༢༠༡༣ ཟླ་ ༦ ཚེས་ ༡༤ རེས་གཟའ་པ་སངས།
༄༅། གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༢ ནང་རྒྱ་ནག་གཞུང་གིས་བོད་ནང་རང་ལུས་མེར་སྲེག་སྐོར་ལ་བརྙན་འཕྲིན་བཟོས་ནས་རྒྱལ་སྤྱིའི་སྟེང་བཀྲམ་ཡོད་པའི་ནང་། ཨ་མདོ་རེབ་གོང་ས་ཁུལ་དུ་ལོ་མང་རིང་དགེ་རྒན་གྱི་ལས་ཀ་བྱས་ཏེ་དེང་སྐབས་ལས་འཁྱུར་ངལ་གསོ་བྱས་ཡོད་པའི་ནམ་མཁའ་བྱམས་ལགས་ཆེད་དུ་བསྟན་ནས་རྒྱལ་ཁབ་ཀྱི་ཕོགས་ཟ་བཞིན་པའི་ལས་བྱེད་གཅིག་གིས་རྒྱལ་ཁབ་ཁ་བྲལ་གཏོང་བའི་ངོ་རྒོལ་བྱེད་བཞིན་ཡོད་པར་ཉེས་འཛུགས་བྱས་ནས་དྲིལ་བསྒྲགས་ཤུགས་ཆེ་བྱས་ཡོད།
དེ་ཡང་འདི་ལོའི་ཕྱི་ཟླ་ ༥ ཟླ་འགོ་ཙམ་ལ་རྨ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ཟེར་བ་ནས་རེབ་གོང་དང་རྩེ་ཁོག་རྫོང་གཉིས་ཀྱི་ཡོངས་གྲགས་ཁྲིམས་ར་བཙུགས་ཏེ་དགེ་རྒན་ནམ་མཁའ་བྱམས་ལགས་གཙོས་བོད་མི་བཞི་ལ་རེབ་གོང་ཁུལ་དུ་རང་ལུས་མེར་སྲེག་གི་འདྲ་པར་དང་གནས་ཚུལ་སོགས་ཕྱི་ཕྱོགས་སུ་བཏང་པའི་བསྙད་འདོགས་དང་རྒྱལ་ཁབ་ཁ་བྲལ་གཏོང་རྒྱུའི་ངན་བསྐུལ་བྱས་པའི་ཉེས་འཛུགས་ཀྱིས་དགེ་རྒན་གནམ་མཁའ་བྱམས་ལགས་སུ་དུས་བཀག་བཙོན་འཇུག་ལོ་ ༦ དང་ཆབ་སྲིད་ཁེ་དབང་ལོ་ ༣ འཕྲོག་རྒྱུ་དང་། གཡང་སྐྱབས་རྒྱལ་ལགས་སུ་དུས་བཀག་བཙོན་འཇུག་ལོ་ ༦ ལྕགས་ཐར་ལགས་སུ་དུས་བཀག་བཙོན་འཇུག་ལོ་ ༤ མགོན་པོ་ལགས་སུ་དུས་བཀག་བཙོན་འཇུག་ལོ་ ༣ བཅས་ཀྱི་དུས་བཀག་བཙོན་འཇུག་ཁྲིམས་བཅད་བཏང་ཡོད།
དགེ་རྒན་ནམ་མཁའ་ལགས་བཙོན་ཁང་དུ་ཁྲིད་འགྲོ་སྐབས་ནང་མི་ཚོས་སེམས་སྡུག་ཆེན་པོ་བྱེད་བཞིན་པར་ཁོང་གིས་ནང་མི་བུ་ཕྲུག་ཚོར། ངས་རྐུན་མ་བརྒྱབ་པ་དང་། འཕྲོག་བཅོམ་བྱས་པ་སོགས་ལ་བརྟེན་ནས་བཙོན་ཁང་དུ་འགྲོ་གི་མེད་པར་མི་རིགས་ཀྱི་ཆེད་དུ་བཙོན་དུ་ཚུད་སོང་བས་ཁྱེད་ཚོས་སེམས་ཁྲལ་གང་ཡང་མ་བྱེད། ཞེས་སེམས་གསོ་དང་ཁ་ཏ་གནང་ཡོད། དགེ་རྒན་གནམ་མཁའ་བྱམས་ལགས་རང་ལོ་ ༥༢ ཙམ་དང་། རེབ་གོང་ལྕང་སྐྱ་སྡེ་བ་ནས་ཡིན་ལ། ཕྱི་ལོ་ ༡༩༨༠ ནང་རྨ་ལྷོ་དགེ་ཐོན་སློབ་གྲྭ་ནས་སློབ་མཐར་ཕྱིན་པ་ནས་བཟུང། མི་ལོ་སུམ་ཅུ་ཙམ་རེབ་གོང་ས་ཁུལ་ཀྱི་སློབ་ཆུང་ཁག་གི་དགེ་རྒན་གནང་ཡོད་པ་དང་། འདས་པའི་ལོ་ཤས་སྔོན་ནས་དགེ་རྒན་ལས་གནས་ནས་ལས་འཁྱུར་ངལ་གསོ་བྱས་ཏེ་རྨ་ལྷོ་ཁུལ་དུ་གནས་སྡོད་གནང་བཞིན་ཡོད།
ད་ཐེངས་རྒྱ་ནག་གཞུང་གིས་དགེ་རྒན་ནམ་མཁའ་བྱམས་ལགས་སུ་ལོ་དྲུག་གི་བཙོན་འཇུག་ཁྲིམས་བཅད་བཏང་བ་འདི་ནི་རེབ་གོང་ས་ཁུལ་དུ་རང་ལུས་མེར་སྲེག་དང་འབྲེལ་ནས་རྒྱལ་ཁབ་ཀྱི་ལས་བྱེད་ཅིག་ལ་ཁྲིམས་བཅད་བཏང་བ་ཐོག་མ་དེ་ཡིན་འདུག
