༢༠༡༣ ཟླ་ ༦ ཚེས་ ༢༤ རེས་གཟའ་ཟླ་བ།
༄༅། །འདི་གར་བོད་མི་མང་སྤྱི་འཐུས་གངས་ལྷ་མོ་ལགས་ཀྱིས་ཕྱི་ལོ་ ༢༠༡༣ ཟླ་ ༦ ཚེས་ ༢༤ ཉིན་བཏང་གནས་ནང་འཁོད་དོན། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་མི་རྒན་ཐུབ་བསྟན་ཚེ་རིང་ལགས་ཡུན་རིང་སྙིང་ནད་བསྙུན་གཞིས་མནར་ནས་སྨན་ཁང་དུ་བརྟེན་གཏུགས་རིམ་པར་བྱས་ཀྱང་དྲག་སྐྱེད་མ་བྱུང་བར་མཐར་ཕྱི་ལོ་ ༢༠༡༣ ཟླ་ ༦ ཚེས་ ༢༢ ཉིན་གྱི་ཉིན་རྒྱབ་ཆུ་ཚོད་བཞི་དང་སྐར་མ་ཉི་ཤུ་ཐོག་བདེ་ལེགས་སྨན་ཁང་དུ་དགུང་གྲངས་གྱ་བདུན་ལ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་འདུག རྒན་ཐུབ་བསྟན་ཚེ་རིང་ལགས་ནི་ཕྱི་ལོ་ ༡༩༢༦ ལོར་ལྷ་སའི་བྱང་ཕྱོགས་ནག་ཆུར་སྐུ་འཁྲུངས། དགུང་ལོ་གཉིས་ཐོག་འདམ་གཞུང་དུ་གནས་སྤོས། ཆུང་དུས་ནས་སེར་བྱེས་གྲྭ་ཚང་དུ་ཆོས་སྒོར་ཞུགས་ཏེ་རིམ་པས་དགོན་པའི་ཆོས་མཛད་དང་། གྲྭ་ཚང་གི་ཕྱག་མཛོད། འབྲི་གུང་དང་མལ་གྲོ་གུང་དཀར་གཉིས་སུ་གྲྭ་ཚང་གི་འབྲུ་གཉེར་བཅས་གནང་། ཕྱི་ལོ་ ༡༩༥༩ ལོར་གྲྭ་ཚང་དུ་སྣ་ཆེན་ཚོགས་འདུ་དང་། འཕན་པོ་ཁུལ་གྱི་འཇབ་དམག་ལ་ཞུགས་པ་སོགས་རྒྱ་རྒོལ་གྱི་ལས་འགུལ་སྣ་ཚོགས་སུ་ཞུགས། ལོ་དེའི་བོད་ཟླ་བཅུ་པའི་ཟླ་མཇུག་ཏུ་རྒྱ་དམར་གྱིས་ཁོང་འཛིན་བཟུང་བྱས་ཏེ་འཕན་པོ་ལྷུན་འགྲུབ་རྫོང་དུ་ཟླ་བ་གཅིག་ཙམ་བཀག་ཉར་བྱས།
ཕྱི་ལོ་ ༡༩༦༥ ལོའི་དགུན་ཁར་བཙན་བྱོལ་དུ་ཕེབས་པའི་ལམ་བར་ནས་རྒྱ་དམག་གིས་འཛིན་བཟུང་གྱིས་བཙོན་དུ་ཚུད། དུས་དེ་ནས་བཟུང་དམ་པ་ཁོང་ལ་རྒྱ་དམར་གཞུང་གིས་སྔ་ཕྱིའི་དོན་རྐྱེན་རྩད་ཞིབ་ཀྱིས་གཞིས་ཁ་རྩེ་བཀར་ཁང་བཙོན་ཁང་དང་། ལྷ་སའི་རྒུ་ཚ་བཙོན་ཁང་། དབྱི་ཀྲི་ཏུས་ཟེར་བའི་ལྷ་སའི་གྲོང་ཁྱེར་བཙོན་ཁང་ངམ་རུ་ཁག་དང་པོར་ལོ་བདུན་བཙོན་འཇུག་དང་། ངལ་རྩོལ་བསྒྱུར་བཀོད་ཟེར་བའི་རྭ་བར་ལོ་བདུན་གྱི་ཆབ་སྲིད་ཉེས་མིང་འོག་གནས། ཕྱི་ལོ་ ༡༩༧༩ ལོར་ཉེས་མིང་གི་ཞྭ་མོ་ཕུད་ཡོད་ཀྱང་མུ་མཐུད་ངལ་རྩོལ་བསྒྱུར་བཀོད་རྭ་བར་ཕྱི་ལོ་ ༡༩༨༧ ཟླ་ ༡༢ བར་བཞུགས་དགོས་བྱུང་། སྐབས་དེར་ལྷ་སའི་སྟག་རྩེ་རྫོང་ནས་ཡིན་པའི་སྐུ་ཞབས་གཡུ་ལོ་ཟླ་བ་ཚེ་རིང་དང་ལྷན་དུ་ཕྱི་རྒྱལ་ལྟ་བསྐོར་བ་ཚོར་བོད་ཀྱི་དངོས་ཡོད་གནས་སྟངས་ར་སྤྲོད་གནང་བར་བརྟེན། རྒྱ་དམར་གཞུང་གིས་ཁོང་ལ་ཁ་བྲལ་བའི་ཉེས་མིང་བཙན་བཀལ་གྱིས་ཕྱི་ལོ་ ༡༩༨༧ ཟླ་ ༡༢ ཚེས་ ༡༦ ཉིན་དངོས་སུ་འཛིན་བཟུང་གིས་བཙོན་ཁང་དུ་ལོ་དྲུག་ཁྲིམས་བཅད་དང་ཆབ་སྲིད་ཀྱི་དབང་ཆ་ལོ་བརྒྱད་འཕྲོག་པ་བཅས་དམ་པ་ཁོང་བསྡོམས་རྒྱ་དམར་གཞུང་གི་བཙོན་ཁྲིམས་དང་ངལ་རྩོལ་བསྒྱུར་བཀོད་བཅས་མུན་ནག་བཙོན་རྭར་སྔ་ཕྱི་བསྡོམས་ལོ་ངོ་ཧྲིལ་པོ་ཉི་ཤུའི་དཀའ་སྡུག་བསམ་ཡུལ་ལས་འདས་པ་མྱངས།
ཕྱི་ལོ་ ༡༩༩༧ ཟླ་ ༡༡ ནང་སྐྱབས་བཅོལ་དུ་ཕེབས་པ་ནས་བཟུང་ད་བར་བོད་ཀྱི་དགུ་བཅུ་གསུམ་ལས་འགུལ་ཚོགས་པར་གནས་ཞུགས་ཀྱིས་སེམས་བཟང་གཞུང་དྲང་གིས་རྣམ་ཀུན་དགེ་བའི་ལས་ལ་བརྩོན་བཞིན་མཆིས། ད་ཐེངས་ཁོང་གཞན་ཡུལ་དུ་སྐུ་ཞི་བར་བཤེགས་ཀྱང་རྣམ་ཀུན་ལུས་ངག་ཡིད་གསུམ་གྱིས་སྨོན་འདུན་དང་འཕགས་མཆོག་སྤྱན་རས་གཟིགས་ཀྱི་རྗེས་སུ་བཟུང་ནས་རྒྱལ་བའི་གོ་འཕང་མྱུར་ཐོབ་ཡོང་བའི་སྨོན་འདུན་བཅས།།
