༢༠༡༣ ཟླ་ ༤ ཚེས་ ༡༧ རེས་གཟའ་ལྷག་པ།
༄༅། །འདི་གར་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ལགས་ཀྱིས་བཏང་གནས་ནང་འཁོད་དོན། འཁོན་རིགས་བསྟན་པའི་གཙུག་རྒྱན་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་ནིའུ་ཡོཀ་གྲོང་སྟོད་དུ་ཆགས་པའི་བརྩེ་ཆེན་ཀུན་ཁྱབ་གླིང་ས་སྐྱ་དགོན་པར་སེར་སྐྱ་མང་ཚོགས་རྣམས་ལ་བླ་མའི་རྣལ་འབྱོར་གྱི་ཚེ་དབང་ཆོས་འབྲེལ་དང༌གསུང་བཤད་གནང་ཡོད།
དེ་ཡང་ཆོས་འབྲེལ་སྐབས་ཨ་རི་སྐུ་ཚབ་དོན་གཅོད་བློ་བཟང་སྙན་གྲགས་ལགས་དང༌། ས་གནས་གྲོང་སྡེ་ལས་ཁུངས་ཀྱི་སྤྱི་ཁྱབ་ཇོན་ (John J.Revella) ས་གནས་འབྲེལ་ཡོད་ཉེན་རྟོག་ལས་ཁུངས་ཀྱི་སྐུ་ཚབ། ཧི་མ་ལའི་རི་རྒྱུད་ཀྱི་མི་སྣ། སྐུ་ཚབ་དོན་གཅོད་ཁང་གི་ལས་བྱེད། བོད་པའི་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ། དད་ལྡན་རྒྱ་རིགས་དང༌། ཕྱི་རྒྱལ་བ་བཅས་ཁྱོན་མི་གྲངས་ ༣༠༠༠ ལྷག་ཙམ་མཉམ་ཞུགས་གནང་ཡོད།
སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་ཐོག་མར་དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་ལ་ཆོས་འབྲེལ་གྱི་གོ་སྐབས་གནང་བར་བཀའ་དྲིན་ཆེ་ཞེས་ཞུས་རྗེས། ད་ལྟའི་བོད་ནང་གི་གནས་སྟངས་སྙིང་བསྡུས་ངོ་སྤྲོད་གནང་བ་མ་ཟད། བཙན་བྱོལ་བོད་མིའི་ལྷག་བསམ་དང༌། སེམས་ཤུགས་ལ་གདེང་འཇོག་ཆེན་པོ་གནང་སྟེ། བོད་མི་རིགས་ཀྱི་རྩ་ཆེའི་ཆོས་དང་རིག་གཞུང་སློབ་སྦྱོང་བྱེད་རྒྱུ་གལ་ཆེའི་རང་བཞིན་ཀྱང་ནན་བརྗོད་གནང་བ་དང་ཆབས་ཅིག ས་སྐྱ་གོང་མ་བདག་ཁྲི་རིན་པོ་ཆེ་མཆོག་དབུ་བཞུགས་ཀྱི་རྩ་ཆེའི་གོ་སྐབས་འདིར་ཚང་མས་བོད་ནང་གི་དཀའ་ངལ་མེད་པར་འགྱུར་ནས་གཞིས་ལུས་བོད་མི་རྣམས་ཀྱི་རེ་འདུན་འགྲུབ་ཐུབ་པའི་ཐུགས་སྨོན་གནང་རོགས། ཞེས་གསུངས་ཡོད།
