༢༠༡༣ ཟླ་ ༣ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༧ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ལྡི་ལི་ནས་མཁའ་ལམ་བརྒྱུད་སླེ་རུ་ཕེབས་འབྱོར་སྐབས་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་གྱིས་གཙོས་ལས་བྱེད་རྣམས་དང་མི་མང་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད།
ཕྱི་ཚེས་ ༨ ཉིན་ལ་དྭགས་རྒོད་ཡུལ་དང་། བྱང་ཐང་བཀག་གཞུང་མི་མང་ལ་ཐུག་འཕྲད་ཚོགས་འདུ་གྲུབ་མཚམས་བྱང་ཐང་ཧན་ལེར་ཕེབས་ཐོན་གནང་རྒྱུ་དང། ཕྱི་ཚེས་ ༩ ཉིན་ལ་དྭགས་བྱང་ཐང་ཧན་ལེ་དང་། བྱང་ཐང་ཉི་མར་མི་མང་དང་སློབ་ཕྲུག་ཐུག་འཕྲད། དེ་བཞིན་ཚོགས་འདུ་གྲུབ་རྗེས་བྱང་ཐང་གསུམ་མདོར་ཕེབས་ཐོན་གནང་རྒྱུ་ཡིན་འདུག ཕྱི་ཚེས་ ༡༠ ཉིན་བྱང་ཐང་གསུམ་མདོའི་མི་མང་དང་ཐུག་འཕྲད་ཀྱི་ཚོགས་འདུ་གྲུབ་མཚམས་བྱང་ཐང་ས་སྨད་དུ་ཕེབས་འབྱོར་གྱིས་ཕྱི་ཚེས་ ༡༡ ཉིན་བྱང་ཐང་ས་སྨད་མི་མང་དང་ཐུག་འཕྲད་ཀྱི་ཚོགས་འདུ་གྲུབ་རྗེས་སླེ་རུ་ཕྱིར་ལོག་གནང་རྒྱུ་ཡིན་འདུག ཕྱི་ཚེས་ ༡༢ ཉིན་སླེ་ནས་བྱང་ཐང་ཆུ་ཤུལ་དུ་ཕེབས་ཐོན་གྱིས་མི་མང་དང་ཐུག་འཕྲད་རྗེས་སླེ་རུ་ཕྱིར་ལོག་གནང་རྒྱུ་དང་། ཕྱི་ཚེས་ ༡༣ ཉིན་སྔ་དྲོ་ལ་དྭགས་སླེ་ཁུལ་མི་མང་དང་ཚོགས་ཆེན་གནང་གྲུབ་མཚམས་ཕྱི་དྲོ་སླེ་ཁུལ་གྱི་ས་གནས་དཔོན་རིགས་ཁག་གཅིག་དང་ཐུག་འཕྲད་གནང་རྒྱུ། ཕྱི་ཚེས་ ༡༤ ཉིན་སླེ་ནས་ཇ་མུ་བརྒྱུད་ཕྱིར་ཕེབས་གནང་རྒྱུ་ཡིན་འདུག
དེ་ཡང་ཐེངས་འདིར་ལ་དྭགས་བྱང་ཐང་ས་ཁུལ་དུ་གངས་སྐྱོན་ཤུགས་ཆེ་ཕོག་སྟེ་བོད་མི་འབྲོག་པ་རྣམས་ཀྱི་སྒོ་ཕྱུགས་ཧ་ཅང་མང་པོའི་ཚེ་སྲོག་ཤོར་བ་སོགས་ཀྱི་དཀའ་ངལ་འཕྲད་པ་དེར་ངལ་སེལ་རོགས་སྐྱོར་ཆེད་བོད་མིའི་སྒྲིག་འཛུགས་བཀའ་ཤག་གིས་ཧིན་སྒོར་འབུམ་ལྔ་གསོལ་རས་གནང་བར་ལ་དྭགས་བསོད་ནམས་གླིང་བོད་མིའི་གཞིས་ལས་ཁང་ནས་ཐུགས་རྗེ་ཆེ་ཞུས་ཡོད་པ་བཅས།།
