༢༠༡༣ ཟླ་ ༣ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༣ ཚེས ༡༨ ནས་འགོ་འཛུགས་ཀྱིས་ཕྱི་ཚེས་ ༡༩ བར་ཨ་རིའི་ནང་གནས་སྡོད་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཉིན་གྲངས་གཉིས་རིང་ཨ་རིའི་རྒྱལ་ས་ཝ་ཤིང་ཊོན་ལ་ཆེད་ཕེབས་ཀྱིས་ཨ་རིའི་གྲོས་ཚོགས་འཐུས་མི་རྣམས་ལ་བོད་དོན་ཞུ་གཏུག་གི་ལས་འགུལ་སྤེལ་མུས་ཡིན་འདུག
གནད་དོན་དེའི་སྐོར་ཨ་རིའི་རྒྱལ་སར་ཡོད་པའི་རྒྱལ་སྤྱིའི་བོད་དོན་ལས་འགུལ་ཁང་གི་ལས་བྱེད་བསྟན་ཆོས་ལགས་ཀྱིས་བརྒྱུད་ལམ་ཁག་ནང་འགྲེལ་བརྗོད་ནང་གསལ། དེང་སྐབས་བོད་ནང་གི་བོད་མི་མང་པོས་རང་ལུས་མེར་སྲེག་བཏང་ནས་རྒྱ་ནག་གཞུང་གིས་བོད་ཐོག་འཛིན་པའི་གདུག་རྩུབ་དང་དྲག་གནོན་ཆེ་བའི་སྲིད་བྱུས་ལ་ངོ་རྒོལ་རྔམ་སྟོན་གཅིག་རྗེས་གཉིས་མཐུད་གནང་བཞིན་པའི་ཛ་དྲག་ཆེ་ལ་ཡིད་ཧ་ཅང་སྐྱོ་བའི་གནས་ཚུལ་རིམ་པར་མང་པོ་ཐོན་དང་འཐོན་བཞིན་པའི་སྐབས་འདིར་བོད་དོན་ཞུ་གཏུག་གི་ལས་འགུལ་སྤེལ་རྒྱུ་ནི་ཧ་ཅང་གལ་གནད་ཆེན་པོ་ཆགས་ཡོད། དེར་བརྟེན་ཐེངས་འདིའི་ལས་འགུལ་ནང་བོད་མི་དང་བོད་དོན་རྒྱབ་སྐྱོར་བ་སྔར་བས་མང་བ་ཕེབས་ཏེ་ལས་འགུལ་སྤེལ་བཞིན་ཡོད། ཅེས་གསུངས། དེ་བཞིན་ཨ་རིའི་གྲོས་ཚོགས་འཐུས་མི་རྣམས་ལ་བོད་དོན་ཞུ་གཏུག་ཆེད་ཕེབས་པའི་བོད་མི་དང་བོད་དོན་རྒྱབ་སྐྱོར་བ་རྣམས་ལ་ཞུ་གཏུག་གནང་ཕྱོགས་སོགས་ཀྱི་ཐད་ཆུ་ཚོད་གཉིས་ལྷག་ཙམ་རིང་ཟབ་སྦྱོང་ཞིག་ཀྱང་རྒྱལ་སྤྱིའི་བོད་དོན་ལས་འགུལ་ཁང་ནང་སྤྲད་འདུག
ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམས་ལ་བོད་དོན་ཞུ་གཏུག་གི་ལས་འགུལ་དེ་ནི་ཨ་རིའི་ནང་གི་བོད་དོན་རྒྱབ་སྐྱོར་ཚོགས་པ་ཁག་དང་བོད་རིགས་སྤྱི་མཐུན་ཚོགས་པ་ཁག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་བཅས་མཉམ་འབྲེལ་སྒོ་ནས་གོ་སྒྲིག་ཞུས་པ་ཞིག་ཡིན་འདུག དེ་བཞིན་ཕྱི་ཚེས་ ༡༩ ཉིན་གྱི་ཕྱི་དྲོ་ཆུ་ཚོད་ ༤ པའི་ཐོག་ཨ་རིའི་ནང་བཅའ་བཞུགས་སྐུ་ཚབ་དོན་གཅོད་བཀའ་ཟུར་བློ་བཟང་སྙན་གྲགས་ལགས་ཀྱིས་བཙན་བྱོལ་ནང་དབུས་བོད་མིའི་སྒྲིག་འཛུགས་ལ་འཕྲད་བཞིན་པའི་དཀའ་ངལ་དང་གོ་སྐབས་ཅེས་པའི་བརྗོད་གཞིའི་ཐོག་ཨ་རིའི་རྒྱལ་སའི་ནང་གི་གཙུག་ལག་སློབ་གྲྭ་ཆེན་མོ་ (George Washington University) ནང་གསུང་བཤད་གནང་འཆར་ཡོད་འདུག
ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་རྣམས་ལ་བོད་དོན་ཞུ་གཏུག་གི་ལས་འགུལ་དེ་ནི་ཕྱི་ལོ་ ༢༠༠༨ ལོར་དབུ་འཛུགས་གནང་བ་ནས་ཞུ་གཏུག་གི་ལས་འགུལ་དེ་ནི་ཐེངས་ལྔ་པ་དེ་ཡིན་འདུག་པ་བཅས། །