ས་གནས་གྲོང་སྡེ་ལས་ཁུངས་ཀྱི་སྤྱི་ཁྱབ་ཇོན་ལགས་ཀྱིས། ས་སྐྱ་གོང་མ་བདག་ཁྲི་རིན་པོ་ཆེ་མཆོག་གནས་འདིར་ཆོས་འབྲེལ་གནང་བར་ཕེབས་པར་སེམས་གཏིང་ནས་དགའ་བསུ་དང༌། ས་གནས་འདི་ནས་བརྩེ་ཆེན་ཀུན་ཁྱབ་གླིང་དགོན་པའི་སྤྱི་ཚོགས་ལ་སྨན་པའི་བྱེད་སྒོ་ཁག་ལ་སྔོན་ཆད་མཐུན་འགྱུར་རྒྱབ་སྐྱོར་ཞུས་ཡོད་པ་བཞིན་མ་འོངས་པར་དེ་ལྟར་ཞུ་རྒྱུ་ཡིན། ཞེས་གསུངས།
དེ་རྗེས་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་ནང་པ་སངས་རྒྱས་པའི་ཆོས་ལ་དད་པ་བྱས་པ་ཙམ་མ་ཡིན་པར། དེའི་གནད་འགག་རྣམས་སྦྱང་ནས་ཤེས་པར་བྱེད་དགོས་པའི་སྐོར་དང༌། གངས་ཅན་གྱི་ལྗོངས་ལ་དུས་ཀྱི་འགྱུར་བ་ཆེན་པོ་བྱུང་ནས་བོད་མི་རྣམས་འཛམ་གླིང་ས་ཕྱོགས་གང་སར་བཙན་བྱོལ་དུ་གྱར་དགོས་བྱུང་ཡོད་ན་ཡང༌། དེང་སྐབས་བོད་ཀྱི་ཆོས་དང༌། རིག་གཞུང་ཕྱོགས་བཞི་མཚམས་བརྒྱད་ལ་དར་ཁྱབ་ཆེན་པོ་བྱུང་དང་འབྱུང་བཞིན་ཡོད་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བླ་ན་མེད་པའི་ཐུགས་སྐྱེད་དང༌། རླབས་ཆེན་གྱི་མཛད་པ་འཕྲིན་ལས་ལ་བརྟེན་ནས་བྱུང་བ་ཞིག་ཡིན་པ་སོགས་ཀྱི་བླང་དོར་ཀྱི་གསུང་བཤད་གནང་ཡོད།
ཉིན་དེའི་ཕྱེད་ཡོལ་བླ་མའི་རྣལ་འབྱོར་གྱི་ཚེ་དབང་དབུ་འཛུགས་གནང་ཞིང༌། དངོས་གཞིའི་དབང་མ་གནང་གོང་ཆོས་ཞུ་བ་ཡོངས་ལ་བོད་དབྱིན་གསུང་སྐད་གཉིས་ཀྱི་ཐོག་ནས་དབང་ཞུ་བའི་ཀུན་སློང་གང་འདྲ་ཞིག་བཟུང་དགོས་པ་དང༌། བླ་མའི་རྣལ་འབྱོར་གྱི་ཚེ་དབང་ངམ་ཚེ་དབང་ལོ་བརྒྱ་མའི་ཁྱད་ཆོས་ག་རེ་ཡིན་པ། བཟང་པོའི་ཀུན་སློང་ཐོག་ནས་དབང་ཞུས་པ་ཡིན་ན། དེའི་ཕན་ཡོན་ག་རེ་ཡོད་པ་བཅས་གོ་བདེའི་ལམ་ནས་ངོ་སྤྲོད་རྗེས་ཚེ་དབང་གནང་ཡོད་པ་མ་ཟད། ཆོས་འབྲེལ་གྱི་མཇུག་ཏུ་དད་ལྡན་ཆོས་ཞུ་བར་མཇལ་ཁ་ཡང་གནང་ཡོད།
ཐེངས་འདིའི་ཆོས་འབྲེལ་ནི་ཨ་རིའི་ནང་རྟེན་གཞི་བྱས་པའི་ས་སྐྱའི་མ་དགོན་བརྩེ་ཆེན་ཀུན་ཁྱབ་གླིང་ནས་གསོལ་འདེབས་ཞུས་པ་ཞིག་ཡིན་པ་དང༌། ས་སྐྱ་གོང་མ་བདག་ཁྲི་རིན་པོ་ཆེ་མཆོག་ཕྱི་ཟླ་ ༧ པ་བར་ཨ་རིར་ཆོས་ཕྱོགས་ཀྱི་མཛད་འཆར་ཡོད་འདུག་པ་བཅས། །
