༢༠༡༣ ཟླ་ ༤ ཚེས་ ༢༢ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དབྱིན་ཇིའི་གཙུག་ལག་སློབ་གྲྭ་སྙན་གྲགས་ཅན་ཀེམ་བྷི་རི་ཆིར་ (Cambridge) ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཕྱི་ལོ་ ༢༠༡༣ ཟླ་ ༤ ཚེས་ ༢༠ ཉིན་དབྱིན་ཇིའི་གྲོང་ཁྱེར་ཀེམ་བྷི་རི་ཆིར་ (Cambridge) ཁྱབ་ཁོངས་སན་ཇོན་སི་ (St John’s College) མཐོ་རིམ་སློབ་གཉེར་ཁང་དུ་ཆིབས་སྒྱུར་བསྐྱངས་ཏེ་སློབ་གཉེར་ཁང་དེའི་དགེ་ལས་སློབ་ཕྲུག་རྣམས་ལ་སེམས་ལ་༼སློབ་སྦྱོང་ཇི་ལྟར་སྤྲོད་དགོས་༽ཞེས་པའི་བརྗོད་གཞིའི་འོག་བྱམས་བརྩེའི་ཕན་ཡོན་སྐོར་ལ་བཀའ་སློབ་སྩལ་ཡོད། དེ་ཡང་ཐོག་མར་མགོན་པོ་གང་ཉིད་མཆོག་གིས་ཀེམ་བྷི་རི་ཆིར་སོགས་མཐོ་སློབ་ཁག་བཞི་ཙམ་ནས་ཆེད་བཅར་ཞུས་པའི་རྒྱ་རིགས་སློབ་ཕྲུག་ ༡༣༠ ཙམ་ལ་མཇལ་ཁ་དང་སེམས་ཀྱི་བདེ་སྐྱིད་སྐོར་བཀའ་སློབ་སྩལ་བ་མ་ཟད། བོད་རྒྱའི་སྐོར་ལ་བཀའ་སློབ་ཕེབས་དོན།
དེ་རིང་ངོས་རང་དབྱིན་ཡུལ་དུ་ཡོང་ནས་ཁྱེད་རང་ཚོ་མཐོ་སློབ་འགྲིམ་བཞིན་པའི་རྒྱ་རིགས་སློབ་ཕྲུག་ཚོ་ཐུག་པར་ཧ་ཅང་དགའ་པོ་བྱུང། སྤྱིར་བཏང་བོད་རྒྱ་གཉིས་ལ་ཆ་མཚོན་ན་ལོ་རྒྱུས་ཐོག་སྐབས་རེ་འཁྲུག་རྩོད་དང་མཚམས་རེ་མཛའ་མཐུན་ངང་གནས་པ་དེ་འདྲ་བྱུང་ཡོད། གང་ལྟར་ང་ཚོ་ཕན་ཚུན་མ་དགའ་བ་བྱས་ཏེ་འཛམ་གླིང་གཞན་དུ་གནས་སྤོ་བྱེད་ཐབས་མེད། དེར་བརྟེན་ང་ཚོ་ཕན་ཚུན་ཡིད་ཆེས་ཡོད་པའི་ཐོག་ནས་འབྲེལ་བ་བྱེད་དགོས་པ་མ་ཟད། ཕན་ཚུན་གདོང་དང་གདོང་ཐུག་ནས་སྐད་ཆ་ཤོད་རྒྱུ་ཧ་ཅང་གལ་འགངས་ཆེན་པོ་ཆགས་ཡོད། ངོས་རང་ལ་ཆ་མཚོན་ན་དུས་ད་ལྟ་བར་དུ་བོད་རྒྱ་འགྲིག་ཆགས་ཡོང་ཆེད་ཐབས་ཤེས་ཡོད་དགུ་རྩལ་སྤྲུག་བྱས་པ་ཡིན་ལ་ད་དུང་ཡང་དེར་འགྱུར་བ་གང་ཡང་མེད། རྒྱ་ནག་གཞུང་ཕྱོགས་ནས་ད་ལྟ་བར་དུ་སྲིད་བྱུས་མཁྲེགས་པོ་བཟུང་ནས་བསྡད་པ་རེད། ཉེ་དུས་རྒྱ་ནག་གཞུང་ལ་འགོ་ཁྲིད་གསར་པ་ཞིག་སླེབས་ཡོད། གཅིག་བྱས་ན་དེའི་ངོས་ནས་བསམ་པོ་བློ་གསར་པ་དེ་འདྲ་བཏང་སྟེ་ཡག་ཏུ་འགྲོ་རྒྱུའི་རེ་བ་བྱེད་བཞིན་ཡོད། འོན་ཀྱང་མི་དམངས་ཕན་ཚུན་འབྲེལ་བ་བྱ་རྒྱུ་ནི་ཤིན་ཏུ་ནས་གལ་གནད་ཆེན་པོ་རེད། ངོས་རང་ས་ཕྱོགས་གང་དུ་ཕྱིན་ཡང་རྒྱ་མིའི་སློབ་ཕྲུག་དང་ཡུལ་སྐོར་སྤྲོ་འཆམ་དུ་ཡོང་མཁན་རྣམས་ཐུག་འཕྲད་བྱ་རྒྱུའི་འབད་བརྩོན་བྱེད་བཞིན་ཡོད། རྡ་སར་ཆ་བཞག་ན་རྒྱ་རིགས་མང་དག་ཅིག་ངོས་རང་ཐུག་པར་ཡོང་གི་འདུག