༢༠༡༣ ཟླ་ ༦ ཚེས་ ༡༢ རེས་གཟའ་ལྷག་པ།
སྐུ་ཞབས་སེ་རིལ་པ་ཡན་ལགས།
༄༅། །དེ་ཡང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་(Reporters Without Borders) གནས་ཚུལ་སྤེལ་གསལ་ལྟར་ན། ཉེ་ལམ་ཕ་རན་སིའི་གསར་འགྱུར་བརྒྱུད་ལམ་གྲགས་ཅན་བརྒྱུད་ལམ་ཕ་རན་སི་ ༢༤ ཞེས་པའི་གསར་འགོད་པ་སྐུ་ཞབས་སེ་རིལ་པ་ཡན་ Cyril Payen ལགས་ཀྱིས་༼བོད་ནང་བདུན་ཕྲག་གཅིག་རིང་༽ཕེབས་ཏེ། བོད་མི་ཁག་གཅིག་ལ་གནས་སྟངས་དྲིས་པའི་བརྙན་འཕྲིན་དུམ་བུ་ཞིག་ཕ་རན་སི་ ༢༤ (France 24) ཞེས་པའི་དྲ་རྒྱའི་སྟེང་ཕྱི་ལོ་ ༢༠༡༣ ཟླ་ ༥ ཚེས་ ༣༠ ཉིན་བཀོད་པ་མ་ཟད། དེ་རྗེས་གསར་འགོད་པ་ཁག་གཅིག་དང་བརྙན་འཕྲིན་དེའི་སྐོར་བགྲོ་གླེང་གནང་བའི་བརྙན་འཕྲིན་ཚན་པ་དེ་ཡང་འཛམ་གླིང་ཕྱིར་དྲིལ་བསྒྲགས་གནང་ཡོད།
དེར་བརྟེན་ཕྱི་ལོ་ ༢༠༡༣ ཟླ་ ༦ ཚེས་ ༣ ཉིན་སྐུ་ཞབས་སེ་རིལ་པ་ཡན་ལགས་ཕ་རན་སི་ནས་བྷེང་ཀོག་དུ་ཕེབས་སྐབས་པེ་རི་སིའི་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་ཕ་རན་སི་ ༢༤ (France 24) གསར་ལས་ཁང་ལ་འབྲེལ་བ་བྱས་ནས་སྐུ་ཞབས་སེ་རིལ་པ་ཡན་ལགས་ཐེངས་གཅིག་ཐུག་རྒྱུ་ཡིན་སྐོར་བཤད་ཡོད། འོན་ཀྱང་སྐབས་དེར་ཁོང་བྷེང་ཀོག་ལ་ཐོན་ཚར་བར་བརྟེན་ཐུག་ཐུབ་མེད། དེར་བརྟེན་རྒྱ་ནག་གཞུང་ཚབ་ཁང་གི་ལས་བྱེད་མི་གཉིས་ཕ་རན་སི་ ༢༤ (France 24) གསར་ལས་ཁང་ལ་ཡོང་ནས་སྤྱི་ཁྱབ་གཙོ་འཛིན་ (CEO) སྐུ་ཞབས་མག་ས་ཡི་ཀཱ་ལི་ (Marc Saikali) མཆོག་དང་ཐུག་ཡོད། སྐབས་དེར་རྒྱ་ནག་གཞུང་ཚབ་ཁང་གི་ལས་བྱེད་མི་གཉིས་དེས་ཆུ་ཚོད་གཉིས་ཙམ་རིང་གསར་ལས་ཁང་གིས་གནས་ཚུལ་ལོག་པ་སྤེལ་བཞིན་ཡོད་པར་སྐྱོན་འཛུགས་ཀྱིས་བརྙན་འཕྲིན་ཚན་པ་དེ་ལམ་སེང་དྲ་གནས་ནས་ཕྱིར་འཐེན་བྱེད་དགོས་པའི་དགོས་འདུན་བཏོན་ཡོད།
སྐུ་ཞབས་སེ་རིལ་པ་ཡན་ལགས་ཕྱི་ཚེས་ ༤ ཉིན་བྷེང་ཀོག་ཏུ་འབྱོར་སྐབས། ཁུལ་དེར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ནས་ཁོང་ལ་ཁ་པར་དང་ལག་ཐོག་ཁ་པར་བརྒྱུད་སྡིག་ར་བཏང་བའི་སྐོར་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་བརྗོད་དོན། བྷེང་ཀོག་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གིས་སྐུ་ཞབས་སེ་རིལ་པ་ཡན་ལགས་སུ་ཁ་པར་དང་ལག་ཐོག་ཁ་པར་བརྒྱུད་ཡིག་ངག་གཉིས་ཐོག་ནས་སྡིག་ར་བཏང་བ་ནི་དཔེར་ན། ཁ་སེང་རྒྱ་ནག་གཞུང་ཚབ་ཁང་གི་བུད་མེད་ལས་བྱེད་པ་གཅིག་གིས་འཛེམ་ཟོན་མེད་པར་སྐུ་ཞབས་སེ་རེལ་པ་ཡན་ལགས་ལ་ཡི་གེ་ཞིག་དྲིས་ནས་སྡིག་ར་བཏང་བའི་ཡི་གེ་དེའི་ནང་།
