༢༠༡༣ ཟླ་ ༢ ཚེས་ ༢༦ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༢ ཚེས་ ༢༦ ཉིན་རྡ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་ནས་གོ་སྒྲིག་ཐོག་བོད་ཡིག་དང་འབྲེལ་བའི་དེབ་རིགས་བྱུས་འགོད་བྱེད་སྟངས་སྐོར་གྱི་ཟབ་སྦྱོང་དབུ་འཛུགས་གནང་ཡོད།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་དང་། ཚོགས་སྡེ་ཁག་ནས་ཟབ་སྦྱོང་མཉམ་ཞུགས་བ་མི་གྲངས་ ༨༠ བརྒལ་བ་བཅར་བའི་ཐོག་སྨོན་ལམ་བོད་ཀྱི་བརྡ་འཕྲིན་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་བློ་བཟང་སྨོན་ལམ་ལགས་ཀྱིས་དེབ་རིགས་ཁག་གཅིག་གྱུར་ཡོང་ཐབས་དང་།
བོད་ཡིག་དང་འབྲེལ་བའི་དཀའ་ངལ་སེལ་ཐབས། ཡར་རྒྱས་གཏོང་ཕྱོགས་བཅས་ཀྱི་སྐོར་ལ་ངོ་སྤྲོད་གསུང་བཤད་གནང་རྗེས་སྐུ་མགྲོན་གཙོ་བོས་གསུང་བཤད་གནང་དོན། བོད་པའི་དཔེ་དེབ་རིགས་བྱུས་འགོད་དང་། ཆོས་དང་རིག་གཞུང་འབྲེལ་བའི་ལས་གཞི་དེ་དག་གལ་ཆེ་མིན་ནི་ཉེ་ཆར་བོད་ནང་རང་སྲོག་འབུལ་བཞིན་པ་དེ་དག་གི་མངོན་འདོད་ལས་རྟོགས་ཐུབ་པ་མ་ཟད། སོ་སོའི་ངོ་བོ་སྲུང་སྐྱོབ་ཀྱི་ནུས་པ་དང་འཛམ་གླིང་སྤྱིར་ཕན་ཐོགས་ཀྱི་ནུས་པ་ནི་ཤེས་ཡོན་ཐོག་ནས་ལས་གཞི་འདི་ཚོར་ལོ་ནས་ལོ་བསྟུད་རྒྱུན་སྲིང་ནས་འབད་པ་བྱ་རྒྱུ་གལ་ཆེན་ཡིན། དེ་བཞིན་དཔེ་དེབ་ཁག་གི་ཆེ་ཆུང་རྒྱལ་སྤྱིའི་ཚད་དང་མཐུན་པ་དང་བོད་པའི་ཐུན་མོན་གྱི་རྣམ་པ་མཚོན་དོན་ཁྱད་ཆོས་དགོས་སྐོར་སོགས་ཀྱི་གསུང་བཤད་གནང་སྟེ་ཚོགས་ཐུན་དང་པོ་གྲོལ། དེ་རྗེས་སློབ་ཁྲིད་ཀྱི་བརྗོད་གཞིའི་སྟེང་དྲི་བ་དྲིས་ལན་དང་ཟབ་སྦྱོང་བ་རྣམས་ཕན་ཚུལ་གོ་བསྡུར་གནང་ཡོད། ད་ཐེངས་ཟབ་སྦྱོང་ཉིན་བདུན་ཕྲག་གཅིག་རིང་གནང་རྒྱུ་ཡིན་འདུག་པ་བཅས། །
