༢༠༡༣ ཟླ་ ༣ ཚེས་ ༡༢ རེས་གཟའ་མིག་དམར།
༄༅། །འདི་གར་ཕྱི་ལོ་ ༢༠༡༣ ཟླ་ ༣ ཚེས་ ༡༢ ཉིན་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་ཐེ་ཝན་ནང་གཞུང་འབྲེལ་ཕྱོགས་ཕེབས་གནང་ཡོད་པ་ལྟར། ཐེ་ཝན་ནང་ཡོད་པའི་གཞུང་འབྲེལ་མིན་པའི་བོད་དོན་རྒྱབ་སྐྱོར་གནང་མཁན་ཁག་གཅིག་དང་མཇལ་མོལ་གནང་ཡོད། ཕྱི་ཟླ་ ༣ ཚེས་ ༨ ཉིན་གུང་རྒྱུན་དུ་བོད་དོན་དྭང་བླངས་ཞལ་འདེབས་འབུལ་མཁན་ཚོགས་མི་ཁག་གཅིག་ལྷན་དུ་མཇལ་མོལ་དང་། དགོང་དྲོ་བོད་དོན་རྒྱབ་སྐྱོར་གནང་མཁན་གཞུང་འབྲེལ་མིན་པའི་ཚོགས་པ་འདྲ་མིན་གྱི་ལས་མི་མཉམ་མཇལ་མོལ་གནང་སྟེ། ཁོང་རྣམ་པར་བཙན་བྱོལ་བོད་མིའི་ལྟ་གྲུབ་དང་། བོད་ནང་གི་ཛ་དྲག་གནས་སྟངས་ངོ་སྤྲོད་གནང་བ་མ་ཟད།
གངས་ལྗོངས་དཔེ་སྐྲུན་ཁང་ནས་གསར་དུ་པར་སྐྲུན་ཞུས་པའི་མི་ཐོག་གཉིས་ཀྱི་དཀའ་སྡུག་ཅེས་པའི་དེབ་དབུ་འབྱེད་དང་ཚོགས་ཞུགས་བོད་དོན་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུའི་ཆེད་དེབ་རེ་ཕྱག་རྟགས་སུ་གནང་། དེ་ཉིན་སློབ་ཕྲུག་བོད་དོན་རྒྱབ་སྐྱོར་ཚོགས་པ་དང་། རྒྱལ་སྤྱིའི་ཉེས་ཡངས་ཚོགས་པ་ཐེ་ཝན་ཡན་ལག རྒྱལ་སྤྱིའི་སྨན་པའི་མཐུན་ཚོགས། སྲོག་ཁྲིམས་མཚམས་འཇོག་མཐུན་ཚོགས། སྲིད་ཁྲིམས་བསྒྱུར་བཅོས་མཐུན་ཚོགས་སོགས་སྡེ་ཚན་ཁག་བཅུ་གསུམ་གྱི་འགན་འཁུར་མི་སྣ་དང་ལས་མི་གྲངས་སུམ་ཅུ་ལྷག་ལྷན་ཞུགས་གནང་ཡོད།
ཕྱི་ཚེས་ ༡༠ ཉིན་གསུམ་བཅུའི་དུས་དྲན་ཁྲོམ་སྐོར་གྲུབ་རྗེས་ཐེ་ཝན་དུ་གནས་སྡོད་བོད་མི་རྣམས་རང་དབང་ཐང་ཆེན་དུ་བོད་ཀྱི་འགྲེམས་སྟོན་བཤམས་ཡུལ་དུ་མཉམ་འཛོམས་གནང་ཞིང་། ཐོག་མར་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བཀའ་བློན་མཆོག་ཐེ་ཝན་ནང་ཕེབས་དོན་ངོ་སྤྲོད་གནང་། དེ་རྗེས་བཀའ་བློན་མཆོག་གིས་ཐེ་ཝན་དུ་གནས་སྡོད་བོད་མི་རྣམས་ལ་སྲིད་སྐྱོང་དང་བཀའ་ཤག་གི་སྐུ་ཚབ་གནང་སྟེ་འཚམས་འདྲི་གནང་གྲུབ་མཚམས་ཕྱི་ལོ་ ༡༩༥༩ ལོ་ནས་ད་བར་བཙན་བྱོལ་ནང་གི་མང་གཙོའི་འཕེལ་རིམ་ངོ་སྤྲོད་སྙིང་བསྡུས་དང་འབྲེལ་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་གིས་ཆབ་སྲིད་ཀྱི་སྐུ་དབང་ཡོངས་རྫོགས་རྩིས་སྤྲོད་མཛད་རྗེས་ད་བར་ལས་དོན་ཐོག་འཐུས་ཤོར་གང་ཡང་ཕྱིན་མེད།
ལྷག་པར་གཞུང་དང་མི་མང་གཉིས་འབྲེལ་བ་ལྔར་ལྷག་དམ་གཟབ་བྱ་རྒྱུ་གལ་ཆེ་ཡིན། སྔ་ལོ་༸གོང་ས་མཆོག་གི་སྐུའི་འཁྲུངས་སྐར་དང་། འདི་ལོ་གསུམ་བཅུའི་དུས་དྲན་སྐབས་བཀའ་བློན་རྣམ་པ་བོད་མི་གནས་སྡོད་ཕྱི་རྒྱལ་ཡུལ་གྲུ་ཁག་ལ་ཕེབས་དགོས་དོན་ཡང་དེ་ལྟར་ཡིན། རང་རེ་བོད་མི་རྣམས་ལ་དཀའ་སྡུག་གི་ལོ་རྒྱུས་དང་། ད་ཆ་བོད་ནང་ཐབས་སྡུག་ཛ་དྲག་གི་གནས་སྟངས་ཆགས་ཡོད་པ་ཚང་མས་མཁྱེན་གསལ་རེད། བོད་ནང་རང་ལུས་མེར་སྲེག་གཏོང་མཁན་གསལ་པོ་ཤེས་རྟོགས་ཡོད་པ་ད་བར་མི་གྲངས་ ༡༠༧ ཆགས་ཡོད། བཙན་བྱོལ་སྒྲིག་འཛུགས་ངོས་ནས་བོད་མི་རྣམས་ལ་རང་ལུས་མེར་སྲེག་མ་གནང་རོགས་ཞེས་འབོད་སྐུལ་ཞུ་མུས་རེད།
རང་ལུས་མེར་སྲེག་བྱུང་རྗེས་ང་ཚོས་སྨོན་ལམ་གསུང་འདོན་དང་། ཁོང་རྣམ་པའི་མངོན་འདོད་ང་ཚོས་སྒྲུབ་ཐབས་བྱ་རྒྱུ་ང་ཚོའི་ལས་འགན་རེད། གཞན་ཡང་སྤྱི་ཚོགས་ཐོག་བཀའ་མོལ་འདྲ་མིན་ཞིག་གླེང་ཡོང་གི་ཡོད། ༸གོང་ས་མཆོག་གི་སྐུ་དབང་རྩིས་སྤྲོད་མཛད་རྗེས་གཞུང་གི་ཐ་སྙད་འབོད་སྟངས་གང་ཡིན་རུང་། ཕྱི་ལོ་ ༡༦༤༢ ལོ་ནས་བཙུགས་པའི་གཞུང་དེ་ད་བར་རྒྱུན་གནས་ཡོད། གཞུང་དེའི་འགན་འཁྱེར་མཁན་ལ་འགྱུར་བ་འགྲོ་བ་མ་གཏོགས་གཞུང་དེ་མུ་མཐུད་གནས་ཡོད། བཙན་བྱོལ་སྒྲིག་འཛུགས་ཀྱི་ལངས་ཕྱོགས་སམ་སྲིད་བྱུས་གསལ་པོ་རེད། འཚེ་བ་མེད་པའི་བདེན་པའི་ལྟ་གྲུབ་དང་། གཉིས་ཕན་དབུ་མའི་ལམ་ནས་བོད་དོན་བདེན་མཐའ་སེལ་ཐབས་ལ་ད་བར་འགྱུར་བ་གང་ཡང་ཕྱིན་མེད། དབུ་མའི་ལམ་ཞེས་གོ་བདེ་ཤོས་ཀྱི་འགྲེལ་བཤད་ནི་བོད་རང་བཙན་ཡིན་པའི་གནས་བབ་ལ་འགྱུར་བ་གཏོང་ཐབས་མེད། ད་ལྟ་བོད་ནང་གི་གནས་སྟངས་ལ་ངོས་ལེན་བྱེད་ཐབས་མེད་པ། དེ་ཡང་གསལ་ཙམ་ཞུས་ན་ལོ་རྒྱུས་ཐོག་བོད་རྒྱ་ཁོངས་ཡིན་པ་ཁས་ལེན་བྱེད་ཐབས་མེད་པ། མ་འོངས་པར་བོད་རང་བཙན་རྩོད་ཀྱི་མེད་པ་དེ་རེད།
