༢༠༡༣ ཟླ་ ༣་ཚེས་ ༢༩ རེས་གཟའ་པ་སངས།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་ཕྱི་ལོ་ ༢༠༡༣ ཟླ་ ༣ ཚེས་ ༡༨ ནས་འགོ་འཛུགས་ཀྱིས་དེ་རིང་ཚེས་ ༢༨ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད་ཅིང་། ལྷན་ཚོགས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་སྡོམ་གསུང་བཤད་གནང་དོན།
སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ཉིན་དང་པོའི་ལས་རིམ་དེ་བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པའི་འོག་ཕྱི་ཟླ་ ༩ པ་ནས་དེ་རིང་གྲོས་ཚོགས་མ་ཚོགས་བར་དུ་རང་ལུས་མེར་སྲེག་གནང་མཁན་ ༥༨ གི་མཚན་དང་། དེའི་གོང་དུ་རང་ལུས་མེར་སྲེག་གནང་མཁན་ཚང་མ་བསྡོམས་པའི་གནས་སྟངས་ལ་མྱ་ངན་གུས་འདུད་ཀྱི་ལས་རིམ་དང་པོ་བཞག་དགོས་བྱུང་ཡོད། དེ་བཞིན་དེ་རིང་ཉིན་མཐའ་མ་དང་གྲོས་ཚོགས་མཇུལ་སྒྲིལ་བཞིན་ཡོད། གྲོས་ཚོགས་འཚོགས་སྐབས་རང་ལུས་མེར་སྲེག་གནང་མཁན་གཉིས་དང་། ན་ནིང་ལོར་རང་ལུས་མེར་སྲེག་གནང་མཁན་གཉིས་ཀྱི་མཚན་གཞུང་དེ་རིང་བསྣན་པའི་ཐོག་ནས་ལས་རིམ་མཐའ་མ་འདི་ཡང་མྱ་ངན་གུས་འདུད་བྱེད་དགོས་པའི་གནས་སྟངས་ཤིག་ཏུ་གྱུར་ཡོད། བོད་ནང་གི་ཛ་དྲག་གནས་སྟངས་སེལ་རྒྱུར་དུས་ད་ལྟ་ཡིན་རུང་རྒྱ་ནག་གཞུང་ནས་བཟང་ཕྱོགས་ཀྱི་ཡ་ལན་བྱེད་ཀྱི་མེད་པའི་གནས་སྟངས་གསལ་པོ་ཆགས་ཡོད། ཅེས་ཞུ་རྒྱུ་ཡིན།
དེ་རིང་ཕྱི་ལོ་ ༢༠༡༣ ཟླ་ ༣ ཚེས་ ༢༨ ཉིན་མོ་འདི་ཕྱི་ལོ་ ༡༩༥༩ ཟླ་ ༣ ཚེས་ ༢༨ ཉིན་རྒྱ་ནག་གཞུང་ནས་བོད་མི་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་བཀྲོལ་གཏོང་གི་ཡིན། ཞེས་གསལ་བསྒྲགས་བྱས་ཡོད། ཕྱི་ལོ་ ༢༠༠༩ ཟླ་ ༡ ཚེས་ ༡༩ ཉིན་བོད་རང་སྐྱོང་ལྗོངས་མི་དམངས་འཐུས་ཚོགས་ནང་ལ་གཏན་འབེབས་བྱས་ཡོད། གཏན་འབེབས་བྱེད་རྒྱུ་དེ་ཡང་ང་ཚོ་བོད་མི་བཙན་བྱོལ་དུ་གྱར་ནས་ལོ་ལྔ་བཅུ་འཁོར་བའི་སྲུང་བརྩི་བྱ་རྒྱུའི་ཁ་གཏད་དུ་ལངས་པ་ལྟ༌བུ་བྱས་ཡོད། དེའི་སྐབས་ལ་རྒྱ་ནག་གཞུང་ནས་གསལ་བསྒྲགས་བྱས་པའི་བོད་མི་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་བཀྲོལ་བཏང་བའི་ཉིན་མོ་ཡིན། ཞེས་པ་དེར་བོད་མིའི་སྒྲིག་འཛུགས་ངོས་ནས་རྩ་བ་ནས་ངོས་ལེན་མེད་པའི་
