༢༠༡༣ ཟླ་ ༤ ཚེས་ ༢༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༤ ཚེས་ ༢༤ རེས་གཟའ་ལྷག་པའི་ཉིན་ཇར་མན་གྲོས་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པས་The Human Rights Committee of the German parliament བོད་ནང་དུ་བོད་མི་ཚོས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་གི་ལས་འགུལ་བསྟུད་མར་སྤེལ་བ་དེར་སེམས་ཚབ་ཧ་ཅང་ཡོད་པའི་བསྒྲགས་གཏམ་ཞིག་སྤེལ་བའི་ནང་འཁོད་དོན། བོད་ནང་དུ་རང་སྲེག་ལས་འགུལ་བསྟུད་མར་སྤེལ་མཁན་གྱི་གྲངས་འབོར་ལ་གཞིགས་སྐབས་ང་ཚོརཧང་སང་བྱུང་བ་མ་ཟད། སེམས་ཚབ་ཧ་ཅང་ཡོང་བཞིན་འདུག དེར་བརྟེན་ང་ཚོས་རྒྱ་ནག་གཞུང་ནས་བོད་མིའི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་དགོས་པ་མ་ཟད། བོད་མིའི་ཆོས་དད་རང་དབང་དང་རིག་གཞུང་སྲུང་སྐྱོབ་བྱ་རྒྱུའི་ཐོབ་ཐང་ལ་བརྩི་བཀུར་ཞུ་དགོས་པའི་རེ་འདུན་ཤུགས་ཆེ་འདོན་རྒྱུ་ཡིན། རེ་ཐང་ཆད་དེ་དཀའ་སྡུག་ཧ་ཅང་འོག་རང་སྲོག་གཅོད་བཞིན་པའི་བྱ་སྤྱོད་སྤེལ་མཁན་གྱི་བོད་མི་ཇེ་མང་དུ་འགྲོ་བཞིན་ཡོད།
རྒྱ་ནག་དཔོན་རིགས་ཚོས་བོད་མིའི་ཐུན་མིན་ངོ་བོ་དང་རིག་གཞུང་ལ་བརྩི་བཀུར་དངས་ལེན་མ་ཞུས་པར་བརྟེན། བོད་མི་ཚོས་ད་ཆ་འུ་ཐུག་གི་གནས་སུ་གྱར་ཏེ། རང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སོགས་ཀྱི་ཆེད་རང་སྲེག་ལས་འགུལ་སྤེལ་བཞིན་ཡོད། དེར་བརྟེན་ང་ཚོས་རྒྱ་ནག་གི་འགོ་ཁྲིད་གསར་པ་ཚོས་བོད་མིའི་དངོས་ཡོད་དཀའ་ངལ་སེལ་ཆེད་བཟང་ཕྱོགས་ཀྱི་ཁོར་ཡུག་བསྐྲུན་ཏེ་རྒྱ་ནག་གཞུང་གི་བོད་མིའི་ཐོག་འཛིན་བཞིན་པའི་སྲིད་བྱུས་དེར་བཅོས་འགྱུར་འོག བོད་མི་ཚོ་དང་འབྲེལ་བ་བྱ་རྒྱུའི་ལིའུ་གསར་པ་ཞིག་སྒོ་ཕྱེ་དགོས་པའི་འབོད་སྐུལ་ཞུ་རྒྱུ་ཡིན། རྒྱ་ནག་འགོ་ཁྲིད་ཚོས་བོད་མིའི་འགྲོ་བ་མིའི་ཐོབ་ཐང་དང་ཆོས་དད་དང། རིག་གཞུང་སྲུང་སྐྱོབ་ཀྱི་རང་དབང་ལ་ངེས་པར་དུ་བརྩི་བཀུར་ཞུ་དགོས། དེར་བརྟེན་ང་ཚོས་རྒྱ་ནག་གཞུང་གིས་བོད་མིའི་ཆོས་དད་ལ་དམ་བསྒྲགས་མཚམས་འཇོག་བྱེད་དགོས་པ་མ་ཟད། བོད་མིར་དྲག་གནོན་བྱ་རྒྱུ་འཕྲལ་མར་མཚམས་འཇོག་དགོས་པའི་རེ་འདུན་འདོན་པ་དང་སྦྲགས། ཕྱི་ལོ་ ༢༠༡༠ ནས་བོད་རྒྱ་འབྲེལ་མོལ་མཚམས་འཇོག་བྱུང་བ་དེ་སྐྱར་མཐུད་བྱེད་དེ་བོད་རྒྱ་གཉིས་སྨན་གྱི་ཐབས་ལམ་ཐོག་ནས་འབྱུང་འགྱུར་རང་སྲེག་ལས་འགུལ་དེ་རིགས་མཚམས་འཇོགས་ཡོང་ཆེད་ང་ཚོས་རྒྱ་ནག་འགོ་ཁྲིད་ཚོར་རེ་འདུན་ཞུ་རྒྱུ་མ་ཟད། གཞིས་བཞུགས་བོད་མི་ཚོར་རང་གི་ཆོས་སྲིད་དབུ་ཁྲིད་རྣམས་ཀྱིས་ལམ་སྟོན་ལྟར་རང་སྲེག་ལས་འགུལ་དེ་རིགས་མཚམས་འཇོགས་ཀྱིས་ཐབས་ལམ་གཞན་གྱི་ཐོག་ནས་ཞི་རྒོལ་གྱི་ལས་འགུལ་སྤེལ་རོགས་ཞེས་འབོད་སྐུལ་ཞུ་རྒྱུ་ཡིན། མིའི་ཚེ་སྲོག་ནི་ཧ་ཅང་རྩ་བ་ཆེན་པོ་ཡིན།
བོད་མི་མཁས་དབང་ཚོས་འཚེ་མེད་ཞི་བ་འགྲེལ་བརྗོད་སྐབས་རང་གིས་རང་ལ་འཚེ་བ་བྱ་རྒྱུ་འཛེམས་དགོས་པ་གསུངས་ཡོད།
དེར་བརྟེན་ང་ཚོས་བོད་མིའི་ཆོས་ཕྱོགས་ཀྱི་དབུ་ཁྲིད་ཚོས་བོད་རིགས་ཆོས་གྲོགས་ཕོ་མོ་རྣམས་ལ་ལས་འགུལ་དེ་རིགས་ནམ་ཡང་མ་སྤེལ་རྒྱུར་འབོད་སྐུལ་ཡོང་བའི་རེ་བ་ཞུ་རྒྱུ་དང། ང་ཚོས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལྕམ་སྐུ་ན་ཝི་པིལ་ལེ་ Navi Pillay མཆོག་དང་ཡུ་རོབ་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚན་པ་དང་། ཕྱོགས་མཚུངས་ཡུ་རོབ་གྲོས་ཚོགས་ཀྱི་ཆེས་མཐོའི་སྐུ་ཚབ་ལྕམ་སྐུ་ཁེ་ཐེ་རིན་ཨེ་ཤི་ཊོན་ Catherine Ashton མཆོག དེ་བཞིན་གྲོས་ཚོགས་འདྲ་མིན་དང། ཚོགས་པ་སྒྲིག་འཛུགས། གལ་ཆེའི་མི་སྣ་སོགས་ཀྱི་ཁ་གཅིག་བསྒྲགས་ཐོག་ནས་བོད་ནང་གི་གནས་སྟངས་ལ་སེམས་ཚབ་གྱི་རྣམ་པ་སྟོན་པའི་བསྒྲགས་གཏམ་དེ་དག་ལ་རྒྱབ་སྐྱོར་ཤུགས་ཆེ་ཞུ་རྒྱུ་མ་ཟད། བོད་ནང་དུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྟོག་ཞིབ་ཚོགས་ཆུང་དང། གྲོས་ཚོགས་འཐུས་མི། དེ་བཞིན་གསར་འགོད་པ་བཅས་བོད་ནང་དུ་ཆེད་གཏོང་འཇུག་དགོཔས་པའི་འབོད་སྒྲ་དེར་རྒྱབ་སྐྱོར་ཞུ་རྒྱུ་ཡིན།
དེ་བཞིན་ང་ཚོས་ཇར་མན་སྲིད་གཞུང་ལ་བོད་ནང་གི་གནས་སྟངས་ཡར་རྒྱས་གཏོང་ཆེད་ཇར་རྒྱ་ཡུལ་གཉིས་དབར་མུ་མཐུད་འབྲེལ་བ་རྒྱུན་འཁྱོངས་གནང་རྒཡུ་མ་ཟད། རྒྱལ་སྤྱིའི་གནས་བབ་ཐོག་ནས་འབད་བརྩོན་ཡང་གནང་རོགས་ཞུ་རྒྱུ་ཡིན་ཞེས་འཁོད་འདུག
