༢༠༡༣ ཟླ་ ༦ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༢༧ ཉིན་རྡ་ས་ནང་ཆོས་ངོ་སྤྲོད་ཚོགས་ཆུང་དང་རྡ་སྟེང་བོད་ཁྱིམ་སློབ་གྲྭ་གཉིས་ཀྱི་གོ་སྒྲིག་ཐོག་རྡ་སྟེང་བོད་ཁྱིམ་ཚོགས་ཁང་དུ་མཐོ་སློབ་ཁག་གི་སློབ་ཕྲུག་གཙོ་བོར་གྱུར་པའི་བོད་རིགས་གཞོན་སྐྱེས་ནང་ཆོས་དོན་གཉེར་བ་ཚོར་རྒྱལ་བའི་གསུང་འབུམ་ལེགས་བཤད་བློ་གསར་མིག་འབྱེད་ཀྱི་བཀའ་ཁྲིད་དབུ་འཛུགས་བསྐྱངས་ཡོད། དེ་ཉིན་སྔ་དྲོ་ཆུ་ཚོད་ ༨།༤༥ ཐོག་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེས་དབུས་བོད་ཁྱིམ་སློབ་གྲྭ་ཁག་གི་ཆོས་དགེ་རྣམ་པ། བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས་ཀྱི་དབུས་བོད་ཁྱིམ་སློབ་གྲྭ་ཁག་གི་འགན་འཛིན་རྣམ་པ། རྡ་ས་ནང་ཆོས་ངོ་སྤྲོད་ཚོགས་ཆུང་གི་འགན་འཛིན་ཟླ་བ་ཚེ་རིང་ལགས་དང་ནང་ཆོས་ཚོགས་ཆུང་གི་སློབ་མ་དང་གཞན་རྒྱ་གར་ནང་གི་མཐོ་སློབ་འདྲ་མིན་ཁག་གི་སློབ་ཕྲྲུག
དེ་བཞིན་རྡ་སྟེང་བོད་ཁྱིམ་སློབ་ཕྲུག་བཅས་ཁྱོན་མི་གྲངས་ ༢༦༠༠ བརྒལ་བ་ལྷན་འཛོམས་ཐོག་བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས་དང་། རྡ་སྟེང་བོད་ཀྱི་སློབ་སྤྱི་ཚེ་དབང་བཀྲ་ཤིས་ལགས་དང་ངེས་སྟོན་པ་དངོས་སྒྲུབ་དབང་འདུས་ལགས། ནང་ཆོས་ངོ་སྤྲོད་ཚོགས་ཆུང་གི་འགན་འཛིན་ཟླ་བ་ཚེ་རིང་ལགས་བཅས་ཀྱིས་གདན་ཞུའི་མཇལ་དར་དང་སྤོས་སྣེས་སྔོན་བསུས་ཏེ་སློབ་ཕྲུག་གི་ཕེབས་བསུའི་གླུ་དབྱངས་ཕུལ་མཚམས། མགོན་པོ་གང་ཉིད་མཆོག་བོད་ཁྱིམ་ཚོགས་ཁང་དུ་༸ཞབས་སོར་འཁོད་རྗེས་ནང་ཆོས་ངོ་སྤྲོད་ཚོགས་ཆུང་གི་དགེ་བཤེས་བློ་བཟང་གྲགས་པ་ལགས་ཀྱི་འཛིན་གྲྭའི་སློབ་མ་ཁག་གཅིག་གིས་ཕར་ཕྱིན་རྟགས་གསལ་གཟིགས་འབུལ་ཞུས་རྗེས་རྣམ་གྲྭ་ཐུབ་བསྟན་ཡར་འཕེལ་ལགས་ཀྱིས་རྩོམ་སྒྲིག་གནང་བའི། ༼ཕོ་བྲང་པོ་ཏ་ལའི་དཀར་ཆགས་རྒྱས་པ་བོད་ཡུལ་རྒྱན་གཅིག ༽ཅེས་པའི་དཔེ་དེབ་དབུ་འབྱེད་གནང་སྒྲུབ་བསྟུན་༸གོང་ས་མཆོག་གིས་སྔོན་འགྲོའི་ནང་ཆོས་ངོ་སྤྲོད་མཛད་པའི་ནང་ཕྱི་དངོས་པོ་ཁོ་ནས་མིའི་བདེ་སྐྱིད་སྐྲུན་མི་ཐུབ་པར་བརྟེན་བྱམས་བརྩེ་དང་བཟོད་བསྲན་སོགས་ནང་གི་བསམ་བློའི་རིན་ཐང་དེ་དག་གོང་མཐོར་བཏང་བ་བརྒྱུད་སེམས་ནང་བདེ་སྐྱིད་སྐྲུན་ཐབས་ལ་འབད་དགོས་པ་དང་། དེ་ཡང་ཆོས་དང་མ་འབྲེལ་བའི་མིའི་བཟང་སྤྱོད་ཀྱི་རིན་ཐང་གོང་འཕེལ་གཏོང་དགོས་པའི་སྔོན་འགྲོའི་ཆོས་འབྲེལ་ངོ་སྤྲོད་མཛད་རྗེས་ལེགས་བཤད་བློ་གསར་མིག་འབྱེད་དཔེ་ཁྲིད་དབུ་འཛུགས་གྲུབ་རྗེས་སློབ་མ་ཁག་གཅིག་གི་དྲི་བར་ཡང་བཀའ་ལན་མཛད་ཡོད། ད་ཐེངས་བོད་རིགས་གཞོན་སྐྱེས་གཙོ་བོར་གྱུར་པའི་ནང་ཆོས་ངོ་སྤྲོད་འདི་ནི་ཐེངས་བདུན་པ་དེ་ཆགས་ཡོད།
ཐེངས་འདིར་ཆོས་ཞུར་བཅར་མཁན་རྒྱ་གར་ནང་གི་མཐོ་སློབ་ཁག་ ༥༩ དང་ཕྱི་རྒྱལ་ཡུལ་ལུང་ ༦ ནས་མཐོ་སློབ་ཁག་ ༡༡ ཁྱོན་མཐོ་སློབ་ཁག་ ༧༠ ནས་སློབ་ཕྲུག་ ༥༥༠ དང་བོད་ཁྱིམ་སློབ་གྲྭ་ཁག་ནས་སློབ་ཕྲུག་གྲངས་ ༡༡༢༡ དང་ཤེས་རབ་དགའ་ཚལ་སློབ་གླིང་ནས་སློབ་མ་གྲངས་ ༢༤༥ དང་རྡ་ས་ནང་ཆོས་ངོ་སྤྲོད་ཚོགས་ཆུང་ནས་སློབ་མ་གྲངས་ ༩༤ གཞན་ཡང་ནང་ཆོས་དོན་གཉེར་བའི་གཞོན་སྐྱེས་དང་མི་མང་བཅས་ཁྱོན་བསྡོམས་མི་གྲངས་ ༢༦༠༠ བརྒལ་བ་བཅར་འདུག་པ་བཅས་སུ།།