ཁོང་ཚོ་ཐུག་སྟེ་ང་ཚོ་ཕན་ཚུན་ཧ་ཅང་འབྲེལ་བ་ཡག་པོ་ཡོད། ཁྱེད་རང་ཚོར་ཆ་བཞག་ན་དེ་རིང་ངོས་རང་ཐུག་པ་རེད། དེར་བརྟེན་ཁྱེད་རང་ཚོས་དངོས་ཡོད་གནས་ཚུལ་གང་ཡིན་ཤེས་ཐབས་བྱ་རྒྱུ་གལ་ཆེན་པོ་རེད། རྒྱ་ནག་གཞུང་ཕྱོགས་ནས་ངོས་རང་བདུད་རེད་ཅེས་བརྗོད་ཀྱི་འདུག་པས་བྱབ་ཆུང་གི་སྐད་ཆ་རེད། ངོས་ཀྱིས་བོད་རྒྱ་གཉིས་ཀར་ཕན་པའི་དབུ་མའི་ལམ་གྱི་སྲིད་བྱུས་བཟུང་བ་ལས་རང་བཙན་རྩོད་ཀྱི་མེད་ཅེས་ལོ་མང་པོའི་སྔོན་ནས་བརྗོད་ཟིན། གང་ལྟར་འཛམ་གླིང་ལ་འགྱུར་བ་འགྲོ་བཞིན་ཡོད་སྟབས། དེེའི་ཐོག་ཁྱེད་རང་ཚོས་བསམ་བློ་ངེས་པར་དུ་གཏོང་དགོས། དེ་བཞིན་ང་ཚོ་མཐུན་ལམ་ཐོག་མཉམ་དུ་སྡོད་རྒྱུ་ནི་ཧ་ཅང་གལ་ཆེན་པོ་ཆགས་ཀྱི་ཡོད། ཅེས་སོགས་ཀྱི་བཀའ་སློབ་སྩལ་ཏེ་སྐུ་པར་ཡང་ལྷན་སྒྲོན་མཛད་ཡོད།
ཕྱེད་ཡོལ་མགོན་པོ་གང་ཉིད་མཆོག་གིས་སན་ཇོན་སི་ལྷ་ཁང་ཞིག་ནང་ཆིབས་སྒྱུར་བསྐྱངས་ཏེ་མཐོ་སློབ་དེའི་དགེ་ལས་སློབ་ཕྲུག་རྣམས་ལ་༼སེམས་ལ་སློབ་སྦྱོང་ཇི་ལྟར་སྤྲོད་དགོས་༽ཞེས་པའི་བརྗོད་གཞིའི་འོག་བྱམས་བརྩེའི་ཕན་ཡོན་སྐོར་ལ་བཀའ་སློབ་སྩལ་དོན། སྤྱིར་བཏང་རང་རྒྱུད་ལ་ཇི་ཙམ་བྱམས་བརྩེ་དང་སྙིང་སྟོབས་ཆེན་པོ་ཡོད་པ་དེའི་ཚོད་ཀྱིས་རང་ཉིད་ལ་གདེང་ཚོད་ཡོང་གི་ཡོད། དེ་ལ་བརྟེན་ནས་ཡིད་ཆེས་དང་ཕྱི་གསལ་ནང་གསལ་མཛའ་མཐུན་བཅས་ཡོང་བཞིན་ཡོད། དེ་བཞིན་དེང་སྐབས་ཚན་རིག་གི་མཁས་པ་མང་པོས་ཕྱིའི་ལུས་པོའི་བདེ་ཐང་ཡོང་བར་གཙོ་བོ་ནང་སེམས་བདེ་ཐང་དགོས་སྐོར་གསུངས་པ་ལྟར། ནང་སེམས་ཀྱི་བདེ་སྐྱིད་གཙོ་བོ་ནི་བྱམས་བརྩེར་ཐུག་ཡོད། ལྷག་པར་ང་ཚོ་ཚང་མའི་རྒྱུད་ལ་བྱམས་བརྩེའི་ཡོན་ཏན་གོང་འཕེལ་ཡོང་བར་ཆོས་དང་མ་འབྲེལ་བའི་ཡ་རབས་སྤྱོད་བཟང་གི་བསླབ་བྱ་སྤྲོད་སྟངས་ཡར་རྒྱས་གཏོང་སྐོར་སོགས་ཀྱི་བཀའ་སློབ་སྩལ་ཡོད།
