་འུ་ཐུག་ཐབས་ཟད་དེ་དུས་ད་ལྟ་བར་བོད་མི་ ༡༡༩ ནས་བོད་ཀྱི་བདེན་དོན་ཆེད་རང་ལུས་མེར་སྲེག་བཏང་ཡོད། དེ་བཞིན་རྣམ་པ་འདྲ་མིན་གྱི་སྒོ་ནས་ཞི་རྒོལ་གནང་མཁན་རྒྱུན་ཆད་མེད་པ་ཡོང་བཞིན་ཡོད། ཁོང་རྣམ་པའི་ཐོག་རྒྱ་ནག་གཞུང་གིས་གདུག་རྩུབ་ཀྱི་སྲིད་བྱུས་ཁོ་ན་བེད་སྤྱོད་གཏོང་གི་ཡོད། ལྷག་པར་བོད་མིའི་སྒྲིག་འཛུགས་ངོས་ནས་༸གོང་ས་མཆོག་གིས་འདོན་གནང་མཛད་པའི་དབུ་མའི་ལམ་གྱི་དགོངས་དོན་གཞིར་བཟུང་རྒྱ་བོད་ཞི་མོལ་གནང་རྒྱུའི་ཐོག་གྲ་སྒྲིག་ཨང་གསར་ཡོད་སྐོར་ཚོགས་གཙོ་མཆོག་ལ་ཞུ་སྐབས། ཁོང་གིས་བསྔགས་བརྗོད་གནང་འདུག ལྷག་པར་ཡུ་རོབ་སྤྱི་འཐུས་ཀྱིས་འབྱུང་འགྱུར་གྲོས་ཚོགས་ཀྱི་འཐུས་མི་ལས་གྲུབ་པའི་བོད་དོན་རྒྱབ་སྐྱོར་ཚོགས་ཆུང་ཞིག་གསར་འཛུགས་དགོས་པའི་རེ་སྐུལ་ཞུས་པ་ལྟར། ཁོང་རྣམ་པས་ཐབས་ཤེས་བྱེད་རྒྱུ་ཡིན་སྐོར་སོགས་གསུངས་འདུག་པ་བཅས། །
