༢༠༡༣ ཟླ་ ༤ ཚེས་ ༢༧ རེས་གཟའ་སྤེན་པ།
༄༅། །འདི་ག་བོད་ཡིག་ཚན་པའི་གསར་འགོད་པ་བསོད་ནམས་ཚེ་རིང་གིས་ཌལ་ཧོར་ནས་བཏང་གནས་ནང་འཁོད་དོན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ཌལ་ཧོར་བོད་མིའི་གཏན་འཇགས་སློབ་གྲྭ་དང་ས་གནས་འགོ་འཛིན་གྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༤ ཚེས་ ༢༧ ཉིན་གྱི་སྔ་དྲོ་ཆུ་ཚོད་ ༩ སྐར་མ་ ༤༠ ཐོག་ཌལ་ཧོར་གྱི་ཕེབས་བསུའི་རྒྱལ་སྒོ་དང་པོར་༸ཞབས་སོར་འཁོད་སྐབས་ས་གནས་བུད་མེད་དང་གཞོན་ནུ། རང་བདེན་ཚོགས་ཆུང། བཟོ་གྲྭ་སོགས་ཀྱི་ཚོགས་གཞོན་རྣམས་ཀྱིས་ཕེབས་བསུ་གཟབ་རྒྱས་དང་འབྲེལ་དེ་ནས་ཕེབས་འགྲོ་བརྒྱུད་ཆིབས་སྒྱུར་བསྐྱངས་སྐབས་གཞུང་ལམ་གཡས་གཡོན་དུ་དད་ལྡན་མང་ཚོགས་དང་སློབ་ཕྲུག སློབ་ཟུར་སོགས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད།
དེ་རྗེས་ཆུ་ཚོད་ ༡༠ དང་སྐར་མ་ ༥ ཐོག་བཞུགས་གནས་མགྲོན་ཁང་(Circuit House)དུ་༧ཞབས་སོར་འཁོད་སྐབས་ས་གནས་འགོ་འཛིན་གྱིས་གཙོས་གཏན་སློབ་ཀྱི་སློབ་སྤྱི་དང་། རེཀ་ཊར། ཌལ་་ཧོར་གྱི་(SDM) ས་གནས་གཞོན་ནུ་དང་བུད་མེད། རང་བདེན་ཚོགས་ཆུང་གི་ཚོགས་གཙོ། བཟོ་གྲྭའི་ཚོགས་གཙོ། གཞན་ཡང་མཁས་དབང་ཟམ་གདོང་རིན་པོ་ཆེ་མཆོག་དང་བདེ་སྲུང་བཀའ་བློན་མཆོག འཕྲོད་བསྟེན་བཀའ་བློན་མཆོག སྤྱི་འཐུས་ཐུབ་བསྟན་ལུང་རིགས་ལགས་བཅས་ཀྱིས་དཀར་གཙང་མཇལ་དར་དང་གཏན་སློབ་ཀྱི་སློབ་ཕྲུག་གཉིས་ནས་གྲོ་སོ་ཕྱེ་མར་འདེགས་འབུལ། ཕྱོགས་མཚུངས་སློབ་ཕྲུག་ཁག་གཅིག་གིས་བཀྲ་ཤིས་ཞོལ་པ་འཁྲབ་སྟོན་ལམ་ནས་ཕེབས་བསུ་གཟབ་རྒྱས་ཞུས་ཏེ་བཞུགས་གནས་མགྲོན་ཁང་དུ་གདན་འདྲེན་ཞུས་ཡོད།
ཕྱེད་ཡོལ་མགོན་པོ་གང་ཉིད་མཆོག་གིས་གཏན་སློབ་ཀྱི་རྩེད་ཐང་ཆེན་མོར་དད་ལྡན་མི་དམངས་རྣམས་ལ་ལག་ལེན་སོ་བདུན་མའི་བཀའ་ཆོས་དང་བཀའ་སློབ་སྩལ་རྒྱུ་ཡིན་འདུག་པ་བཅས།།
