༢༠༡༣ ཟླ་ ༣ ཚེས་ ༢༩ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༣ ཟླ་ ༣ ཚེས་ ༢༧ ཉིན་དད་ལྡན་ཆོས་ཞུ་བ་རྣམས་ལ་ཆོས་འབྲེལ་སྐབས་ཆོས་ལུགས་མཐུན་སྒྲིལ་བྱ་རྒྱུ་གལ་ཆེན་ཡིན་སྐོར་ལམ་སྟོན་བཀའ་སློབ་སྩལ་དོན། ང་ཚོས་ཆོས་ལ་དད་པ་ཡོད་བརྗོད་མཁན་ཚོས་སོ་སོའི་ཆོས་ལ་དད་པ་དང་དམིགས་བསལ་ཞེན་ཁོག་བྱས་རྐྱེན་ཞེན་ཆགས་སླེབས་ཀྱི་ཡོད། དེར་བརྟེན་སོ་སོའི་ཆོས་ལུགས་མ་ཡིན་པའི་ཆོས་པ་ཚོར་དད་པ་དང་མ་གུས་པ་ཡོང་གི་ཡོད། དཔེར་ན། ང་ཚོ་ནང་པ་སངས་རྒྱས་པའི་ཆོས་པའི་ནང་ལ་ཆ་བཞག་ན། དེང་སྐབས་ཕྲན་བུ་ཡག་ཏུ་ཕྱིན་འདུག་མ་གཏོགས་ཐེག་ཆེན་གྱི་ཆོས་བྱེད་མཁན་ཚོས་ཁོང་ཚོ་ཐེག་དམན་གྱི་ཆོས་བྱེད་མཁན་རེད་ཅེས་བརྗོད་རྒྱུ་དང་། ཡང་ཐེག་དམན་པ་ཚོས་ཐེག་ཆེན་སངས་རྒྱས་ཀྱི་བཀའ་མ་རེད། ཅེས་བརྗོད་རྒྱུ་དེ་འདྲ་ཡོང་གི་འདུག
ང་ཚོ་ཐེག་ཆེན་ཆོས་བྱེད་མཁན་བོད་པ་ནང་ཁུལ་ལ་ཆ་བཞག་ན། ཁོ་རྙིང་མ་དང་ཁོ་དགེ་ལུགས། ཁོ་བཀའ་བརྒྱུད་པ་རེད། བཀའ་བརྒྱུད་ནང་ཁུལ་ལ་འབྲི་གུང་དང་ཀམ་ཚང་རེད་ཅེས་པའི་ཕྱོགས་ལྷུང་ཡོང་གི་འདུག དེ་དག་ནི་བློ་གཟུར་བོར་མ་གནས་པའི་སྐྱོན་རེད། དེ་ལྟར་རྩ་བ་ནས་བྱེད་རྒྱུ་མེད། ང་ཚོ་སྟོན་པ་བཅོམ་ལྡན་འདས་ཀྱི་རྗེས་འབྲང་གཅིག་པ་རེད། བོད་གངས་ཅན་ལྗོངས་ཀྱི་ཆོས་རྒྱུད་ལ་ཆ་བཞག་ན། དཔལ་ནཱ་ལེནྡྲ་ནས་བརྒྱུད་པའི་ཆོས་རྒྱུད་གཅིག་པ་རེད། རྙིང་མར་ཆ་བཞག་ན། མཁན་ཆེན་ཞི་བ་འཚོ་དང་སློབ་དཔོན་རིན་པོ་ཆེ་མཆོག་གི་དྲུང་ནས་སླེབ་པ་ཞིག་རེད། མཁན་ཆེན་ཞི་བ་འཚོས་ནང་ཆོས་སློབ་ཁྲིད་གནང་རྒྱུ་དེ་དག་གཙོ་བོ་འགན་བཞེས་ཡོད། མཁན་ཆེན་ཞི་བ་འཚོས་བོད་གངས་ཅན་ལྗོངས་ལ་སངས་རྒྱས་བསྟན་པ་སྔར་མེད་གསར་དུ་བཙུགས་པ་དང་རིམ་བཞིན་གོང་འཕེལ་གཏོང་རྒྱུ་དེ་དག་གི་ཐུགས་འགན་རྐང་བཞེས་གནང་སྐབས། དེའི་ཕྱི་ནང་གི་འགལ་རྐྱེན་སེལ་རྒྱུ་