༢༠༡༣ ཟླ་ ༤ ཚེས་ ༥ རེས་གཟའ་པ་སངས།

༄༅། །འདི་གར་བོད་མི་མང་དགེ་ལུགས་སྤྱི་འཐུས་རོང་པོ་བློ་བཟང་སྙན་གྲགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ ༣ ཚེས་ ༦ ཉིན་འདི་ལོའི་གསུམ་བཅུའི་དུས་དྲན་དང་སྟབས་བསྟུན་སུད་སིའི་ལུ་རྫན་ (LUZERN) གྲོང་ཁྱེར་དང་། སུད་སི་གྲོས་ཚོགས་ལ་བོད་ཀྱི་ཛ་དྲག་གི་གནས་སྟངས་དང་བོད་ཀྱི་རྒྱལ་དར་སྒྲེང་འཛུགས་ཀྱི་འབོད་སྐུལ་ལས་འགུལ་ཞིག་སྤེལ་ཡོད་འདུག

ཕྱི་ལོ་ ༡༩༩༥ ནས་ཡུ་རོབ་ཁུལ་གྱི་གྲོང་སྡེ་ལས་ཁུངས་མང་པོ་ཞིག་གི་མདུན་དུ་བོད་ཀྱི་བདེན་དོན་ལ་རྒྱབ་སྐྱོར་ཆེད་བོད་ཀྱི་རྒྱལ་དར་སྒྲེང་འགོ་ཚུགས་ཤིང་། དེ་དང་སྟབས་བསྟུན་འདི་ལོའི་གསུམ་བཅུའི་དུས་དྲན་སྲུང་བརྩིའི་ཆེད་ཕྱི་ཟླ་ ༣ ཚེས་ ༦ ཉིན། སུད་སི་གནས་སྡོད་ལྷུན་འགྲུབ་ཚང་ཀརྨ་བཀྲིས་ཚེ་རིང་ལགས་དང་སྟག་ཚང་དཀོན་མཆོག་ནང་མི་གཉིས་ཀྱིས་སུད་སིའི་གྲོང་ཁྱེར་ (LUZERN) ལུ་རྫན་གྱི་གྲོང་སྡེ་ལས་ཁུངས་བརྒྱད་ཅུ་གྱ་བདུན་དང་ལུ་རྫན་གྲོང་ཁྱེར་སྲིད་གཞུང་། དེ་བཞིན་སུད་སིའི་གྲོས་ཚོགས་ལ་ད་ལྟའི་བོད་ཀྱི་ཛ་དྲག་གི་གནས་སྟངས་དང་། ས་གནས་གྲོང་སྡེ་ལས་ཁུངས་ཁག་གི་མདུན་བོད་ཀྱི་རྒྱལ་དར་སྒྲེང་འཛུགས་ཀྱི་འབོད་སྐུལ་ལས་འགུལ་ཞིག་སྤེལ་ཡོད་འདུག སྐབས་དེར་བོད་ཀྱི་རྒྱལ་དར་དང་བོད་མེ་ལ་སྲེག་དོན་ཅི་ཞེས་པའི་རྒྱབ་ཤ་དཀར་པོའི་དེབ། བོད་མིའི་སྒྲིག་འཛུགས་ཀྱི་དྲ་རྒྱ་གཙོས་བཙན་བྱོལ་བོད་མིའི་དྲ་ཚིགས་ཁག་གཅིག་གི་མཚན་བྱང་།

དེ་བཞིན་སྙན་ཞུ་དང་རྒྱལ་ཚོགས་ལ་ཕུལ་བའི་དོན་ཚན་དྲུག་ཅན་གྱི་གསར་འགོད་བསྒྲགས་གཏམ་སོགས་ཕུལ་ཏེ། ཆེས་ཡ་ང་ཞིང་ཡིད་སྐྱོ་བའི་གཞིས་ལུས་རྒྱ་ཆེའི་མི་མང་གི་སྡུག་བསྔལ་ལ་གདུང་སེམས་མཉམ་སྐྱེའི་ལས་འགུལ་ཞིག་སྤེལ་བ་དང་། ཉིན་དེར་རྒྱལ་ཚོགས་མདུན་དུའང་ཁོང་ཁྱིམ་ཚང་གཉིས་ཀྱིས་ཞུ་གཏུག་གི་ལས་འགུལ་ཐེངས་དྲུག་པ་སྤེལ་ཡོད་འདུག སྐབས་དེར་བཀའ་ཟུར་ཀིརྟི་རིན་པོ་ཆེ་མཆོག་བོད་དོན་ཞུ་གཏུག་གི་ཆེད་རྒྱལ་ཚོགས་སུ་ཕེབས་པ་དང་བསྟུན་ཁོང་ནང་མི་གཉིས་ཀྱིས་བོད་མིའི་སྐྱིད་སྡུག་མཉམ་མྱོང་གི་ལས་འགུལ་སྙན་གསེང་དང་འབྲེལ་བོད་ཀྱི་རྒྱལ་དར་ཕུལ་ཏེ་མཇལ་ཁ་ཞུས་ཡོད་འདུག་པ་བཅས། །