༢༠༡༣ ཟླ་ ༤ ཚེས་ ༢༢ རེས་གཟའ་ཟླ་བ།
༄༅། །འདི་གར་ཨོ་སི་ཊོ་ལི་ཡའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཟླ་སྒྲོན་ལགས་ཀྱིས་ཕྱི་ལོ་ ༢༠༡༣ ཟླ་ ༤ ཚེས་ ༢༢ ཉིན་བཏང་གནས་ནང་འཁོད་དོན། ཨོ་སི་ཊོ་ལི་ཡའི་སྐུ་ཚབ་དོན་གཅོད་ལས་ཁང་ནས་གོ་སྒྲིག་འོག་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་ཐེངས་གཉིས་པ་དེ་བཞིན་ཕྱི་ལོ་ ༢༠༡༣ ཟླ་ ༤ ཚེས་ ༢༠ ནས་ ༢༡ བར་ཉིན་གཉིས་རིང་རྒྱལ་ས་ཀེན་བྷེ་ར་སྐོང་ཚོགས་གནང་ཡོད། ལྷན་ཚོགས་ཐོག་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་ཐུབ་བསྟན་དོན་གྲུབ་ལགས་ཀྱིས་གཙོས་དོན་ཁང་གི་ལས་བྱེད་དང་། ཨོ་སི་ཊོ་ལི་ཡའི་སི་ཌེ་ནེ། མེལ་བྷོན། ཀེན་བྷེ་ར། སྦེར་སི་སྦེན། ཨ་ཌེ་ལེ་ཌི། ཌ་སེ་མ་ནེ་ཡ། ནིའུ་ཁན་སོ་བཅས་ས་གནས་བོད་རིགས་མཐུན་ཚོགས་ཁག་བདུན་གྱི་ཚོགས་གཙོ་དང་། རྒྱུན་ལས་ཀྱི་སྐུ་ཚབ་བཅས་ལྷན་ཞུགས་གནང་ཡོད། ཚོགས་འདུའི་ཐོག་མར་བོད་རྒྱལ་ཁབ་ཆེན་པོའི་རྒྱལ་གླུ་དང་། དེ་ནས་བོད་བསྟན་སྲིད་མི་རིགས་ཆེད་རང་ལུས་མེར་སྲེག་བཏང་མཁན་རྒྱལ་གཅེས་པ་རྣམས་ལ་མྱང་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་ཡོད།དེ་རྗེས་སྐུ་ཚབ་དོན་ཁང་གི་དྲུང་ཆེ་དངོས་གྲུབ་རྒྱལ་མཚན་ལགས་ཀྱིས་ཚོགས་འདུའི་ལས་རིམ་ངོ་སྤྲོད་གནང་གྲུབ་མཚམས༌སྐུ་ཚབ་དོན་གཅོད་ཀྱིས་ཚོགས་འདུའི་ངོ་སྤྲོད་གསུང་བཤད་དང་གལ་ཆེའི་གསལ་བསྒྲགས་ཁག་གནང་ཡོད།
ཐེངས་འདིའི་ཚོགས་འདུའི་ཉིན་དང་པོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་སྐོར་དང་བོད་དོན་འདུ་འཛོམས་ལས་འགུལ་གནང་ཕྱོགས་སྐོར། བོད་མི་རྒན་གཞོན་བར་གསུམ་ལ་ནང་ཆོས་དང་རིག་གཞུང་ངོ་སྤྲོད་སྐོར། བོད་ཀྱི་སྐད་ཡིག་དང་རོལ་གཞས་འཁྲབ་འཁྲིད་གནང་མུས་མཇུག་སྐྱོང་གནང་ཕྱོགས། དེ་བཞིན་དྭང་བླང་དཔྱ་དངུལ་བསྡུ་ཕྱོགས་དང་གདུང་སེམས་མཉམ་སྐྱེའི་ལས་འཆར་སྐོར། ཆབ་སྲིད་བཙོན་ཟུར་ཨོ་སི་ཊོ་ལི་ཡར་གཞིས་ཆགས་སུ་ཕེབས་མི་ཚོར་སྣེ་ལེན་དང་མཐུན་འགྱུར་རོགས་འདེགས་ཞུ་ཕྱོགས། རྒྱ་རིགས་མཉམ་འབྲེལ་བ་ཞུ་ཕྱོགས་དང་། ས་གནས་བོད་རིགས་མཐུན་ཚོགས་ཁག་ཚགས་ཚུད་ཡར་རྒྱས་གཏོང་ཕྱོགས་སྐོར་བཅས་ཀྱི་གྲོས་གཞི་ཐོག་བཀའ་བསྡུར་ལྷུག་པོ་གནང་ཡོད།
ཚོགས་འདུའི་ཉིན་གཉིས་པའི་ནང་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་ཐུབ་བསྟན་དོན་གྲུབ་ལགས་ཀྱིས་ཚོགས་འདུ་གཙོ་སྐྱོང་གནང་ཐོག་ལས་དོན་ཇི་ཞུས་ལས་བསྡོམས་སྙིང་བསྡུས་སྒྲོགས་སྦྱང་གནང་རྗེས་ཚོགས་པའི་སྒྲིག་གཞིར་བསྐྱར་བཅོས་གནང་བ་མ་ཟད། སྐབས་གཉིས་པའི་རྒྱལ་ཡོངས་བོད་རིགས་མཐུན་ཚོགས་ཀྱི་རྒྱུན་ལས་འོས་བསྡུ་གནང་། སི་ཌེ་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་ནེ་རྒན་གོ་ཚང་ལགས་སྐབས་གཉིས་པའི་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་དང་། ཀེན་བྷེ་རའི་ས་གནས་བོད་རིགས་མཐུན་ཚོགས་ཀྱི་ཚོགས་གཙོ་བསྟན་འཛིན་ལྷ་མོ་ལགས་དྲུང་ཆེར་འོས་འདེམས་བྱུང་ཡོད། ཨོ་སི་ཊོ་ལི་ཡའི་རྒྱལ་ཡོངས་བོད་རིགས་མཐུན་ཚོགས་དེ་བཞིན་ཕྱི་ལོ་ ༢༠༡༠ ལོར་གསར་འཛུགས་དང་རྒྱུན་ལས་ཀྱི་ལོ་ཡུན་ལོ་གཉིས་རིང་གཏན་འབེབས་གནང་གི་ཡོད་པ་བཅས། །
