༢༠༡༣ ཟླ་ ༤ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༦ ཉིན་འདི་གའི་ཆེད་གཉེར་གསར་འགོད་པ་བསོད་ནམས་ཚེ་རིང་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཌལ་ཧོར་གཏན་འཇགས་སློབ་གྲྭ་དང་། ས་གནས་འགོ་འཛིན་ཟུང་འབྲེལ་གྱི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཌལ་ཧོར་གཏན་སློབ་དབུ་བརྙེས་ནས་ལོ་ ༥༠ ཧྲིལ་པོ་འཁོར་བའི་དུས་དྲན་གྱི་སྐུ་མགྲོན་གཙོ་བོར་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༣ ཟླ་ ༤ ཚེས་ ༢༧ ཉིན་གྱི་སྔ་དྲོ་ཆིབས་སྒྱུར་བསྐྱང་གཏན་འཁེལ་ཡོད་སྟབས། མགོན་པོ་གང་ཉིད་མཆོག་ལ་ཕེབས་བསུའི་གྲ་སྒྲིག་དང་འབྲེལ་རྒྱལ་སྒོ་གསར་བཞེངས་ཀྱིས་མཚོན་ཕྱི་ཚེས་ ༢༦ ཉིན་གནམ་གཤིས་ཅུང་ཟད་གྲང་ངར་ཆེ་ཡང་ས་གནས་འགོ་འཛིན་གྱི་འགོ་ཁྲིད་འོག་སློབ་གྲྭའི་ཐང་ཆེན་མདུན་དུ་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་གསར་བཞེངས་དང་།
དེ་བཞིན་ས་གནས་འདི་གའི་ཚོང་ཁང་དང་ཟ་ཁང་ཡོངས་རྫོགས་སྒོ་བརྒྱབ་ནས་མི་དམངས་རྣམས་ནས་དགའ་ཚོར་ཆེན་པོས་རང་རང་སོ་སོའི་ཉེ་འཁོར་གྱི་ཁོར་ཡུག་གཙང་མ་བཟོས་དང་བཟོ་མུས་ཡིན་པ་མ་ཟད། ས་གནས་ཀྱི་བོད་མི་ཁག་གཅིག་གིས་༸གོང་ས་མཆོག་གིས་མི་ལོ་དྲུག་ཅུ་ལྷག་བོད་བསྟན་སྲིད་དང་མི་རིགས་ཆེད་ཉིན་མཚན་དབྱེར་མེད་སྐུ་ངལ་འཛད་མེད་བསྐྱོན་དང་སྐྱོན་མུས་ལ་བསྟོད་དབྱངས་མཆོད་སྤྲིན་ལམ་ནས་བཀའ་དྲིན་རྗེས་དྲན་མཚོན་ཆེད་ཞབས་གཞས་དང་སློབ་ཕྲུག་ཁག་གཅིག་གིས་གཞས་སྣ་དང་རུ་སྒྲིག་སྦྱོང་བརྡར་གནང་དང་གནང་མུས་ཐོག་གྲ་སྒྲིག་འཐུས་ཚང་ཞུ་བཞིན་འདུག དེ་བཞིན་ཕྱོགས་མཐའ་ཁག་ནས་ཕེབས་པའི་དད་ལྡན་མང་ཚོགས་ཀྱིས་གཙོས་ས་གནས་སློབ་ཕྲུག་དང་མང་ཚོགས་བཅས་ལ་ཐང་ཆེན་དུ་དབུ་གུར་ཡང་མཐུན་རྐྱེན་བསྐྲུན་འདུག མདོར་ནས་ཁུལ་འདིའི་མི་དམངས་ནས་མགོན་པོ་གང་ཉིད་མཆོག་ཁུལ་འདིར་༸ཞབས་སོར་གང་མགྱོགས་འཁོད་རྒྱུར་སྐོམ་པ་ཆུ་འདོད་ལྟར་དགའ་དད་སྤྲོ་གསུམ་གྱི་སྒོ་ནས་ཕེབས་སྒུག་ཞུས་དང་ཞུ་མུས་ཡིན་འདུག དེ་ཡང་ཌལ་ཧོར་ལྔ་བཅུའི་དུས་ཆེན་གྱི་གོ་སྒྲིག་ཚོགས་ཆུང་ཁག་ནི། རྒྱལ་སྒོ་གོ་སྒྲིག་ཚོགས་ཆུང་དང་། དབུ་གུར་གོ་སྒྲིག་ཚོགས་ཆུང་། དཔལ་འབྱོར་འདུ་འགོད་ཚོགས་ཆུང་། མི་དམངས་འབྲེལ་མཐུད་དོ་དམ་པ། རྒྱང་བསྒྲགས་གོ་སྒྲིག་ཚོགས་ཆུང་། དེ་བཞིན་བདེ་ལེགས་སྨན་ཁང་གི་སྨན་པ་དང་སློབ་གྲྭའི་སྨན་ཞབས་པ་སོགས་ཀྱང་གོ་སྒྲིག་ཞུས་འདུག་པ་བཅས། །
