༢༠༡༣ ཟླ་ ༣ ཚེས་༡༥ རེས་གཟའ་པ་སངས།
༄༅། །ཕྱི་ལོ་ ༢༠༪༬༡༣ ཟླ་ ༣ ཚེས་ ༡༥ ཉིན་རྡ་ས་བོད་མིའི་མདུན་ལམ་སློབ་སྟོན་བསྟི་གནས་ཁང་དུ་གློག་ཀླད་དང་འབྲེལ་བའི་དྲ་རྒྱ་བཟོ་སྐྲུན་སྦྱོང་བརྡར་གྱི་ལེགས་གྲུབ་ཀྱིས་སློབ་ཕྲུག་ཁག་གཅིག་ལ་ཕྱག་འཁྱེར་གནང་བའི་མཛད་སྒོ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༡༡།༣༠ ཐོག་བོད་མིའི་མདུན་ལམ་སློབ་སྟོན་བསྟི་གནས་ཁང་གི་སྤྱི་ཁྱབ་འགན་འཛིན་འཇིགས་མེད་ཚུལ་ཁྲིམས་ལགས་དང་། སློབ་ཁྲིད་པ་ཚེ་བརྟན་སྒྲོལ་དཀར་ལགས། དྲ་རྒྱ་བཟོ་སྐྲུན་ཁྱད་ལས་པ་སྐུ་ཞབས་ཇེམ་ཝོལ་དཀར་ལགས། ལས་བྱེད་དང་སློབ་ཕྲུག་བཅས་ལྷན་འཛོམས་ཐོག་སྤྱི་ཁྱབ་འགན་འཛིན་གྱིས་ལས་གཞི་དང་འབྲེལ་བའི་གསུང་བཤད་གནང་དོན། བོད་མིའི་མདུན་ལམ་སློབ་སྟོན་ཁང་ས་གནས་བརྒྱད་དུ་བཙུགས་ཡོད། དེའི་དམིགས་ཡུལ་གཙོ་བོ་ནི། བོད་མི་གཞོན་སྐྱེས་སློབ་སྦྱོང་གི་གོ་སྐབས་མ་ཐོབ་པ་དང་། སློབ་སྦྱོང་གི་གོ་སྐབས་གང་ཙམ་ཐོབ་ཀྱང་ལས་ཀའི་གོ་སྐབས་མ་ཐོབ་པ་རྣམས་ལ་དམིགས་པ་ཞིག་ཡིན།
སྤྱིར་བཏང་ལས་རིགས་སྦྱོང་བརྡར་དང་། སློབ་གསོ་ཐོབ་ཆེད་བཀའ་ཤག་གོང་མ་དང་། ལྷག་པར་ད་ལྟའི་བཀའ་ཤག་སྐབས་བཅུ་བཞི་པའི་ངོས་ནས་དགོངས་པ་རྒྱ་ཆེ་བཞེས་མུས་ཡིན་སྟབས། རྡ་སར་བོད་མིའི་མདུན་ལམ་སློབ་སྟོན་པའི་དབུས་སྤྱི་ཁྱབ་ལས་ཁུངས་སུ་མདུན་ལམ་སློབ་སྟོན་གྱི་ལས་གཞི་སྤེལ་བའི་ཞོར་དུ་ལས་རིགས་སྦྱོང་བརྡར་གྱི་གློག་ཀླད་མཐུན་རྐྱེན་བསྐྲུན་པ་ལྟར། སློབ་ཕྲུག་ ༡༥ ལ་སབྱོང་བརྡར་ཐེངས་དང་པོ་ལེགས་གྲུབ་ཀྱི་མཛད་སྒོ་ཚོགས་ཀྱི་ཡོད། ཅེས་སོགས་ཀྱི་གསུང་བཤད་གནང་།
དེ་ནས་སློབ་གཉེར་བ་ཁག་གཅིག་ནས་སྒེར་གྱི་བསམ་ཚུལ་གསུང་རྗེས་སློབ་ཁྲིད་པ་ཚེ་བརྟན་སྒྲོལ་དཀར་ལགས་ཀྱིས་གསུང་དོན། དུས་ཡུན་ཟླ་བ་བཞི་ཙམ་རིང་གློག་ཀླད་ཀྱི་རྨང་གཞི་དང་མཐོ་རིམ་དྲ་རྒྱ་བཟོ་སྐྲུན་ཐོག་སློབ་སྦྱོང་གང་ཐོབ་པ་དེ་གོམས་པ་དང་པོར་བཟུང་སྟེ། མ་འོངས་པར་ཁྱེད་རྣམས་གློག་ཀླད་བཟོ་སྐྲུན་གྱི་ཁྱད་ལས་པ་ཞིག་ཆགས་རྒྱུའི་རེ་བ་ཡོད་སྐོར་གྱི་གསུང་བཤད་གནང་གྲུབ་མཚམས་དྲ་རྒྱ་བཟོ་སྐྲུན་ཁྱད་ལས་པ་སྐུ་ཞབས་ཇེམ་ཝོལ་ཀར་ལགས་ཀྱི་སློབ་ཁྲིད་ཀྱི་མྱོང་བའི་ཐོག་གསུང་བཤད་གནང་སྟེ་སློབ་ཕྲུག་རྣམས་ལ་ལག་འཁྱེར་དང་སྤྱི་ཁྱབ་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་འཚམས་འདྲིའི་མཇལ་དར་གཡོགས་ཡོད་པ་བཅས། །