དབུ་མའི་ལམ་བརྒྱུད་བོད་དོན་བདེན་མཐའ་སེལ་རྒྱུར། རྒྱལ་སྤྱིའི་ཐོག་གཞུང་དང་སྒྲིག་འཛུགས་སོགས་ཕྱོགས་མང་པོ་ནས་རྒྱབ་སྐྱོར་བྱེད་བདེ་པོ་དང་། རྒྱབ་སྐྱོར་གནང་མཁན་མང་དུ་འགྲོ་བཞིན་པ་གསལ་པོ་རེད། དབུ་མའི་ལམ་ངོ་སྤྲོད་ཞུ་སྐབས་རང་བཙན་རྩོད་མཁན་རྣམས་སྡུག་པ་རེད་ཅེས་རྩ་བ་ནས་ཞུ་གི་མེད། འོན་ཀྱང་རང་བཙན་རྩོད་མཁན་རྣམས་ཀྱིས་ཕན་ཚུན་སློབ་སྦྱོང་གནང་རྒྱུ་གལ་ཆེན་པོ་རེད། བོད་ཀྱི་དཀའ་ངལ་དེ་གྲོས་མོལ་གྱི་ལམ་ནས་སེལ་རྒྱུ་ཡིན་སྟབས། ཕྱི་ལོ་ ༡༩༧༩ ལོ་ནས་ད་བར་བོད་རྒྱ་འབྲེལ་ལམ་བྱུང་བའི་བརྒྱུད་རིམ་ངོ་སྤྲོད་གནང་བ་དང་། གྲོས་མོལ་མགྱོགས་པོ་ཡོང་བའི་རེ་བ་ཞུ་བཞིན་ཡོད། མཐའ་མ་དོལ་རྒྱལ་གྱི་དཀའ་རྙོག་དེ་རེད། ད་ཆ་བཙན་བྱོལ་ནང་དོལ་རྒྱལ་བསྟེན་གསོལ་བྱེད་མཁན་ཉུང་ཉུང་རེད། འོན་ཀྱང་སྣང་མེད་དུ་འཇོག་མི་རུང་། ཐེ་ཝན་ནང་དོལ་རྒྱལ་དཀའ་རྙོག་དེ་ཡོད་པ་རེད། ཚང་མས་ཐུགས་སྣང་ཆེན་པོ་གནང་རྒྱུ་གལ་ཆེན་ཡིན།
མཇུག་ཏུ་ཐེ་སྡོད་བོད་མི་སེར་སྐྱ་རྣམས་ལ་འབོད་སྐུལ་ཞུས་དོན། ཐེ་ཝན་འདི་བཞིན་གལ་ཆེའི་ས་གནས་ཤིག་ཆགས་ཡོད་པ་མ་ཟད། རྒྱ་ནག་སྐམ་ས་དང་ཐག་ཉེ་ཤོས་ཀྱི་ས་གནས་ཤིག་ཡིན་སྟབས། ཐེ་ཝན་ནང་བོད་བརྒྱུད་ནང་བསྟན་ལ་སོགས་ལྷད་མེད་སྤེལ་རྒྱུ་དང་། བོད་མིའི་གནས་སྟངས་ཐེ་ཝན་བརྒྱུད་རྒྱ་ནག་སྐམ་སར་སླེབས་ཐུབ་རྒྱུ་གལ་ཆེ་ཡིན་སྐོར་སོགས་ཀྱི་གསུང་བཤད་དང་ཚོགས་ཞུགས་བོད་མི་རྣམས་ཀྱི་བསམ་ཚུལ་དང་དོགས་འདྲི་ཁག་ལ་ལན་འདེབས་གནང་ཡོད།
ཕྱི་ཚེས་ ༡༡ ཉིན་ཐེ་པེ་གྲོང་ཁྱེར་ནང་ཆགས་པའི་ཆོས་ལུགས་རིས་མེད་ཀྱི་ཆོས་ཚོགས་ཁག་བཞི་ནང་ལྟ་སྐོར་གྲུབ་མཚམས་ཕྱི་ཚེས་ ༡༢ ཐོ་རེངས་ཐེ་པེ་ནས་རྒྱ་གར་དུ་ཕྱིར་ཕེབས་ཡོད་པ་བཅས། །