གྲོས་ཆོད་ཅིག་ཕྱི་ལོ་ ༢༠༠༩ ཟླ་ ༣ ཚེས་ ༢༧ ཉིན་མོར་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་ཐོག་ནས་བཞག་ཡོད། དེའི་ཕྱི་ཉིན་དེར་ཕྱི་དྲིལ་བཀའ་བློན་མཆོག་གིས་བཀའ་ཤག་གི་ངོས་ནས་ངོས་ལེན་མེད་པའི་གསར་འགོད་བསྒྲགས་གཏམ་སྤེལ་ཡོད། དུས་ད་ལྟ་ཡིན་རུང་བོད་ནང་ཛ་དྲག་གི་གནས་སྟངས་མུ་མཐུད་ནས་གནས་ཡོད་སྟབས། རྒྱ་ནག་གཞུང་ནས་གསལ་བསྒྲགས་དང་གཏན་འབེབས་བྱས་པའི་བོད་མི་ཡར་ལངས་ཞིང་བྲན་ཁྲི་ཚོ་བརྒྱ་ལ་བཅིངས་བཀྲོལ་བཏང་བ་ཡིན་ཞེས་པ་དེར་ངོས་ལེན་རྩ་བ་ནས་ཞུ་ཐབས་མེད། ཅེས་དེ་རིང་གྲོས་ཚོགས་ཀྱི་ཉིན་མཐའ་མའི་ཚོགས་གཙོའི་མཇུག་སྡོམ་གྱི་གཏམ་བཤད་ཐོག་ནས་ནན་བརྗོད་བྱེད་བཞིན་ཡོད།
ཚོགས་གཙོའི་མཇུག་སྡོམ་གཏམ་བཤད་ནང་གྲོས་ཚོགས་ཀྱི་ལས་རིམ་དང་འབྲེལ་བའི་ཚོགས་གཙོ་གཉིས་ལ་མཐོང་ཚུལ་ག་རེ་བྱུང་ཡོད་མེད་ཐོག་ནས་མ་འོངས་པར་ང་རང་ཚོ་ལེགས་བཅོས་ཡོང་རྒྱུའི་རེ་བ་ཞུ་བཞིན་ཡོད། སྤྱི་ཡོངས་ཀྱི་ཆ་ནས་ད་རེས་གྲོས་ཚོགས་ཀྱི་ལས་དོན་ཐོག་མར་གྲོས་ཚོགས་འགོ་མ་ཚུགས་སྔོན་ལ་ཚོགས་གཙོའི་དབུ་འབྱེད་གཏམ་བཤད་ནང་རེ་འདུན་ཞུས་པ་ལྟར། དཔལ་ལྡན་སྲིད་སྐྱོང་མཆོག་གིས་དབུས་བཀའ་བློན་རྣམ་པ་དང་དཔལ་ལྡན་ཚོགས་གཙོ་གཞོན་པས་དབུས་སྤྱི་འཐུས་རྣམ་པ་ཚང་མས་ཚོགས་གཙོ་གཉིས་ཀྱི་ལས་དོན་སྟངས་འཛིན་བྱེད་རྒྱུ་དང་ལམ་རིམ་སྒྲིག་རྒྱུ་རེད། དེའི་ཐོག་མཐུན་འགྱུར་ཧ་ཅང་ཡག་པོ་གནང་བྱུང་བར་བརྟེན་ཚང་མར་ཚོགས་གཙོ་གཉིས་ཀྱི་ངོས་ནས་ཐུགས་རྗེ་ཆེ་ཞུ་རྒྱུ་ཡིན། སྐབས་མཚམས་སུ་ཚིག་མཐོ་དམན་གྱི་གནས་ཚུལ་ཕྲན་བུ་བྱུང་ཡོད། རྒྱ་ཆེའི་མང་ཚོགས་ཀྱིས་ང་ཚོའི་མང་གཙོ་དང་གྲོས་ཚོགས་ཀྱི་འགྲོ་ལུགས་དེ་དག་ཕྱི་གསལ་ནང་གསལ་དང་ཁ་གསལ་གཏིང་གསལ་ཐོག་ནས་ཕན་ཚུལ་གྲོས་ཚོགས་ཀྱི་ར་བའི་ནང་ལ་སྤྱི་དོན་སེམས་ལ་བཅངས་ནས་དགོངས་ཚུལ་གསུངས་པ་ཞིག་མ་གཏོགས་གྲོས་ཚོགས་ནས་ཕྱི་ལ་ཐོན་སྐབས། ང་ཚོ་མི་སྒེར་ལ་སྡང་ཟུག་བྱེད་རྒྱུའི་རྣམ་འགྱུར་རྩ་བ་ནས་མེད། ཅེས་རྒྱ་ཆེའི་ཉན་མཁན་ཚོར་ཞུ་འདོད་བྱུང་།
ལྷག་པར་བོད་ནང་ལ་ཡོད་པའི་བོད་མི་ཚོར་ཞུ་རྒྱུར། ང་ཚོའི་གྲོས་ཚོགས་ནང་བགྲོ་གླེང་དང་ཐག་གཅོད་བྱེད་སྟངས་ཐོག་ནས་ཚིག་དང་རྣམ་འགྱུར་བེད་སྤྱོད་གཏོང་སྟངས་ཚང་མ་འཛམ་གླིང་སྤྱི་ཡོངས་ཀྱི་མང་གཙོའི་ལམ་ལུགས་ནང་ཧ་ཅང་མང་པོ་ཡོད། དེ་ཚོ་དང་བསྡུར་ན་ང་ཚོའི་བགྲོ་གླེང་གནང་སྟངས་དང་མང་གཙོའི་ལམ་ལུགས་ཚད་དང་ལྡན་པ་ལྟར། ཕྱི་གསལ་ནང་གསལ་བྱེད་རྒྱུ་དེ་འཛམ་གླིང་གི་གྲོས་ཚོགས་གཞན་དང་བསྡུར་ན། ཞི་འཇམ་དང་བཟང་སྤྱོད་ལྡན་པ་ཞིག་ཆགས་ཡོད། ཅེས་ཞུ་འདོད་བྱུང་། སྤྱི་ཡོངས་ནས་སྤྱི་འཐུས་དང་བཀའ་བློན་རྣམ་པ། ལྷག་པར་སྤྱི་འཐུས་རྣམ་པས་ད་རེས་དངུལ་རྩིས་ལས་རིམ་དང་། གདུང་སེམས་མཉམ་སྐྱེའི་ལམ་རིམ་སྐབས། ལས་དོན་གཞན་དང་འབྲེལ་བའི་དྲི་བ་གཏོང་སྟངས་དང་བགྲོ་གླེང་གནང་སྐབས། ཚང་མས་ཡིག་ཆ་ཁག་ལ་ཐུགས་ཞིབ་ཡག་པོ་གནང་སྟེ་དྲི་བ་བཏང་བ་དང་བགྲོ་གླེང་ནང་ཆ་ཤས་བླངས་ཏེ་ཐུགས་སྣང་ཆེན་པོ་གནང་བའི་ཚོར་བ་ཚོགས་གཙོའི་ངོས་ནས་བྱུང་ཞེས་ཞུ་རྒྱུ་ཡིན། སྐབས་རེ་ཚོར་བ་རྣོན་པོའི་སྐད་ཆ་ཤོད་རེས་ཐེངས་འདིའི་གྲོས་ཚོགས་ནང་བྱུང་ཡོད། ང་ཚོ་ཚང་མ་འཇིག་རྟེན་གྱི་འཁོར་བ་འདིའི་ནང་གནས་ཡོད་སྟབས། ཉོན་མོངས་དུག་གསུམ་གྱི་དགྲ་བཅོམ་ཐུབ་མེད་པར་བརྟེན། གནས་ཚུལ་དེ་རིགས་ཡོང་ངེས་རེད། འོན་ཀྱང་ག་ཚོད་ཐུབ་ཐུབ་ཀྱིས་སྤྱི་པའི་ལས་དོན་བྱེད་སྐབས་སྒེར་གྱི་ཚོར་བ་བཞག་སྟེ་དོན་དག་དང་རྒྱུ་མཚན་ཐོག་འགྲོ་རྒྱུ་དེ་གནད་འགག་ཆེན་པོ་རེད་ཞུ་འདོད་བྱུང་། ཞེས་སོགས་ཀྱི་གསུང་བཤད་གནང་སྟེ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་རྒྱལ་ཁའི་ངང་ནས་མཇུག་སྒྲིལ་གནང་ཡོད་པ་བཅས།།