དེ་སློབ་དཔོན་རིན་པོ་ཆེ་མཆོག་གིས་གཙོ་བོ་གནང་ཡོད། དེ་བཞིན་སོ་སོའི་དགོན་པའི་ནང་ཆོ་ག་ཕྱག་ལེན་བཏོན་ནས་གོས་འདྲ་མིན་གྱོན་ཏེ་སྦུབ་དང་རྒྱ་གླིང་གཏོང་རྒྱུ་དེ་དག་ཡན་ལག་རེད་མ་གཏོགས་རྩ་བ་མིན། རྩ་བ་གཞུང་ཆེན་པོ་དེ་དག་ཡིན་པས་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། ངོས་ཀྱིས་གནས་ཚུལ་གོ་ཐོས་ལ། ཀ་སྦུག་ཏུ་བརྒྱ་བཞི་རྒྱག་སྐབས་དུང་དང་རྒྱ་གླིང་གཏོང་གི་ཡོད་པ་གོ་ཐོས་བྱུང་། སྔོན་མ་ལ་དྭགས་ལ་སྦྱིན་བདག་གི་ཕུང་པོ་སྐྱེལ་སྐབས་སྦྱིན་བདག་དང་འབྲེལ་ཡོད་དགོན་པའི་དགེ་འདུན་པ་ཚོས་གར་ཆས་གྱོན་ནས་ལག་ཏུ་རྡོ་རྗེ་དྲིལ་བུ་བསྣམས་ཏེ་གར་འཁྲབ་བཞིན་སྦྱིན་བདག་གི་ཕུང་པོ་གདན་འདྲེན་ཞུ་གི་འདུག ངོས་ཀྱིས་དེ་ལྟར་བྱ་རྒྱུ་མེད་ཅེས་བརྗོད་པ་ཡིན། གང་ལ་ཞེ་ན། དེ་ནི་དཀྱིལ་འཁོར་གྱི་མཆོད་པ་འབུལ་རྒྱུ་རེད་མ་གཏོགས་སྦྱིན་བདག་གི་ཕུང་པོ་སྐྱེལ་རྒྱུར་གར་འཁྲབ་རྒྱུ་མ་རེད། ཅེས་བརྗོད་པ་ཡིིན། རྗེས་སུ་ཁོང་ཚོས་བསྒྱུར་བཅོས་བཏང་འདུག སྤྱིར་བཏང་ཧི་མ་ལ་ཡའི་རི་རྒྱུད་དུ་གནས་མཁན་ཚོས་དུས་ད་ལྟ་བར་དུ་སངས་རྒྱས་ཀྱི་བསྟན་པ་བདག་པོ་བརྒྱབ་སྟེ་ཧ་ཅང་བཀའ་དྲིན་ཆེན་པོ་ཡིན།
ངོས་རང་བོད་པ་ཞིག་ཡིན་པའི་ངོས་ནས་ཁྱེད་རང་ཚོ་ཧི་མ་ལ་ཡའི་རི་རྒྱུད་དུ་གནས་པའི་ནང་པ་ཚོས་ཧུར་ཐག་འབད་ཐག་བྱས་ནས་བདག་པོ་བརྒྱབ་ཡོད་པར་བཀའ་དྲིན་ཆེ་ཞེས་ཞུ་རྒྱུ་ཡིན། འོན་ཀྱང་ང་ཚོས་ནམ་རྒྱུན་བྱེད་བཞིན་པ་དེ་ཁོ་ན་ཆོག་ཤེས་བྱས་ན་མ་བསྡད་པར་ས་དགེ་བཀའ་རྙིང་རིས་སུ་མ་ཆད་པའི་མཁས་པའི་སྐྱེས་བུ་ཚོས་མཛད་པའི་གཞུང་ཆེན་ལ་སློབ་གཉེར་བྱ་རྒྱུ་ཧ་ཅང་གལ་ཆེན་པོ་རེད།
