༢༠༡༣ ཟླ་ ༦ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༦ ཚེས་ ༡༩ ཉིན་བཀའ་ཤག་ནས་རྩ་འཛིན་བཀོད་ཁྱབ་གནང་དོན་ལྟར་ན། བཀའ་དྲུང་ཡིག་ཚང་གི་ཁྱབ་ཁོངས་ངེས་མེད་ལས་གཞི་སྡེ་ཚན་ནས་སྐབས་ ༡༤ པའི་བཀའ་ཤག་ཐོག་མར་ཕེབས་པ་ནས་བཟུང་སྡེ་ཚན་གྱི་ངོ་བོ་དང་། དེ་བཞིན་ལས་དོན་དང་འབྲེལ་བའི་གནད་དོན་ཁག་ཅིག་གི་ཐོག་ཞུ་སྙན་དུ་མ་ཕུལ་ཡོད་པ་ལྟར། བཀའ་དྲུང་མཆོག་ནས་ཞུ་དོན་ཁག་གི་རྒྱབ་གནས་བཅས་པར་ཞིབ་འཇུག་ཞུས་པའི་གྲུབ་དོན་དང་རྒྱབ་གཉེར་འཆར་འབུལ་བཀའ་ཤག་ཏུ་སྙན་གསན་ཞུས་འབྲེལ་ཐག་གཅོད་གནང་བ་གཤམ་གསལ།
༡༽ ལོ་རྒྱུས་འབྲི་རྩོམ་ཚན་པའི་ཉིན་གླའི་ལས་བྱེད་ས་མིག་རྣམས་རིམ་བཞིན་གཏན་འཇགས་ལས་བྱེད་པའི་ས་མིག་ཏུ་བསྒྱུར་རྒྱུ།
༢༽ ད་བར་མིང་ཙམ་ཡོད་པའི་ངེས་མེད་ལས་གཞི་ཚན་པ་ཞེས་པ་དེ་ཕྱིར་བསྡུ་གནང་རྒྱུ།
༣༽ འཕྲལ་སེལ་བཀོད་སྒྲིག་ཚན་པ་ཞེས་པ། བར་བརྒལ་ལས་བཀོད་ཚན་པ་ཞེས་པར་མིང་བསྒྱུར་གནང་རྒྱུ།
༤༽ ངེས་མེད་ལས་གཞི་སྡེ་ཚན་ཞེས་པ་ལོ་རྒྱུས་འབྲི་རྩོམ་དང་བར་བརྒལ་ལས་བཀོད་སྡེ་ཚན་ཞེས་པར་མིང་བསྒྱུར་གནང་རྒྱུ།
༥༽ ལས་བྱེད་སྤྱི་ཡོངས་ཀྱི་ས་མིག་སྟོང་པ་རྣམས་འཇོག་ཡུལ་ཟུར་དུ་མི་དགོས་པར་བཀའ་དྲུང་ཡིག་ཚང་གི་ལས་བྱེད་གནས་སྤོ་འཆར་འབུལ་བཀོད་སྒྲིག་ཚན་པས་བདག་གཉེར་དགོས་རྒྱུ་བཅས་ཀྱི་རྩ་འཛིན་བཀོད་ཁྱབ་གནང་ཡོད་པ་བཅས།།