སྐུ་ཞབས་སེ་རེལ་པ་ཡན་ལགས་ཀྱིས་བྷེང་ཀོག་དུ་རྟེན་གཞི་བྱས་པའི་རྒྱ་ནག་གཞུང་ཚབ་ཁང་གི་ཚོགས་སྡུར་ཉིན་གཅིག་ནང་ཚུད་ལ་བཅར་ཏེ་རྒྱ་ནག་གཞུང་གི་མཐོང་མཆན་ཐོབ་ཆེད་གཞུང་ལ་མགོ་སྐོར་གཏོང་དགོས་པའི་རྒྱུ་མཚན་གསལ་བཤད་བྱེད་དགོས་པ་དང། དེ་ལྟར་མ་བྱུང་ན་རྗེས་འབྲས་ཇི་འདྲ་ཞིག་བྱུང་ཡང་འགན་ལེན་ཆ་ཚང་ཁོང་རང་ཉིད་ལ་ཡོད་སྐོར་འཁོད་ཡོད། དེ་ཡང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་རྒྱ་ནག་གཞུང་གི་འགན་ཁུར་མེད་པའི་བྱེད་སྟངས་དེར་སྐྱོན་བརྗོད་ཤུགས་ཆེ་བྱས་དོན། རྒྱ་ནག་གཞུང་གི་བྱེད་ཕྱོགས་དེར་ངོས་ལེན་རྩ་བ་ནས་བྱེད་ཐབས་བྲལ། བྱ་སྤྱོད་འདི་རིགས་ཇག་ཚོགས་ལ་འོས་ཤིང་འཚམ་པ་ཞིག་ཡོད་ཀྱང། གཞུང་ཚབ་ཁང་གི་ལས་བྱེད་མཐོ་བྲས་ཤིག་ལ་འོས་བབ་རྩ་བ་ཉིད་ནས་མེད། གཞུང་ཚབ་སུ་འདྲ་ཞིག་ཡིན་རུང་གནས་ཚུལ་མ་རན་པ་ཞིག་ལ་སྐྱོན་བརྗོད་བྱེད་ཆོག་ཀྱང། ཕ་རན་སི་དང་ཐེ་ལེན་ཌི་ལྟ་བུའི་རྒྱལ་ཁབ་ནང་རྟེན་གཞི་བྱས་པའི་གཞུང་ཚབ་ཁང་ཞིག་གིས་གསར་འགྱུར་བརྒྱུད་ལམ་ཁག་ལ་སྡིག་སྐུལ་བྱས་པ་བརྒྱུད། གསར་འགྱུར་བརྒྱུད་ལམ་གྱི་རྩོམ་སྒྲིག་པའི་གཏམ་གླེང་ལ་འགྱུར་བ་གཏོང་དགོས་པ་དང། གསར་འགོད་པ་ལ་འདྲི་ཙད་ཆེད་གཞུང་ཚབ་ཁང་དུ་འབོད་སྒུག་གིས་སུན་གཙེར་བཟོས་པ་སོགས་ཀྱི་བྱེད་སྟངས་དེར་ངོས་ལེན་བྱ་ཐབས་བྲལ། བྱ་སྤྱོད་དེ་རིགས་རྒྱ་ནག་ནང་རྒྱུན་ལྡན་གྱི་བྱ་སྤྱོད་ཞིག་ཡིན་པར་ཐེ་ཚོམ་མེད།
འོན་ཀྱང་རང་དབང་ལུང་པའི་ནང་བྱ་སྤྱོད་དེ་རིགས་ལ་ངོས་ལེན་བྱེད་ཐབས་རྩ་བ་ནས་མེད། རྒྱ་མིའི་གཞུང་ཚབ་པ་ཚོས་སྐུ་ཞབས་སེ་རེལ་པ་ཡན་ལགས་སུ་ཁ་པར་བརྒྱུད་སྡིག་ར་གཏོང་སྟངས་ལ་གཞིགས་ཚེ་ཁྲིམས་གཏུགས་བྱེད་དགོས་པའི་གནས་སྟངས་ཤིག་ཆགས་ཡོད། ང་ཚོས་པེ་རི་སིའི་ནང་རྟེན་གཞི་བྱས་པའི་རྒྱ་ནག་གཞུང་ཚབ་ཁོང་ཕ་རན་སི་སྲིད་གཞུང་གིས་འབོད་བཀུག་བྱས་ཏེ། བྱ་སྤྱོད་དེར་སྐྱོན་བརྗོད་གནང་རོགས་ཞེས་རེ་འདུན་ཤུགས་ཆེ་ཞུ་རྒྱུ་མ་ཟད། རྒྱ་ནག་གཞུང་གིས་ཕ་རན་སིའི་གསར་འགོད་པ་གཅིག་ལ་དྲག་པོའི་ཐབས་ལམ་ཐོག་ནས་ཁོང་གི་གསར་འགོད་པའི་རང་དབང་ལ་འགོག་རྐྱེན་བཟོས་པའི་བྱ་སྤྱོད་དེར་སྐྱོན་བརྗོད་གནང་རོགས་ཞེས་རེ་འདུན་ཤུགས་ཆེ་ཞུ་རྒྱུ་ཡིན་ཞེས་བརྗོད་འདུག
