༢༠༡༣ ཟླ་ ༧ ཚེས་ ༡ རེས་གཟའ་ཟླ་བ།
༄༅། །༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༦ ཚེས་ ༢༨ རེས་གཟའ་པ་སངས་ཉིན་སྐུ་ཞབས་ཀེ་ཝིན་ར་ཌི་ Kevin Rudd མཆོག་ཨོ་སི་ཊོ་ལི་ཡའི་སྲིད་བློན་གསར་པར་བསྐོ་གཞག་བྱུང་དང་། ཡང་སྐུ་ཞབས་ཚག་ཧེ་ཇིན་ཨེལ་བྷེག་ཌོར་ Tsakhiagiin Elbegdor མཆོག་སོག་པོའི་སྲིད་འཛིན་གསར་པར་སླར་ཡང་འདེམས་ཐོན་བྱུང་བར་དབུ་ཁྲིད་རྣམ་གཉིས་སོ་སོར་འཚམས་འཕྲིན་སྩལ་ཡོད། དེ་ཡང་གསར་དུ་བསྐོ་གཞག་གནང་བའི་ཨོ་སི་ཊོ་ལི་ཡའི་སྲིད་བློན་སྐུ་ཞབས་ཀེ་ཝིན་ར་ཌི་མཆོག་ལ་སྩལ་བའི་འཚམས་འཕྲིན་ནང་། མགོན་པོ་གང་ཉིད་མཆོག་ཉེ་ལམ་ཨོ་སི་ཊོ་ལི་ཡའི་ནང་ཉིན་བཅུ་བཞུགས་རིང་ཁུལ་དེའི་ལས་སྣེ་འདྲ་མིན་ནང་འཚོ་གནས་བྱེད་བཞིན་པའི་མང་ཚོགས་རྣམས་ཀྱིས་མཛའ་བརྩེ་ཆེན་པོའི་ཐོག་ནས་དགའ་བསུ་དང་སེམས་ཐག་ཉེ་པོ་བྱས་པ་དེས་ཐུགས་འགུལ་ཧ་ཅང་ཐེབས་གནང་མཛད་པ་མ་ཟད། འགྲོ་བ་མིའི་བཟང་པོའི་རིན་ཐང་བརྒྱུད་སྤྱི་ཚོགས་བདེ་སྐྱིད་ལྡན་པ་ཞིག་བསྐྲུན་ཐུབ་རྒྱུའི་སྙིང་སྟོབས་འཁྲུངས་ཡོད་སྐོར་འཁོད་འདུག
ཕྱོགས་མཚུངས་༸གོང་ས་མཆོག་གིས་སོག་པོའི་སྲིད་འཛིན་གསར་པ་མཆོག་ལ་སྩལ་བའི་འཚམས་འཕྲིན་ནང་། མགོན་པོ་གང་ཉིད་མཆོག་ཕྱི་ལོ་ ༢༠༡༡ ལོར་ཁུལ་དེར་ཆིབས་སྒྱུར་བསྐྱངས་སྐབས་ཁོང་དང་མཇལ་འཕྲད་མཛད་པ་ཐུགས་དྲན་གསོ་མཛད་དེ། དེང་སྐབས་སོག་པོའི་ནང་ཡར་རྒྱས་ཧ་ཅང་འགྲོ་བཞིན་པ་དེ་གཞན་གྱིས་སྨོན་དགོས་པ་མ་ཟད། སོག་པོའི་མི་མང་དཀྱུས་མའི་མི་ཚེར་ཕན་ཐོགས་ཡོང་རྒྱུ་ཡིན་པར་བརྟེན། ཡར་རྒྱས་དེ་ནི་དོན་ལ་གནས་པ་ཞིག་ཆགས་ཡོད་སྐོར་འཁོད་འདུག་པ་བཅས།།
