༢༠༡༣ ཟླ་ ༤ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༩ རེས་གཟའ་ཟླ་བའི་ཉིན་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གི་མཚན་ཐོག་ནས་ཕ་རན་སིའི་སྲིད་འཛིན་སྐུ་ཞབས་ཕེ་རན་ཀོ་ཡི་སི་ཧོལ་ལན་ཌི་མཆོག་ལ་ཐུགས་རྗེ་ཆེ་ཞུས་ཡོད། དེ་ཡང་སྲིད་འཛིན་མཆོག་གིས་ཕྱི་ལོ་ ༢༠༡༣ ཟླ་ ༤ ཚེས་ ༢༥ ཉིན་རྒྱ་ནག་ནང་རྒྱལ་དོན་འཚམས་གཟིགས་སྐབས་རྒྱ་ནག་གི་སྲིད་འཛིན་ཞི་ཇིང་ཕིང་དང་ལྷན་རྒྱ་ནག་ནང་གི་འགྲོ་བ་མིའི་ཐོབ་ཐང་སྤྱི་དང་། ལྷག་པར་བོད་དང་ཤིང་ཅང་ནང་གི་འགྲོ་བ་མིའི་ཐོབ་ཐང་སྐོར་གླེང་གློང་གནང་བར་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་ཐེངས་འདིར་ཐུགས་རྗེ་ཆེ་ཞུའི་ཕྱག་བྲིས་ནང་འཁོད་དོན།
བོད་མི་ཡོངས་ཀྱི་ཚབ་ཞུས་ཏེ། བོད་མི་མང་སྤྱི་འཐུས་ལྷན་ཚོགས་ཀྱིས་སྐུ་ཉིད་མཆོག་གིས་རྒྱ་ནག་དཔོན་རིགས་དང་ལྷན་བོད་ཀྱི་གནད་དོན་གླེང་སློང་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་དང་། སྐུ་ཉིད་མཆོག་གིས་བོད་མིའི་དཀའ་ངལ་ལ་གདུང་སེམས་མཉམ་སྐྱེའི་རྒྱབ་སྐྱོར་གནང་བ་དེར་ང་ཚོས་ཧ་ཅང་བཀའ་དྲིན་ཆེན་པོ་ཡིན་པ་བསམ་བཞིན་ཡོད། འབྱུང་འགྱུར་ཡང་བོད་མིའི་བདེན་དོན་ལ་སྐུ་ཉིད་མཆོག་གིས་མུ་མཐུད་རྒྱབ་སྐྱོར་གནང་རྒྱུའི་རེ་བ་ཞུ་རྒྱུ་ཡིན། ཞེས་འཁོད་འདུག །
