༢༠༡༣ ཟླ་ ༤ ཚེས་ ༡༡ རེས་གཟའ་ཕུར་བུ།
༄༅། །ཡུ་རོབ་གྲོས་ཚོགས་ཀྱི་རང་དབང་མང་གཙོ་མནའ་སྦྲེལ་ཚོགས་པ་ (Alliance of Liberals and Democrats for Europe) ཞེས་པའི་གོ་སྒྲིག་དང་ཡུ་རོབ་གྲོས་ཚོགས་ཀྱི་ཨི་སི་ཏོ་ནི་ཡའི་སྐུ་ཚབ་འཐུས་མི་ལྕམ་སྐུ་ཀི་རི་སི་ཊི་ན་ཨོ་ཇུ་ལེནྜ་ (Kristiina Ojuland) མཆོག་དང། ལུ་ཐེ་ནི་ཡའི་སྐུ་ཚབ་འཐུས་མི་ལིའོ་ནི་ཌ་སི་ཌོན་སི་ཀི་སི་ Lithuanian MEP Leonidas Donskis མཆོག་བཅས་ཡུ་རོབ་གྲོས་ཚོགས་ཀྱི་རང་དབང་མང་གཙོ་མནའ་སྦྲེལ་ཚོགས་པའི་སྐུ་ཚབ་རྣམ་གཉིས་ཀྱིས་རྒྱབ་སྐྱོར་འོག་ཕྱི་ལོ་ ༢༠༡༣ ཟླ་ ༤ ཚེས་ ༡༠ རེས་གཟའ་ལྷག་པའི་ཉིན་ཡུ་རོབ་གྲོས་ཚོགས་ནང་བོད་ཀྱི་མིག་ཆུ། “(Tears of Tibet)” ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་ཤིག་ཚོགས་ཡོད།
དེ་ཡང་དབུ་འབྱེད་སྐབས་ཀི་རི་སི་ཊི་ན་ཨོ་ཇུ་ལེནྜ་མཆོག་གིས་ངོ་སྤྲོད་ཀྱི་གསུང་བཤད་གནང་བ་དང་སྦྲགས། ད་བར་ཡུ་རོབ་གྲོས་ཚོགས་ནང་ལོ་གསུམ་བསྟུད་མར་བོད་ནང་གི་ཛ་དྲག་གནས་སྟངས་སྐོར་བགྲོ་གླེང་ལྷན་ཚོགས་སྐོང་ཚོགས་གནང་ཐུབ་པར་ལྕམ་སྐུ་ཁོང་རང་ཉིད་ལ་དགའ་སྤོབས་ཆེན་པོ་བྱུང་ཡོད་ཀྱང་། དོན་སྙིང་ལྡན་པའི་གྲུབ་འབྲས་ཤིག་ཡོང་བར་ད་དུང་མུ་མཐུད་ཤུགས་རྒྱག་དགོས་སྐོར་སོགས་ཀྱི་གསུང་བཤད་གནང། སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་འབྲེལ་ལམ་གཙོ་སྐྱོང་བ་ལྕམ་སྐུ་ཀེ་ཊི་སོན་ཌར་སི་ (Ms Kate Saunders) མཆོག་གིས་ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༡༡༤ རང་ལུས་མེར་སྲེག་བཏང་བ་དེ་དག་དུས་ཚིགས་གོ་རིམ་ལྡན་པའི་ཐོག་ནས་གསལ་བཤད་གནང་བ་མ་ཟད། རང་ལུས་མེར་སྲེག་གི་ལས་འགུལ་སྤེལ་དགོས་པའི་རྒྱུ་མཚན་ནི། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པར་བརྟེན། དེ་དག་གི་འགན་ཆ་ཚང་རྒྱ་ནག་གཞུང་ལ་ཡོད་སྐོར་གསལ་བཤད་གནང་ཡོད།
ཕྱོགས་མཚུངས་སྐབས་དེར་བོད་རིག་པའི་མཁས་དབང་དང་མི་རིགས་རིང་ལུགས་ཐོག་ཉམས་ཞིབ་གནང་མཁན་ལྕམ་སྐུ་ཀ་ཏི་ཡ་བྷ་ཕེ་ཏི་རེ་ལི་ (Ms Katia Buffetrille)ལགས་ཀྱིས། འགྲོ་བ་མིའི་ཐོབ་ཐང་གི་གནས་སྟངས་ཐོག་ནས་བོད་མིའི་ཆོས་དད་རང་དབང་དང་རང་ལུས་མེར་སྲེག་གི་ལས་འགུལ་ལ་ལྟ་ཕྱོགས། ཞེས་པའི་ཐོག་གསུང་བཤད་གནང་ཡོད། དེ་བཞིན་ཨི་སི་ཊོ་ནི་ཡའི་ (Estonian) རྩོམ་པ་པོ་དང་སྤྱི་ཚོགས་དྲང་བདེན། འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་འགུལ་བ་སྐུ་ཞབས་རོ་ཡི་སི་ཊེ་ ཌར་ (Mr Roy Strider) ལགས་ཀྱིས། གལ་ཏེ་ཡུ་རོབ་སྤྱི་མཐུན་ཚོགས་པ་དང་རྒྱལ་སྤྱིའི་སྤྱི་ཚོགས་ཀྱིས་བོད་མིའི་འཚེ་བ་མེད་པའི་འཐབ་རྩོད་ལ་ཆོད་སེམས་བརྟན་པོས་རྒྱབ་སྐྱོར་གནང་མ་ཐུབ་ཚེ། བོད་རང་བཙན་གྱི་བསམ་བློ་དང་བསམ་བློ་དེ་རིམ་བཞིན་མཁྲེགས་བཟུང་ཅན་དུ་འགྱུར་ཏེ་ཉེན་ཁ་ཇི་ཡོད་སྐོར་གསུང་བཤད་གནང་ཡོད།
ཕྱོགས་མཚུངས་སྦར་སིལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་རྒྱ་ནག་གཞུང་གི་མཁྲེགས་བཟུང་གི་སྲིད་བྱུས་ལ་བརྟེན་ནས་བོད་ཀྱི་ཁོར་ཡུག་ལ་དོ་ཕོག་ཇི་འདྲ་བཟོ་བཞིན་ཡོད་མེད་དང། ལྷག་པར་ཉེ་ལམ་རྒྱ་མ་རོང་གི་གཏེར་ཁ་སྔོག་འདོན་གྱི་ས་ཁུལ་ཁག་གཅིག་ནང་ས་རུད་ཀྱི་གོད་ཆག་ཕོག་པར་རྒྱ་ནག་གཞུང་གིས་རང་བྱུང་གོད་ཆག་ཡིན་ཚུལ་འཁྱོག་བཤད་བྱས་པར་བརྟེན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་ལན་འདེབས་གནང་བ་རྣམས་ཞིབ་ཕྲ་གསལ་བཤད་གནང་སྟེ་གསུང་དོན། ང་ཚོས་དུས་རྟག་ཏུ་དངོས་ཐོག་བདེན་འཚོལ་གྱི་ཐབས་ལམ་ལ་གཞི་བཅོལ་ནས་གཉིས་སྨན་གྱི་སྲིད་བྱུས་ལག་བསྟར་བྱེད་བཞིན་ཡོད། དེར་བརྟེན་ང་ཚོས་བོད་ཀྱི་གནད་དོན་དེ་བཞིན་འཚེ་མེད་ཞི་བའི་ལྟ་གྲུབ་ལ་གཞི་བཅོལ་ཏེ་གྲོས་མོལ་གྱི་ལམ་ནས་སེལ་རྒྱུར་ཆོད་སེམས་བརྟན་པོ་ཡོད་པ་ལྟར། ཁྱེད་རྣམས་དང་ཁྱེད་ཚོའི་སྲིད་གཞུང་རྣམས་ཀྱིས་རྒྱ་ནག་གཞུང་ལ་གནོན་ཤུགས་སྤྲད་དེ་བོད་མིའི་དངོས་ཡོད་དཀའ་ངལ་སེལ་ཐབས་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་གསུངས། བགྲོ་གླེང་གྲུབ་མཚམས་མང་ཚོགས་ལ་དྲི་བ་གཏོང་རྒྱུའི་གོ་སྐབས་ཕུལ། སྐབས་དེར་མཐོ་རིམ་སློབ་མའི་སློབ་ཕྲུག་རྣམས་ཀྱིས་བོད་དོན་ཐོག་ཡུ་རོབ་སྤྱི་མཐུན་ཚོགས་པའི་ལངས་ཕྱོགས་ཇི་འདྲ་ཡིན་སྐོར་གྱི་དྲི་བ་བཏང་འདུག
དེ་རྗེས་ཚོགས་འདུའི་མཇུག་བསྡོམས་གསུང་བཤད་སྐབས་ལུ་ཐེ་ནི་ཡའི་སྐུ་ཚབ་འཐུས་མི་ལིའོ་ནི་ཌ་སི་ཌོན་སི་ཀི་སི་ (Lithuanian MEP Leonidas Donskis) མཆོག་གིས་བོད་ཀྱི་གནད་དོན་དང་ཚོང་གི་ཁེ་ཕན་གཉིས་བརྗེ་བ་ཡིན་ན། དུས་རབས་གསར་པའི་ཞབས་འདྲེན་ཞིག་ཆགས་རྒྱུ་ཡིན། ཞེས་གསུང་ཡོད་པ་བཅས།།