དེ་བཞིན་འཛམ་གླིང་འདིའི་སྟེང་དེང་སྐབས་མི་དུང་ཕྱུར་བདུན་ཅུ་ལྷག་ཡོད། དེའི་ནང་ལ་དུང་ཕྱུར་བཅུ་ལྷག་ཆོས་ལ་དད་པ་མེད། འོན་ཀྱང་དེ་དག་མི་ཡིན་པ་མ་ཟད། བདེ་བ་འདོད་པ་དང་སྡུག་བསྔལ་མི་འདོད་པ་རེད། ཆོས་དད་མེད་མཁན་གྱི་བསམ་བློའི་ནང་ཆོས་ལ་དད་པ་མེད། དེར་བརྟེན་བྱམས་སྙིང་རྗེ་ཞེས་པ་དེ་ཆོས་ཕྱོགས་ཀྱི་སྐད་ཆ་རེད། དེར་དོ་སྣང་མེད་ཅེས་བརྗོད་མཁན་དེ་འདྲ་ཡོང་གི་འདུག་པས་ནོར་འཁྲུལ་རེད། ཆོས་ལ་དད་པ་མ་བྱས་པ་དང་ཆོས་མ་བྱས་པར་བསྡད་ཀྱང་འགྲིག་གི་རེད། འོན་ཀྱང་མི་ཞིག་ཡིན་ཕྱིན་ཆད་ལ་བདེ་སྐྱིད་ཀྱི་རྩ་བ་དེ་སེམས་ཞི་ཞིང་དུལ་བ་བྱུང་ན། བདེ་སྐྱིད་ཡོང་གི་ཡོད་པ་ཧ་ཅང་གསལ་པོ་རེད། དེང་སྐབས་ཚན་རིག་པ་སྙན་གྲགས་ཡོད་པ་ཚོས་གཟུགས་པོའི་འཕྲོད་བསྟེན་གཙོ་བོ་དེ་སེམས་ཀྱི་ཞི་བདེ་རེད་ཅེས་བརྗོད་ཀྱི་འདུག ཆང་དང་ཨ་རག་སྨྱོས་རྫས་བཟས་ནས་གནས་སྐབས་སེམས་ལྷོད་པོ་བྱུང་བ་དེར་ཞི་བདེ་བརྗོད་ཀྱི་མེད། སེམས་གྲུང་པོ་གནས་ཐོག་སེམས་ལ་ཞི་བདེ་ལྡན་པ་ཞིག་དགོས་ཀྱི་ཡོད། ང་ཚོ་ནི་མིའི་སྤྱི་ཚོགས་ལ་བརྟེན་པའི་སེམས་ཅན་ཆགས་ཡོད། དེར་བརྟེན་མི་སྒེར་པ་སོ་སོའི་མདུན་ལམ་ཡང་སྤྱི་ཚོགས་ལ་བརྟེན་ཡོད། གང་ལ་རྟེན་སའི་སྤྱི་ཚོགས་དེར་དོགས་པ་རྣམ་རྟོག་བྱས་ནས་བསྡད་ན་མི་དེ་སྐྱིད་པ་རྩ་བ་ནས་ཡོང་ཐབས་མེད།
དཔེར་ན། སྤྲེའུ་ཕྲུག་ཁག་གཅིག་རང་གི་མ་དང་མཉམ་དུ་བཞག་པ་དང་། ཁག་གཅིག་རང་གི་མ་དང་ཁ་བྲལ་ནས་འཇོག་སྐབས། མ་དང་ལྷན་དུ་ཡོད་པའི་ཕྲུ་གུ་དེ་དུས་རྟག་ཏུ་སྐྱིད་སྣང་ཡོད་པ་དང་། མ་དང་ཁ་བྲལ་ནས་བཞག་པ་དེ་དག་ག་དུས་ཡིན་རུང་འཁྲུག་པ་རྒྱག་གི་ཡོད་སྐོར་བརྗོད་ཀྱི་འདུག དེར་བརྟེན་ཨ་མའི་བརྩེ་བ་ཧ་ཅང་གལ་ཆེན་ཆགས་ཡོད་སྟབས། ཁྱེད་རང་ཚོ་ཕ་མ་ཚོས་རང་གི་ཕྲུ་གུར་བྱམས་སྐྱོང་ཐོག་ནས་ལྟ་རྟོག་བྱ་རྒྱུ་དེ་ཧ་ཅང་གལ་ཆེན་པོ་རེད། ཕྲུ་གུ་དེ་མི་ཚེར་སེམས་པ་བཟང་པོ་ཡོང་རྒྱུར་ཆུང་དུས་ནས་ཕ་མས་བྱམས་སྐྱོང་ཡག་པོ་བྱས་ན། ཕྲུ་གུ་དེ་སེམས་པ་བཟང་བ་ཡོང་གི་རེད། ཅེས་སོགས་ཀྱི་བཀའ་སློབ་སྩལ་ཡོད། །
