༢༠༡༣ ཟླ་ ༣ ཚེས་ ༦ རེས་གཟའ་ལྷག་པ།
༄༅། །དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་ཕྱི་ལོ་ ༢༠༡༣ ཟླ་ ༣ ཚེས་ ༦ ཉིན་ཐེ་ཝན་དུ་གཞུང་འབྲེལ་ཕྱོགས་ཕེབས་ཀྱིས་ཕྱི་ཚེས་ ༨ ཉིན་གྱི་སྔ་དྲོ་དོན་ཁང་གི་ལས་ཁུངས་སུ་ལྟ་སྐོར་དང་སྦྲགས་དོན་ཁང་གི་ལས་དོན་ཁག་སྙན་གསན་གྲུབ་མཚམས་གྲོས་ཚོགས་འཐུས་མི་ཁག་གཅིག་དང་ལྷན་མཇལ་འཕྲད་གནང་རྒྱུ་ཡིན་འདུག ཕྱི་དྲོ་གངས་ལྗོངས་དཔེ་སྐྲུན་ཁང་གི་དྭང་ཞབས་འགན་འཛིན་དང་ལས་བྱེད་རྣམས་ངོ་སྤྲོད། དེ་བཞིན་ད་བར་བོད་དོན་སྐོར་དེབ་པར་སྐྲུན་ཞུས་པ་ཁག་སོགས་དཔེ་སྐྲུན་ཁང་གི་ལས་དོན་རྣམས་སྙན་གསན་དང་། ཕྱི་ཚེས་ ༩ ཉིན་གྱི་སྔ་དྲོ་ལག་དེབ་སྔོན་པོའི་ལས་གཞིར་རྒྱབ་སྐྱོར་གནང་མཁན་གྱི་སྦྱིན་བདག་ཁག་གཅིག་མཇལ་འཕྲད་གནང་རྒྱུ་ཡིན་པ་མ་ཟད། དགོང་དྲོ་གཞུང་འབྲེལ་མིན་པའི་ཚོགས་པ་དང་། བོད་དོན་རྒྱབ་སྐྱོར་ཚོགས་པའི་ཚོགས་མི་ལྷན་མཇལ་འཕྲད་གནང་རྒྱུ་ཡིན་འདུག ཕྱི་ཚེས་ ༡༠ ཏེ་གསུམ་བཅུའི་དུས་དྲན་ཐེངས་ ༥༤ མཛད་སྒོར་ལྷན་ཞུགས་ཀྱིས་གསུམ་དུས་གསུང་བཤད་གནང་གྲུབ་མཚམས་དོན་ཁང་ནས་གོ་སྒྲིག་ཞུས་པའི་འགྲེམས་སྟོན་ལ་ལྟ་སྐོར་གནང་རྒྱུ་དང། དགོང་དྲོ་ཐེ་ཝན་ནང་གནས་འཁོད་བོད་མི་རྣམས་ཐུག་འཕྲད་གནང་རྒྱུ་རེད་འདུག ཕྱི་ཚེས་ ༡༡ ཉིན་བོད་བརྒྱུད་ནང་བསྟན་ཆོས་ཚོགས་ཁག་གཅིག་ལ་ལྟ་སྐོར་གནང་གྲུབ་མཚམས་ཕྱི་ཚེས་ ༡༢ ཐེ་ཝན་ནས་ལྡི་ལིར་ཕྱིར་ཕེབས་གནང་རྒྱུ་ཡིན་འདུག་པ་བཅས། །
